കോപ്പിയടിച്ച് പിടിക്കപ്പെട്ടത് 25 എംബിബിഎസ് വിദ്യാർഥികൾ! കോഴിക്കോട് മെഡിക്കൽ കോളേജിൽ കൂട്ടക്കോപ്പിയടി, സിസിടിവി ദൃശ്യങ്ങൾ പരിശോധിച്ചപ്പോൾ പുറത്തുവന്നത് ഞെട്ടിക്കുന്ന ക്രമക്കേട്!

ഡോക്ടർമാരാകാൻ പഠിക്കുന്നവർ തന്നെ പരീക്ഷയിൽ കൂട്ടത്തോടെ കോപ്പിയടിച്ചാലോ? കോഴിക്കോട് ഗവൺമെന്റ് മെഡിക്കൽ കോളേജിൽ നടന്ന സംഭവം കേട്ടാൽ ആരും ഞെട്ടും. ഒരാളോ രണ്ടാളോ അല്ല, എംബിബിഎസ് അവസാന വർഷ പരീക്ഷയിൽ കൂട്ടത്തോടെ കോപ്പിയടിച്ച 25 വിദ്യാർഥികളാണ് പിടിയിലായത്. പരീക്ഷാഹാളിലെ സിസിടിവി ദൃശ്യങ്ങൾ പരിശോധിച്ചതോടെയാണ് സംഭവം പുറത്തുവന്നത്. ഇതോടെ കുറ്റക്കാരെന്ന് കണ്ടെത്തിയ വിദ്യാർഥികളുടെ പരീക്ഷ തന്നെ സർവകലാശാല റദ്ദാക്കി.
കഴിഞ്ഞ ജൂലൈയിൽ കേരള ആരോഗ്യ സർവകലാശാല നടത്തിയ എംബിബിഎസ് അവസാന വർഷ പരീക്ഷയിലാണ് സംഭവം. പരീക്ഷാഹാളിലെ ദൃശ്യങ്ങൾ പരിശോധിച്ച സർവകലാശാല 32 വിദ്യാർഥികളെയും അന്ന് ഇൻവിജിലേറ്റർ ഡ്യൂട്ടിയിലുണ്ടായിരുന്ന അധ്യാപകരെയും അച്ചടക്ക സമിതിക്കു മുന്നിൽ വിളിച്ചുവരുത്തി. വിശദമായ തെളിവെടുപ്പിനുശേഷം 25 വിദ്യാർഥികൾക്കെതിരെയാണ് നടപടി സ്വീകരിച്ചത്. ഇവരുടെ ജനറൽ മെഡിസിൻ പരീക്ഷ അസാധുവാക്കി. അടുത്ത അവസരത്തിൽ വീണ്ടും പരീക്ഷ എഴുതണമെന്നായിരുന്നു നിർദേശം. ഇതനുസരിച്ച് തിയറി പരീക്ഷ കഴിഞ്ഞ ദിവസം വീണ്ടും നടത്തി. ക്ലിനിക്കൽ പരീക്ഷയുടെ തീയതി പിന്നീട് അറിയിക്കും.
ഇതിനിടയിൽ മൊബൈൽ ഫോൺ ഉപയോഗിച്ച് കോപ്പിയടിക്കാൻ ശ്രമിച്ച മറ്റൊരു വിദ്യാർഥിക്കെതിരെയും കടുത്ത നടപടിയെടുത്തു. ഒരു വർഷത്തേക്ക് പരീക്ഷ എഴുതുന്നതിൽനിന്ന് വിലക്കാണ് ഏർപ്പെടുത്തിയിരിക്കുന്നത്. അന്ന് പരീക്ഷാ ചുമതലയിലുണ്ടായിരുന്ന അധ്യാപകരെയും സർവകലാശാല ശാസിച്ചു. വിദ്യാർഥികൾക്കെതിരായ നടപടിയിൽ പ്രതിഷേധിച്ച് വിദ്യാർഥി സംഘടനയുടെ പേരിൽ വാട്സാപ്പ് ഗ്രൂപ്പിൽ വന്ന കുറിപ്പിലൂടെയാണ് സംഭവം പുറംലോകമറിഞ്ഞത്. മികച്ച നിലവാരം പുലർത്തുന്ന സർക്കാർ മെഡിക്കൽ കോളേജിൽ ഇത്രയധികം വിദ്യാർഥികൾ ഒരുമിച്ച് കോപ്പിയടിക്ക് പിടിക്കപ്പെട്ടത് വലിയ ചർച്ചയായിരിക്കുകയാണ്. നാളെയുടെ ഡോക്ടർമാരാകേണ്ടവർ പരീക്ഷയിൽ തന്നെ ഇത്തരമൊരു ക്രമക്കേടിൽ ഉൾപ്പെട്ടത് മെഡിക്കൽ വിദ്യാഭ്യാസ രംഗത്തെ അച്ചടക്കത്തെക്കുറിച്ചും ഗൗരവമായ ചോദ്യങ്ങളാണ് ഉയർത്തുന്നത്.
https://www.facebook.com/Malayalivartha

























