മീനച്ചിലാറ്റില്‍ ഒഴുക്കില്‍പ്പെട്ട് കാണാതായ രണ്ടാമത്തെ വിദ്യാര്‍ഥിയുടെ മൃതദേഹവും കണ്ടെത്തി
മീനച്ചിലാറ്റില്‍ ഒഴുക്കില്‍പ്പെട്ട് കാണാതായ രണ്ടാമത്തെ വിദ്യാര്‍ഥിയുടെ മൃതദേഹവും കണ്ടെത്തി. അടിമാലി സ്വദേശി കരിങ്കുളം കൈപ്പന്‍പ്ലാക്കല്‍ വീട്ടില്‍ അമല്‍ കെ. ജോമോന്റെ (19) മൃതദേഹമാണ് ഭരണങ്ങാനം വിലങ്ങുപാറ പാലത്തിന് സമീപത്തുനിന്ന് തന്നെ കണ്ടെത്തിയത്. കഴിഞ്ഞ ശനിയാഴ്ചയാണ് നാല് പേരടങ്ങുന്ന വിദ്യാര്‍ഥി സംഘം കുളിക്കാനായി മീനച്ചിലാറ്റിലെ ഭരണങ്ങാനത്തെ ഈ കടവില്‍ ഇറങ്ങിയത്.
അടിയൊഴുക്ക് ശക്തമായ തുടര്‍ന്ന് വിദ്യാര്‍ഥികള്‍ ഒഴുക്കില്‍പെടുകയായിരുന്നു. ഇവരില്‍ രണ്ടുപേര്‍ നീന്തി രക്ഷപ്പെട്ടുവെങ്കിലും മുണ്ടക്കയം സ്വദേശി തെക്കേമല പന്ത പ്ലാക്കല്‍ വീട്ടില്‍ ആല്‍ബിന്‍ ജോസഫ് (21), അമല്‍ കെ. ജോമോന്‍ എന്നിവര്‍ ഒഴുക്കില്‍പ്പെട്ടു പോകുകയായിരുന്നു.
ഇതില്‍ ആല്‍ബിന്റെ മൃതദേഹം ഇന്നലെ വൈകുന്നേരത്തോടെ കുളിക്കാനായി ഇറങ്ങിയ കടവില്‍ നിന്നു 200 മീറ്റര്‍ അകലെ നിന്ന് കണ്ടെത്തിയിട്ടുണ്ടായിരുന്നു. ഇന്നലെ ആല്‍വിന്റെ മൃതദേഹം കണ്ടെടുത്ത ഭാഗത്ത് നിന്നാണ് അമലിന്റെ മൃതദേഹം ലഭിച്ചത്. പാലായിലെ ഇന്‍സ്റ്റിറ്റ്യൂട്ടില്‍ ജര്‍മന്‍ ഭാഷ പഠിക്കാനെത്തിയതായിരുന്നു വിദ്യാര്‍ത്ഥികള്‍.
https://www.facebook.com/Malayalivartha
