സ്റ്റേവയറില് നിന്ന് ഷോക്കേറ്റ് ഒന്പതാം ക്ലാസ്സുകാരന് മരിച്ച സംഭവത്തില് കേസെടുത്തു

മലപ്പുറത്ത് വൈദ്യുത പോസ്റ്റിലെ സ്റ്റേ വയറില് നിന്നും ഷോക്കേറ്റ് ഒന്പതാം ക്ലാസ്സുകാരന് മരിച്ച സംഭവത്തില് സംസ്ഥാന മനുഷ്യാവകാശ കമ്മീഷന് കേസെടുത്തു. വൈദ്യുതി പോസ്റ്റിലെ സ്റ്റേ വയറില് നിന്ന് ഷോക്കേറ്റ് ചെറുമുക്ക് വെസ്റ്റ് സ്വദേശി എറപ്പറമ്പന് ഷിഹാബുദ്ദീന്റെ മകന് ജുനൈദാണ് കഴിഞ്ഞ ദിവസം മരിച്ചത്. തിരൂരങ്ങാടി ഗവ. ഹയര്സെക്കന്ഡറി സ്കൂളില് ഒന്പതാം ക്ലാസ് വിദ്യാര്ത്ഥിയാണ്.
മലപ്പുറം ജില്ലാ കളക്ടറും കെ.എസ്.ഇ.ബി എക്സിക്യുട്ടീവ് എന്ജിനീയറും അപകടത്തിന്റെ കാരണം സമഗ്രമായി പരിശോധിച്ച് 15 ദിവസത്തിനകം റിപ്പോര്ട്ട് സമര്പ്പിക്കണമെന്ന് കമ്മീഷന് ജുഡീഷ്യല് അംഗം കെ. ബൈജുനാഥ് നിര്ദ്ദേശിച്ചു. ഡിസംബര് 3 ന് തിരൂര് പി.ഡബ്ല്യു.ഡി റസ്റ്റ് ഹൗസില് നടക്കുന്ന സിറ്റിംഗില് കേസ് പരിഗണിക്കും. മാദ്ധ്യമ വാര്ത്തയുടെ അടിസ്ഥാനത്തില് സ്വമേധയാ രജിസ്റ്റര് ചെയ്ത കേസിലാണ് കമ്മിഷന്റെ ഉത്തരവ്.
ചെറുമുക്ക് വെസ്റ്റിലെ ആമ്പല്പ്പാടത്ത് കൃഷി ആവശ്യത്തിനായി ട്രാക്ടര് ഉപയോഗിച്ച് നിലമൊരുക്കുന്നത് കാണാന് നാല് സുഹൃത്തുക്കള്ക്കൊപ്പം എത്തിയതായിരുന്നു ജുനൈദ്. ഇതിനിടെ വയലില് കാല്വഴുതി വീണ ജുനൈദ് സമീപത്തെ വൈദ്യുതി പോസ്റ്റിന്റെ സ്റ്റേ കമ്പിയില് പിടിച്ചു. വൈദ്യുതി ലൈനില് തട്ടിനിന്നിരുന്ന സ്റ്റേ കമ്പിയില് നിന്ന് ഷോക്കേല്ക്കുകയായിരുന്നു. നാട്ടുകാര് ഉടന് തിരൂരങ്ങാടി താലൂക്ക് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
https://www.facebook.com/Malayalivartha

























