കെ.എസ്.ഇ.ബി ഭിന്നശേഷിക്കാര്‍ക്കും ക്യാന്‍സര്‍ രോഗികള്‍ക്കും വൈദ്യുതി നിരക്കില്‍ ഇളവ് പ്രഖ്യാപിച്ചു. കേരള സ്റ്റേറ്റ് ഇലക്ട്രിസിറ്റി റെഗുലേറ്ററി കമ്മീഷന്റെ താരിഫ് ഉത്തരവ് പ്രകാരമാണ് ഭിന്നശേഷിക്കാരും ക്യാന്‍സര്‍ രോഗികളും താമസിക്കുന്ന വീടുകള്‍ക്ക് താരീഫില്‍ പ്രത്യേക ഇളവ് പ്രഖ്യാപിച്ചത്. 2024 ഡിസബംര്‍ അഞ്ച് മുതല്‍ 2027 മാര്‍ച്ച് 31 വരെ ഇളവ് ബാധകമാകും.

1. ഇളവ് എങ്ങനെ?

ഭിന്നശേഷിക്കാരോ ക്യാന്‍സര്‍ രോഗികളോ താമസിക്കുന്ന വീടുകളിലെ പ്രതിമാസ ഉപഭോഗത്തിലെ ആദ്യ 100 യൂണിറ്റ് ഉപഭോഗം വരെ പ്രതി യൂണിറ്റിന് 1.50 രൂപ എന്ന കുറഞ്ഞ നിരക്കാണ് താരീഫ് ഉത്തരവ് പ്രകാരം നല്‍കേണ്ടിവരുക.

100 യൂണിറ്റിന് മുകളില്‍ വരുന്ന ഉപഭോഗത്തിന് താരിഫ് സ്ലാബ് പ്രകാരമുള്ള നിരക്ക് ബാധകമാവും.

ഉദാ: പ്രതിമാസ ഉപഭോഗം = 135 യൂണിറ്റ്

ആദ്യ 100 യൂണിറ്റ് = 100 x 1.5 രൂപ ( സബ്‌സിഡൈസ്ഡ് താരിഫ്) = 150 രൂപ

ബാക്കി 35 യൂണിറ്റ് = 35 x 5.35 ( 100 ന് മുകളില്‍ 150 വരെയുള്ള താരിഫ്) = 187.25 രൂപ

ആകെ = 150 + 187.25 = 337.25 രൂപ

2. ആര്‍ക്കെല്ലാം ലഭ്യമാവും ?

40 ശതമാനമോ അതിലധികമോ സ്ഥിരമായ ഭിന്നശേഷിയുള്ളവരോ ( Permaent Disability of & above 40%) ക്യാന്‍സര്‍ രോഗികളോ താമസിക്കുന്ന 2000 വാട്ടോ അതില്‍ താഴെയോ കണക്റ്റഡ് ലോഡുമുള്ള ദാരിദ്ര്യ രേഖയ്ക്ക് താഴെയുള്ള (BPL) കുടുംബങ്ങള്‍ക്ക് ഈ ഇളവ് ലഭ്യമാവും.

3. ഓഫീസില്‍ സമര്‍പ്പിക്കേണ്ട രേഖകള്‍ ?

A. ഉപഭോക്താവിന്റെ അപേക്ഷ

B. ഭിന്നശേഷിയുള്ള / ക്യാന്‍സര്‍ രോഗിയായ വ്യക്തി, ഉപഭോക്താവിന്റെ കൂടെ താമസ്സിക്കുന്നയാളാണെന്ന് തെളിയിക്കാനുള്ള രേഖ.

ഇതിനായി റേഷന്‍ കാര്‍ഡിന്റെ കോപ്പിയോ, വില്ലേജ് ഓഫീസറുടെ സര്‍ട്ടിഫിക്കറ്റോ ഉപയോഗിക്കാം.

C. ഭിന്നശേഷിയുള്ള / ക്യാന്‍സര്‍ രോഗിയായ വ്യക്തിയുടെ പേരിലാണ് വൈദ്യുതി കണക്ഷനെങ്കില്‍ 'B' പ്രകാരമുള്ള രേഖ ആവശ്യമില്ല.

D. ഭിന്നശേഷിക്കാരനെങ്കില്‍ 40 ശതമാനമോ അതിലധികമാ സ്ഥിര ഭിന്നശേഷിയുണ്ടെന്ന് (Permaent Disability) തെളിയിക്കുന്ന മെഡിക്കല്‍ ബോര്‍ഡിന്റെ സര്‍ട്ടിഫിക്കറ്റ്. ക്യാന്‍സര്‍ രോഗിയെങ്കില്‍ ഗവണ്‍മെന്റ് മെഡിക്കല്‍ പ്രാക്റ്റീഷ്യനറുടെ മെഡിക്കല്‍ സര്‍ട്ടിഫിക്കറ്റ് അല്ലെങ്കില്‍ പ്രമുഖ ക്യാന്‍സര്‍ ട്രീറ്റ്‌മെന്റ് സ്ഥാപനങ്ങളില്‍ നിന്നുള്ള സര്‍ട്ടിഫിക്കറ്റ്.

E. തദ്ദേശ സ്വയംഭരണ സ്ഥാപനങ്ങളില്‍ നിന്ന് ലഭിക്കുന്ന BPL സര്‍ട്ടിഫിക്കറ്റ് അല്ലെങ്കില്‍ വാര്‍ഷിക വരുമാനം 50,000 രൂപയില്‍ താഴെ എന്ന് തെളിയിക്കുന്ന വരുമാന സര്‍ട്ടിഫിക്കറ്റ്.

4. വിതരണ ഓഫീസുകള്‍ ചെയ്യേണ്ടത്.

മേല്‍പ്പറഞ്ഞ രേഖകളോടൊപ്പമുള്ള അപേക്ഷകള്‍ പരിശോധിച്ച് ഫീല്‍ഡ് ഇന്‍സ്‌പെക്ഷന്‍ നടത്തി ഉപഭോക്താവിന്റെ കണക്റ്റഡ് ലോഡ് 2 കിലോ വാട്ടിന് മുകളിലല്ല എന്ന് ഉറപ്പാക്കണം. ആയതിന ശേഷം ബില്ലിംഗ് സോഫ്റ്റവെയറില്‍ സെക്ഷന്‍ ഇനിഷ്യേറ്റഡായി ഉപഭോക്താവിന്റെ പര്‍പ്പസ് Domestic Cancer / Disabled ആക്കി മാറ്റണം. തുടര്‍ന്ന് വരുന്ന ബില്ലുകളില്‍ ഉപഭോക്താവിന് ഇളവ് ലഭിച്ചു തുടങ്ങും.