അച്ഛാ, എന്നെ തല്ലല്ലേ അച്ഛാ, എനിക്ക് പേടിയാണ് അച്ഛാ ...! ഹൃദയം നുറുങ്ങുന്ന വേദനയോടെയാണ് ആ പാവം കുഞ്ഞിന്റെ ശരീരം ഏറ്റുവാങ്ങിയ താണ്ഡവത്തിന്റെ വീഡിയോ കണ്ടത്; പതിമൂന്ന് വയസ്സുള്ള കുട്ടിയെ രണ്ടാനച്ഛൻ ക്രൂരമായി മർദ്ദിച്ചതിൽ പ്രതികരിച്ച് അഞ്ജു പാർവതി പ്രഭീഷ്

കൊല്ലം ചടയമംഗലത്ത് പതിമൂന്ന് വയസ്സുള്ള കുട്ടിയെ രണ്ടാനച്ഛൻ ക്രൂരമായി മർദ്ദിച്ച വാർത്തയിൽ പ്രതികരിച്ച് അഞ്ജു പാർവതി പ്രഭീഷ്. ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ;-
അച്ഛാ, എന്നെ തല്ലല്ലേ അച്ഛാ, എനിക്ക് പേടിയാണ് അച്ഛാ !! ഹൃദയം നുറുങ്ങുന്ന വേദനയോടെയാണ് ആ പാവം കുഞ്ഞിന്റെ ശരീരം ഏറ്റുവാങ്ങിയ താണ്ഡവത്തിന്റെ വീഡിയോ കണ്ടത്. അവന്റെ ശരീരം ഏറ്റുവാങ്ങിയ നോവിന്റെ ആയിരം മടങ്ങ് നോവും ആഘാതവും മുറിവും പേടിയും ആ മോന്റെ മനസ്സിന് എന്നേ ഉണ്ടായി കാണണം.
അത് ഒരുപക്ഷേ അവന്റെ രണ്ടാനച്ഛൻ എന്ന പിശാച് നല്കിയ മുറിവ് അല്ല, മറിച്ച് താൻ ഏറ്റുവാങ്ങുന്ന ഓരോ താഡനവും കണ്ടിട്ടും നിശബ്ദതയുടെ പുതപ്പ് അന്നേ വരെ വാരിയണിയേണ്ടി വന്ന പെറ്റ തള്ളയുടെ നിസ്സഹായവസ്ഥ കണ്ടും കേട്ടും കൂടി ആയിരിക്കും. അവന്റെ മനസ്സിന് ഏറ്റ ആഴത്തിൽ ഉള്ള മുറിവ് എത്രനാൾ എടുത്തായിരിക്കും ഇനി ഒന്ന് ഉണങ്ങുക? പാവം. ഈ ലോകത്തിലെ ഏറ്റവും വലിയ നോവ് അരക്ഷിതാവസ്ഥയിൽ, ഭയത്തിൽ ഒക്കെ ജീവിക്കേണ്ടി വരുന്ന കുഞ്ഞുങ്ങളുടെ അവസ്ഥയാണ്.
കൊല്ലം ചടയമംഗലത്ത് പതിമൂന്ന് വയസ്സുള്ള കുട്ടിയെ രണ്ടാനച്ഛൻ ക്രൂരമായി മർദ്ദിച്ച വാർത്ത അറിഞ്ഞപ്പോൾ, ആ വീഡിയോ കണ്ടപ്പോൾ വെറുപ്പും അമർഷവും നുരഞ്ഞുപൊന്തുന്നത് ആ എരണം കെട്ട അവനോട് മാത്രമല്ല മറിച്ച് അമ്മ എന്ന ആ സ്ത്രീയോടും കൂടിയാണ്. കൂടെ കഴിയുന്നവർക്കേ രാപ്പനി അറിയൂ എന്ന് പറയുന്നത് പോലെ ആ പിശാചിന്റെ ഒപ്പം പൊറുത്ത അവർക്ക് അറിയരുതോ ആ മൃഗത്തിന്റെ തനികൊണം.
സ്വന്തം കുഞ്ഞിനോട് എവിടെ നിന്നോ വന്ന ഒരുത്തന് ഇഷ്ടം ഇല്ലെന്ന് അറിയുന്ന അന്ന് നിറുത്തണമായിരുന്നു അവന്റെ കൂടെയുള്ള പൊറുതി. സ്വന്തം അരിശം പിള്ളേരുടെ ദേഹത്ത് തീർക്കുന്നവനോ അവളോ ഒരു തരത്തിലും മാപ്പ് അർഹിക്കുന്നില്ല. സംരക്ഷിക്കേണ്ട കരങ്ങൾ തന്നെ സംഹാരകർ ആവുമ്പോൾ ഈ കുട്ടികൾ എങ്ങോട്ടാണ് ഓടി പോകേണ്ടത്?
ഇനി ഈ പരമ ദ്രോഹി നേരെ ചൊവ്വേ എണീറ്റ് നടക്കരുത്. അമ്മാതിരി ചികിത്സ വേണം കേരള പോലീസ് കൊടുക്കേണ്ടത്. ഇവന്റെ ഒക്കെ നേർക്ക് മനുഷ്യാവകാശം , മനുഷ്യത്വം ഒന്നും കാണിക്കേണ്ട കാര്യമില്ല. ആ മോന് ചോദിക്കാനും പറയാനും ആരുമില്ല എന്ന ധൈര്യത്തിൽ അല്ലേ അവൻ ആ കുഞ്ഞിനെ ഇങ്ങനെ തല്ലി ചതച്ചത്. വല്ലാത്തൊരു അധീശ ബോധത്തിന്റെ പുറത്താണ് അവന് അങ്ങനെ ചെയ്യാനുള്ള മനസ്സ് ഉണ്ടായത്.
പക്ഷേ അവന് അറിയില്ല ഈ സ്റ്റേറ്റിന് പതിമൂന്ന് വയസ്സ് ഉള്ള കുട്ടിക്ക് മേലുള്ള അവകാശം. പ്രായപൂർത്തിയാവും വരെ സ്വന്തം വീട്ടിൽ പീഡനങ്ങളും അവഗണനയും നേരിടുന്ന കുട്ടികളുടെ നിയമപരമായ രക്ഷാകർത്താവാണ് സ്റ്റേറ്റ്. ഇനി അവൻ അറിഞ്ഞോളും കാര്യങ്ങൾ. പറ്റിയാൽ നാട്ടുകാർ തന്നെ മുന്നിട്ടിറങ്ങി ഇത്തരം കാടന്മാരെ ഒറ്റപ്പെടുത്തുക, നിലയ്ക്ക് നിറുത്തുക. ഇത് എഴുതുമ്പോഴും ആ കുഞ്ഞിന്റെ കരച്ചിൽ കാതിൽ മുഴങ്ങുന്നുണ്ട്. എത്രയും വേഗം സ്റ്റേറ്റ് ആ കുഞ്ഞിന് വേണ്ട സംരക്ഷണം നല്കുക.
https://www.facebook.com/Malayalivartha

























