കോട്ടപ്പടി പഞ്ചായത്തിലെ കൂവക്കണ്ടത്ത് ഇന്നലെ രാവിലെ ഏഴരയോടെ നാട്ടിലിറങ്ങിയ കാട്ടാനകളെ തുരത്താന്‍ എത്തിയ വനപാലകര്‍ രക്ഷപ്പെട്ടത് തലനാരിഴയ്ക്ക്. ആക്രമിക്കാന്‍ പാഞ്ഞടുത്ത ആനക്കു മുന്നില്‍നിന്ന് വനപാലകരും നാട്ടുകാരും ഓടി രക്ഷപ്പെടുകയായിരുന്നു. കോട്ടപ്പാറ വനമേഖലയില്‍ നിന്ന് ജനവാസമേഖലയിലെത്തിയ ആറ് ആനകളില്‍ ഒരെണ്ണമാണ് വനപാലകര്‍ക്കും നാട്ടുകാര്‍ക്കും നേരെ പാഞ്ഞടുത്തത്. ആനയെ ഓടിക്കാന്‍ കഴിയുന്ന ഉപകരണങ്ങളോ ആയുധങ്ങളോ അവരുടെ കൈവശമുണ്ടായിരുന്നില്ല. എല്ലാവരും ഓടി മാറിയതോടെ ആന മറ്റു ആനകള്‍ക്കൊപ്പം മടങ്ങി.

പതിവായി ആനകളിറങ്ങുന്ന പ്രദേശമാണിവിടം. ആവാസകേന്ദ്രമായ കോട്ടപ്പാറ പ്ലാന്റേഷനില്‍ നിന്ന് മൂന്ന് കിലോമീറ്ററോളം അകലെയുള്ള കല്ലുമല ഭാഗത്തേക്ക് പോയ ആനകളാണ് നേരം പുലര്‍ന്ന ശേഷവും നാട്ടില്‍ തുടര്‍ന്നത്. സാധാരണയായി രാത്രിയെത്തുന്ന ആനകള്‍ നേരം പുലരും മുമ്പേ വനത്തിലേക്ക് മടങ്ങും. നാട്ടിലിറങ്ങുന്ന ആനകള്‍ വലിയതോതില്‍ കൃഷി നശിപ്പിക്കാറുണ്ട്.

കഴിഞ്ഞ ദിവസങ്ങളിലെല്ലാം വിവിധ കൃഷിയിടങ്ങളില്‍ ആനകള്‍ ഇറങ്ങിയിരുന്നു. ആനശല്യം മൂലം ജനങ്ങള്‍ പൊറുതിമുട്ടിയിരിക്കുകയാണ്. കൃഷിസ്ഥലവും വീടുമെല്ലാം ഉപേക്ഷിച്ച് മറ്റ് പ്രദേശങ്ങളലേക്ക് താമസം മാറിയവര്‍ നിരവധിയാണ്. കാട്ടാനശല്യം ഇല്ലാതാക്കാന്‍ ഫെന്‍സിംഗ് സ്ഥാപിക്കുന്നതിനുള്ള പ്രവര്‍ത്തനങ്ങള്‍ നടക്കുന്നുണ്ടെങ്കിലും ഇത് ശാശ്വതപരിഹാരമാകുമെന്ന പ്രതീക്ഷ നാട്ടുകാര്‍ക്കില്ല.