പൊലീസ് കസ്റ്റഡിയിൽ വിട്ട രാഹുൽ മാങ്കൂട്ടത്തിൽ എംഎൽഎയുമായി തിരുവല്ല ക്ലബ് 7 ഹോട്ടലിൽ തെളിവെടുപ്പ് നടത്തി പ്രത്യേക അന്വേഷണ സംഘം...

പത്തനംതിട്ട എ ആർ ക്യാംപിൽ നിന്നും രാവിലെ ആറു മണിക്കാണ് രാഹുലുമായി എസ്‌ഐടി സംഘം തെളിവെടുപ്പിന് പുറപ്പെട്ടത്. അരമണിക്കൂറോളം തെളിവെടുപ്പ് നടത്തി. ശേഷം തിരികെ എആർ ക്യാമ്പിലേക്ക് കൊണ്ടുപോയി. പാലക്കാട്ടെ തെളിവെടുപ്പിൽ തീരുമാനം പിന്നീട് ആയിരിക്കും.

അതേസമയം പോലീസ് വൻ സുരക്ഷാ സന്നാഹം ഒരുക്കിയിരുന്നു. കഴിഞ്ഞദിവസമാണ് കോടതി രാഹുൽ മാങ്കൂട്ടത്തിലിനെ മൂന്നു ദിവസത്തെ പൊലീസ് കസ്റ്റഡിയിൽ വിട്ടു കൊടുത്തത്. രാഹുലിന്റെ വീട്ടിലും, പാലക്കാട് എത്തിച്ചും തെളിവെടുപ്പു നടത്തിയേക്കുമെന്ന് റിപ്പോർട്ടുണ്ട്. അന്വേഷണത്തോട് രാഹുൽ സഹകരിക്കുന്നില്ലെന്ന് എസ്‌ഐടി കോടതിയിൽ അറിയിച്ചിരുന്നു.

രാഹുൽ മാങ്കൂട്ടത്തിൽ ഉപയോഗിച്ച മൊബൈൽ ഫോൺ പൊലീസ് കണ്ടെടുത്തിരുന്നു. രാഹുലിനെ അറസ്റ്റ് ചെയ്ത പാലക്കാട് കെപിഎം ഹോട്ടലിൽ നിന്നാണ് ഫോൺ കണ്ടെത്തിയത്. നിർണായക വിവരങ്ങൾ ഫോണിൽ ഉണ്ടെന്നാണ് കേസ് അന്വേഷിക്കുന്ന പ്രത്യേക അന്വേഷകസംഘത്തിന്റെ നിഗമനം. ഫോൺ ശാസ്ത്രീയ പരിശോധനയ്ക്ക് വിധേയമാക്കും. മൂന്നാമത്തെ ബലാത്സംഗക്കേസിൽ ശനി രാത്രി 12.30ഓടെയാണ് പാലക്കാട്ടെ കെപിഎം ഹോട്ടലിൽനിന്ന് രാഹുലിനെ പൊലീസ് കസ്റ്റഡിയിലെടുത്തത്.