പാടത്ത് ജോലി ചെയ്തു കൊണ്ടിരിക്കെ പുള്ളിപ്പുലിയുടെ ആക്രമണം. രക്ഷപ്പെടാനുള്ള ശ്രമത്തിനിടെ കർഷകൻ കിണറ്റിൽ വീണു. പിന്നാലെ പുലിയും കിണറ്റിലേക്ക്. പുലിയുടെ ആക്രമണത്തിലും വീഴ്ചയിലുള്ള പരിക്കുമേറ്റ് കർഷകൻ കൊല്ലപ്പെട്ടു. വിവരമറിഞ്ഞ സംഭവ സ്ഥലത്തേക്ക് എത്തിയ വനംവകുപ്പ് ഉദ്യോഗസ്ഥരെ തടഞ്ഞ് നാട്ടുകാർ. ഒടുവിൽ പരിക്കേറ്റ് പുലിയും ചത്തു.

മഹാരാഷ്ട്രയിലെ നാസിക്കിലെ സിന്നർ താലൂക്കിലെ ഷിവ്ദയിൽ ഞായറാഴ്ചയാണ് സംഭവം. ഗോരഖ് ജാദവ് എന്ന കർഷകൻ ഞായറാഴ്ച പാടത്തെ ജോലിക്കിടെ ഉച്ചഭക്ഷണം കഴിക്കുന്നതിനിടെയാണ് പുലി ആക്രമിക്കുന്നത്.

പുലിയിൽ നിന്ന് രക്ഷപ്പെടാനായി ഗോരഖ് ജാദവ് പുലിയേയും ആക്രമിച്ചു.ഇതിനിടെ പുലിയും ഗോരഖ് ജാദവും സമീപത്തുണ്ടായിരുന്ന കിണറിലേക്ക് വീണ് പോവുകയായിരുന്നു. എന്നാൽ വീഴ്ചയിൽ പരിക്ക് കൂടി സംഭവിച്ചതിനാൽ ഗോരഖ് ജാദവ് മരിച്ചു. സംഭവമറിഞ്ഞ് വനം വകുപ്പ് സംഘം ഗ്രാമത്തിലേക്ക് എത്തി.

എന്നാൽ കർഷകന്റെ മരണത്തോടെ പ്രകോപിതരായ നാട്ടുകാർ വനംവകുപ്പ് സംഘത്തെ മേഖലയിലേക്ക് കടത്തി വിടാതെ തടയുകയായിരുന്നു. മൂന്ന് മണിക്കൂറിലേറെ ചർച്ചകൾ നടത്തിയ ശേഷമാണ് മേഖലയിലേക്ക് കടന്ന് ചെല്ലാൻ വനംവകുപ്പ് സംഘത്തിന് കഴിഞ്ഞത്.. അപ്പോഴേക്കും പരിക്കേറ്റ പുലിയും ചത്തു.