വല്ലാര്‍പാടം പനമ്പുകാട് സെന്റ് ജോസഫ്‌സ് പള്ളിയിലെ വികാരിയുടെ വീട് കുത്തിത്തുറന്ന് മോഷണം നടത്തിയ കേസില്‍ പ്രതികള്‍ മോഷ്ടിച്ചത് മയക്കുമരുന്നു വാങ്ങാനുള്ള പണത്തിനായെന്ന് പോലീസ്.


കേസുമായി ബന്ധപ്പെട്ട് പനമ്പുകാട് സ്വദേശികളായ പുന്നത്തറ വീട്ടില്‍ അലിസ്റ്റര്‍(22), ഷിനു(26) എന്നിവരെയാണ് മുളവുകാട് പോലീസ് പിടികൂടിയത്. കഴിഞ്ഞ വെള്ളിയാഴ്ച രാത്രിയോടെയായിരുന്നു മോഷണം നടന്നത്.

പള്ളിവികാരി സ്ഥലത്തില്ലായിരുന്ന സമയത്ത് വീടിന്റെ പിന്‍വാതില്‍ പൊളിച്ച് അകത്തുകയറിയ പ്രതികള്‍ അലമാരയില്‍ സൂക്ഷിച്ചിരുന്ന ഇരുപതിനായിരം രൂപയും ബ്ലൂടൂത്ത് ഇയര്‍ ഫോണും മോഷ്ടിച്ചു. സംഭവ ശേഷം ബംഗളൂരുവിലേക്ക് കടന്ന പ്രതികള്‍ മോഷ്ടിച്ച പണം ഉപയോഗിച്ച് മയക്കുമരുന്ന് ഉള്‍പ്പെടെയുള്ളവ വാങ്ങി രണ്ടു ദിവസം ആര്‍ഭാട ജീവിതം നടത്തിയ ശേഷം നാട്ടിലേക്ക് മടങ്ങി വരുന്നതിനിടെയാണ് പോലീസ് പിടിയിലായത്.

മോഷണ സമയം പ്രതികള്‍ നിരീക്ഷണ കാമറ മറയ്ക്കുന്നതിനിടെ ഇവരുടെ ദൃശ്യം കാമറയില്‍ പതിഞ്ഞിരുന്നു. ഇതിനുപുറമേ ഇവരുടെ മൊബൈല്‍ ഫോണും കേന്ദ്രീകരിച്ച് നടത്തിയ അന്വേഷണമാണ് പ്രതികളെ പിടികൂടാനായി സഹായകമായതെന്ന് മുളവുകാട് പോലീസ് .