നിയമസഭാ തിരഞ്ഞെടുപ്പില്‍ മലമ്പുഴയില്‍ പ്രതിപക്ഷ നേതാവ് വി.എസ്.അച്യുതാനന്ദനെതിരെ കെഎസ്‌യു സംസ്ഥാന പ്രസിഡന്റ് വി.എസ്.ജോയ് മല്‍സരിക്കും. എഐസിസിയുടെ സ്‌ക്രീനിങ് കമ്മിറ്റിയില്‍ ഏകദേശ ധാരണയായതായി സൂചന. ഏതാണ്ട് 50 സീറ്റുകളിലാണ് ധാരണയായത്. 36 സീറ്റുകളില്‍ ധാരണയാകാനുണ്ട്. 15 സീറ്റുകളില്‍ കടുത്ത തര്‍ക്കമാണ് നടന്നത്.

അതേസമയം, സ്ഥാനാര്‍ഥി നിര്‍ണയത്തില്‍ മുഖ്യമന്ത്രി ഉമ്മന്‍ ചാണ്ടിക്ക് അതൃപ്തിയെന്നും സൂചനകളുണ്ട്. സ്‌ക്രീനിങ് കമ്മിറ്റി അവസാനിക്കുന്നതിനു മുന്‍പ് ഉമ്മന്‍ ചാണ്ടി കേരള ഹൗസിലേക്ക് മടങ്ങി.

തന്റെ പേര് സാധ്യതാ പട്ടികയിലില്ലെന്ന് കെപിസിസി പ്രസിഡന്റ് വി.എം.സുധീരന്‍ പറഞ്ഞു. സ്ഥാനാര്‍ഥി നിര്‍ണയത്തില്‍ എഐസിസിയുടെ സ്‌ക്രീനിങ് കമ്മിറ്റി മറ്റന്നാള്‍ തുടരും. തിരഞ്ഞെടുപ്പ് സമിതി യോഗവും മറ്റന്നാള്‍ ചേരും. തര്‍ക്കങ്ങളല്ല, സൂഷ്മ പരിശോധനയാണ് നടക്കുന്നത്. പല പേരുകള്‍ പരിഗണിക്കുക സ്വാഭാവികം. ഇല്ലാത്ത ഒരുപാട് കാര്യങ്ങള്‍ മാധ്യമങ്ങള്‍ പ്രചരിപ്പിക്കുന്നുവെന്നും സുധീരന്‍ പറഞ്ഞു.

എഐസിസി സ്‌ക്രീനിങ് കമ്മിറ്റിയില്‍ തൃപ്പൂണിത്തുറ, തൃക്കാക്കര, ഇരിക്കൂര്‍, കോന്നി, പാറശാല സീറ്റുകളില്‍ തര്‍ക്കം നിലനില്‍ക്കുന്നു. അഞ്ചിടത്തും പുതിയ സ്ഥാനാര്‍ഥികളെ കെപിസിസി പ്രസിഡന്റ് വി.എം.സുധീരന്‍ നിര്‍ദേശിച്ചിരുന്നു. തൃശൂരില്‍ പത്മജ വേണുഗോപാലടക്കം മൂന്നുപേരെയാണ് പരിഗണിക്കുന്നത്. അതേസമയം, നിലമ്പൂരില്‍ ആര്യാടന്‍ മുഹമ്മദ് മല്‍സരിക്കുന്നില്ലെന്ന് അറിയിച്ചതിനാല്‍ സ്ഥാനാര്‍ഥിയെ ഹൈക്കമാന്‍ഡ് തീരുമാനിക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha