മൊബൈല് ഫോണ് മോഷ്ടിച്ചെന്ന് തെറ്റിദ്ധരിച്ച് ബന്ധുവിനെ കൊലപ്പെടുത്തിയ കേസ്.. പ്രതിക്ക് ജീവപര്യന്തം തടവും രണ്ടു ലക്ഷം രൂപ പിഴയും ശിക്ഷ വിധിച്ചു

വീട്ടില് നിന്നും വിളിച്ചിറക്കി കുത്തിക്കൊലപ്പെടുത്തിയ കേസ്... മൊബൈല് ഫോണ് മോഷ്ടിച്ചു എന്ന് തെറ്റിദ്ധരിച്ചുള്ള വിരോധത്താല് ബന്ധുവിനെ കൊലപ്പെടുത്തിയ കേസില് പ്രതിക്ക് ജീവപര്യന്തം തടവും രണ്ടു ലക്ഷം രൂപ പിഴയും ശിക്ഷ വിധിച്ചു. ഭരതന്നൂര് പാലോട്ടുകോണം വിദ്യാസദനം വീട്ടില് ശിവശങ്കരപ്പിള്ളയുടെയും ശ്യാമളയുടെയും മകനായ വിഷ്ണുശങ്കറിനെ വീട്ടില് നിന്നും വിളിച്ചിറക്കി കുത്തിക്കൊലപ്പെടുത്തിയ കേസില് ബന്ധുവായ കടയ്ക്കല് ബൗണ്ടര് മുക്ക് വട്ടമുറ്റം സ്വദേശി സജി കുമാറിനെയാണ് ശിക്ഷിച്ചത്.
തിരുവനന്തപുരം ഏഴാം അഡിഷണല് സെഷന്സ് കോടതി ജഡ്ജി പ്രസൂണ് മോഹന് ആണ് പ്രതി കുറ്റക്കാരനെന്ന് കണ്ടെത്തി ശിക്ഷ വിധിച്ചത്. 2014 ജൂലൈ 31നാണ് സംഭവം നടന്നത്.
ഒരുമിച്ച് പെയിന്റിംഗ് പണിക്കും മറ്റും പോയിരുന്ന പ്രതിയുടെ മൊബൈല് ഫോണ് വിഷ്ണുശങ്കര് എടുത്തുമാറ്റി എന്ന് സംശയിച്ചാണ് വീട്ടിലെത്തി പ്രതി കൃത്യം നടത്തിയത്. സംഭവം നേരില് കണ്ട വിഷ്ണുശങ്കറിന്റെ അമ്മുമ്മ കുഞ്ഞുലക്ഷ്മിയുടെയും അച്ഛന് ശിവശങ്കരപ്പിള്ളയുടെയും മൊഴികളാണ് കേസില് നിര്ണായകമായത്. പ്രതിക്കെതിരെ പ്രോസിക്യൂഷന് 26 സാക്ഷികളെ ഹാജരാക്കി 24 രേഖകളും 17 തൊണ്ടിമുതലുകളും ഹാജരാക്കി. പാങ്ങോട് പോലീസ് കുറ്റപത്രം നല്കിയ കേസില് പ്രോസിക്യൂഷനു വേണ്ടി അഡീ. പബ്ലിക് പ്രോസിക്യൂട്ടര് അഡ്വക്കേറ്റ് വേണി. കെ ഹാജരായി.
"
https://www.facebook.com/Malayalivartha
























