സുഹൃത്തിന്റെ അച്ഛന്റെ ജീവന് രക്ഷിക്കാനായി രക്തം ദാനം ചെയ്തതിനു പിന്നാലെ യുവാവ് മരിച്ചു
സങ്കടക്കാഴ്ചയായി... സുഹൃത്തിന്റെ പിതാവിന്റെ ജീവന് രക്ഷിക്കാനായി ആശുപത്രിയിലെത്തി രക്തം ദാനം ചെയ്തതിന് തൊട്ടുപിന്നാലെ ഹൃദയാഘാതത്തെ തുടര്ന്ന് യുവാവ് മരിച്ചു.
പുനലൂര് മണിയാര് പരവട്ടം മഹേഷ് ഭവനില് മഹേഷ് കുമാര് (35) ആണ് മരിച്ചത്. പുനലൂര് താലൂക്ക് ആശുപത്രിയില് ഇന്നലെ ഉച്ചയോടെയാണ് സംഭവം. സുഹൃത്തിന്റെ പിതാവ് പാലിയേറ്റീവ് കെയര് യൂണിറ്റില് ചികിത്സയില് കഴിയുകയായിരുന്നു. ഈ രോഗിക്ക് രക്തം നല്കാനാണ് മഹേഷ് എത്തിയത്.
രക്തം ശേഖരിക്കുന്നതിനുമുമ്പ് പതിവുപോലെ യുവാവിന്റെ രക്തസമ്മര്ദം, പള്സ് അടക്കം ആശുപത്രിയില് പരിശോധിച്ചതായി അധികൃതര് വ്യക്തമാക്കുന്നു. അസാധാരണമായി മറ്റൊന്നും കണ്ടെത്താത്തതിനെ തുടര്ന്ന് രക്തം ശേഖരിച്ചു. തുടര്ന്ന്, പുറത്തേക്കിറങ്ങി ശീതളപാനീയവും കുടിച്ചശേഷം യുവാവിന് നെഞ്ചുവേദന അനുഭവപ്പെട്ടു. ഗ്യാസ്ട്രബിള് ആയിരിക്കുമെന്നും കുഴപ്പമില്ലെന്നും മഹേഷ് ഡോക്ടറോട് പറഞ്ഞു.
എന്നാല്, ഇസിജി എടുത്തപ്പോള് നേരിയ വ്യത്യാസം ശ്രദ്ധയില്പെട്ടു. ഉടനടി ഐസിയുവില് പ്രവേശിപ്പിച്ചു. ആശുപത്രി സൂപ്രണ്ടിന്റെ നേതൃത്വത്തില് ഡോക്ടര്മാരുടെ സംഘം മഹേഷിന്റെ ജീവന് രക്ഷിക്കാനായി ഏറെനേരം ശ്രമം നടത്തി. അപകടനില തരണം ചെയ്താല് തിരുവനന്തപുരം മെഡിക്കല് കോളജ് ആശുപത്രിയിലേക്ക് വിദഗ്ധ ചികിത്സക്കായി അയക്കുന്നതിന് ആംബുലന്സും ക്രമീകരിച്ചെങ്കിലും മഹേഷിന്റെ ജീവന് രക്ഷിക്കാനായില്ല
https://www.facebook.com/Malayalivartha
