രാഹുല് മാങ്കൂട്ടത്തിലിനെ എംഎല്എ സ്ഥാനത്ത് നിന്ന് അയോഗ്യനാക്കണമെങ്കില് നിയമസഭാംഗം പരാതി നല്കേണ്ടതുണ്ടെന്ന് സ്പീക്കര്
രാഹുല് മാങ്കൂട്ടത്തിലിനെതിരെ സ്വകാര്യ പരാതികള് ലഭിച്ചിട്ടുണ്ടെന്നും എംഎല്എ സ്ഥാനത്ത് നിന്ന് അയോഗ്യനാക്കണമെങ്കില് ഒരു നിയമസഭാംഗമെങ്കിലും പരാതി നല്കേണ്ടതുണ്ടെന്ന് സ്പീക്കര് എഎന് ഷംസീര്. പ്രിവിലേജസ് ആന്റ് എത്തിക്സ് കമ്മിറ്റിക്ക് പരാതി കൈമാറണമെങ്കില് നിയമസഭാംഗങ്ങളില് ആരെങ്കിലും ഒരാള് പരാതി നല്കണമെന്നും അത്തരത്തിലൊരു പരാതി ഇതുവരെ ലഭിച്ചിട്ടില്ല. രാഹുല് മാങ്കൂട്ടത്തില് ബലാത്സംഗ കേസില് അറസ്റ്റിലായത് സഭയുടെ അന്തസിനെ ബാധിക്കില്ല. സഭയുടെ അന്തസിന് എങ്ങനെയാണ് ഇത് കളങ്കമാകുക? വ്യക്തികളല്ല സഭയുടെ അന്തസ് തീരുമാനിക്കുക. ഒരു കൊട്ടയിലെ ഒരു മാങ്ങ കെട്ടാല് എല്ലാം മോശമായി എന്ന് പറയാന് കഴിയില്ലലോ. സ്ത്രീകളെ ബഹുമാനിക്കാന് പഠിക്കണം, അല്ലെങ്കില് പഠിപ്പിക്കണം. ചില സാമാജികരുടെ ഭാഗത്ത് തെറ്റുണ്ടായാല് എല്ലാവരെയും മോശമാക്കരുതെന്നും ജനം നല്ല പെരുമാറ്റം പ്രതീക്ഷിക്കുന്നുണ്ടെന്നും എഎന് ഷംസീര് പറഞ്ഞു. വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
അറസ്റ്റിലായ രാഹുലിനെ ഇന്ന് തെളിവെടുപ്പിനെത്തിച്ചിരുന്നു. എന്നാല് മാധ്യമപ്രവര്ത്തകരുടെ ചോദ്യങ്ങളോട് രാഹുല് പ്രതികരിച്ചില്ല. ചിരിയോടെ അകത്തേക്ക് പോയ രാഹുല് മടങ്ങിയെത്തുമ്പോള് ഒന്നും മിണ്ടാതെ വാഹനത്തിലേക്ക് കയറുകയായിരുന്നു. തിരുവല്ലയിലെ സ്വകാര്യ ഹോട്ടലില് വച്ച് രാഹുല് പീഡിപ്പിച്ചു എന്നായിരുന്നു അതിജീവിതയുടെ പരാതി. പരാതിപ്രകാരം 2024 ഏപ്രില് എട്ടിനാണ് തിരുവല്ലയിലെ ഹോട്ടലിലേക്ക് വിളിച്ച് വരുത്തി പീഡിപ്പിച്ചത്. ഇന്ന് അതിരാവിലെയാണ് പത്തനംതിട്ട എആര് ക്യാമ്പില് നിന്നും രാഹുലിനെ ഹോട്ടല് മുറിയിലെത്തിച്ച് തെളിവെടുപ്പ് നടത്തിയത്. പ്രതിഷേധങ്ങള് ഒഴിവാക്കാനായിരുന്നു പുലര്ച്ചെ എത്തിയത്.
പൊലീസ് ബസില് കനത്ത സുരക്ഷയോടെയാണ് രാഹുലിനെ ഹോട്ടലിലെത്തിച്ചത്. തെളിവെടുപ്പ് പൂര്ത്തിയാക്കിയ ശേഷം രാഹുല് മാങ്കൂട്ടത്തിലിനെ തിരികെ പത്തനംതിട്ട എആര് ക്യാമ്പിലേക്ക് തിരിച്ചെത്തിച്ചു. രാഹുലിനെ കസ്റ്റിയില് വിട്ടു കിട്ടി രണ്ടാം ദിനമായ ഇന്നും രാഹുലിനെ വിശദമായി എസ്ഐടി ചോദ്യം ചെയ്യും. പാലക്കാട് എത്തിച്ച് തെളിവെടുപ്പ് നടത്തുന്ന തീരുമാനം പിന്നീട് തീരുമാനിക്കും. 15ന് വൈകിട്ടാണ് രാഹുലിനെ തിരികെ കോടതിയില് ഹാജരാക്കേണ്ടത്. മറ്റന്നാള് കോടതി രാഹുലിന്റെ ജാമ്യാക്ഷേ പരിഗണിക്കും.
https://www.facebook.com/Malayalivartha
