വല്ലപ്പുഴയില്‍ വാഹനാപകടത്തില്‍ വിദ്യാര്‍ത്ഥിനിക്ക് ദാരുണാന്ത്യം. ദിജീഷ എന്ന പെണ്‍കുട്ടിയാണ് മരിച്ചത്. കുറുവട്ടൂരില്‍ സ്‌കൂട്ടര്‍ നിയന്ത്രണം വിട്ട് പോസ്റ്റിലിടിച്ചാണ് അപകടം സംഭവിച്ചത്.

അതേസമയം, തലസ്ഥാനത്ത് പുലര്‍ച്ചെയുണ്ടായ അപകടത്തില്‍ ഓട്ടോറിക്ഷാ യാത്രക്കാരന്‍ മരിച്ചു. തിരുവനന്തപുരം പട്ടത്ത് വാഹനങ്ങള്‍ തമ്മില്‍ കൂട്ടിയിടിച്ചുണ്ടായ അപകടത്തില്‍ ഓട്ടോറിക്ഷയ്ക്ക് തീപിടിച്ചാണ് യാത്രക്കാരന്‍ മരണമടഞ്ഞത്. 40കാരനായ ശ്രീകാര്യം സ്വദേശി സുനിയാണ് മരിച്ചത്. പട്ടം സെന്റ് മേരീസ് സ്‌കൂളിന് മുന്‍പില്‍ ഇന്നലെ് പുലര്‍ച്ചെ മുന്നര മണിയോടെയായിരുന്നു അപകടം. അമിത വേഗത്തിലെത്തിയ കാര്‍ ബൈക്കിലും ഓട്ടോറിക്ഷയിലും കൂട്ടിയിടിക്കുകയായിരുന്നു.

ഇടിയുടെ ആഘാതത്തില്‍ ഓട്ടോറിക്ഷ ആളികത്തുകയായിരുന്നുവെന്നാണ് അപകടം കണ്ടുനിന്നവര്‍ പറഞ്ഞത്. സുനി ഓട്ടോറിക്ഷയിലെ യാത്രക്കാരിലൊരാളായിരുന്നു.

ഗാന്ധിപുരം സ്വദേശി അയാനാണ് (19) കാറോടിച്ചിരുന്നത്. അപകടത്തില്‍ പരിക്കേറ്റവരെ ആശുപത്രിയില്‍ പ്രവേശിപ്പിച്ചിരിക്കുകയാണ്. മെഡിക്കല്‍ കോളേജ് പൊലീസ് അപകട സ്ഥലത്തെത്തി നടപടികള്‍ സ്വീകരിച്ചു.