ഇമിഗ്രേഷൻ ഉദ്യോഗസ്ഥനെതിരെ പരാതി... ലൈംഗികബന്ധത്തിന് വഴങ്ങിയാൽ ഗ്രീൻ കാർഡ് നൽകാമെന്ന് വാഗ്ദാനം; ഭർത്താവിനെ നാടുകടത്തുമെന്ന് ഭീഷണി, അമേരിക്കൻ ഇമിഗ്രേഷൻ ഉദ്യോഗസ്ഥനെതിരെ 21കാരിയുടെ ഗുരുതര വെളിപ്പെടുത്തൽ

അമേരിക്കയിൽ ഗ്രീൻ കാർഡ് ലഭിക്കുമെന്ന പ്രതീക്ഷയിൽ കഴിയുന്നവർക്ക് മുന്നിൽ അധികാരവും നിയമസംവിധാനവും ഉപയോഗിച്ച് ചൂഷണം നടത്താൻ ശ്രമിച്ചെന്ന ഗുരുതര ആരോപണം. ലൈംഗികബന്ധത്തിന് തയ്യാറായാൽ ഗ്രീൻ കാർഡ് തരാമെന്ന് വാഗ്ദാനം ചെയ്തു. വഴങ്ങിയില്ലെങ്കിൽ ഭർത്താവിനെ ജയിലിലടയ്ക്കുമെന്നും നാടുകടത്തുമെന്നും ഭീഷണിപ്പെടുത്തി. അമേരിക്കയിലെ ഇമിഗ്രേഷൻ തടങ്കൽ കേന്ദ്രത്തിൽവെച്ച് ലൈംഗികാതിക്രമത്തിന് ഇരയായെന്നാണ് 21 വയസ്സുകാരിയായ ലബനീസ് യുവതിയുടെ വെളിപ്പെടുത്തൽ. അമേരിക്കൻ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് വിഭാഗത്തിലെ ഉദ്യോഗസ്ഥനെതിരെയാണ് യുവതി രംഗത്തെത്തിയിരിക്കുന്നത്. എന്നാൽ ആരോപണങ്ങൾ അമേരിക്കൻ ആഭ്യന്തര സുരക്ഷാ വകുപ്പ് പൂർണമായും നിഷേധിച്ചിട്ടുണ്ട്.
റഹഫ് അലി അൽമെർഹിജ് എന്നാണ് യുവതിയുടെ പേര്. ലൂസി വൈസ് എന്ന പേരിലും അറിയപ്പെടുന്ന യുവതി, ടെക്സസിലെ റെയ്മണ്ട്വില്ലിലുള്ള എൽ വാലെ ഡിറ്റൻഷൻ ഫെസിലിറ്റിയിൽ തടവിൽ കഴിയുമ്പോഴാണ് അതിക്രമം നേരിട്ടതെന്നാണ് ആരോപണം. ഐസിഇയിലെ ഡിപോർട്ടേഷൻ ഓഫീസറായ മാർക്കെൽ വാലസിനെതിരെയാണ് പരാതി. ന്യൂസ്വീക്കിന് നൽകിയ അഭിമുഖത്തിലും അമേരിക്കൻ ആഭ്യന്തര സുരക്ഷാ വകുപ്പിന്റെ ഇൻസ്പെക്ടർ ജനറലിന് നൽകിയ സത്യവാങ്മൂലത്തിലുമാണ് യുവതി വിശദാംശങ്ങൾ വെളിപ്പെടുത്തിയത്.
അമേരിക്കൻ അധികൃതരുടെ കണക്കനുസരിച്ച് 2024 ഓഗസ്റ്റിൽ മോൺട്രിയലിൽനിന്ന് അനധികൃതമായി യുഎസിലേക്ക് പ്രവേശിച്ച യുവതിയെ 2026 ഫെബ്രുവരി 19ന് റിയോ ഗ്രാൻഡെ വാലിക്ക് സമീപത്തുവെച്ചാണ് ബോർഡർ പട്രോൾ അറസ്റ്റ് ചെയ്തത്. ഇമിഗ്രേഷൻ കേസിൽ നിയമനടപടികൾ നേരിടുന്നതിനിടെ 2026 ഏപ്രിലിൽ യുവതിയുടെ അഭിഭാഷകൻ കേസിൽനിന്ന് പിന്മാറി. ഇതോടെ നിയമസഹായമില്ലാത്ത അവസ്ഥയിലായി യുവതി.
ഈ സാഹചര്യം ഉദ്യോഗസ്ഥൻ മുതലെടുത്തെന്നാണ് ആരോപണം. കേസുമായി ബന്ധപ്പെട്ട് മറ്റ് അന്വേഷണ ഉദ്യോഗസ്ഥരെ കാണുന്നതിന് മുന്നോടിയായി സംസാരിക്കാനുണ്ടെന്ന് പറഞ്ഞ് വാലസ് യുവതിയെ വിളിച്ചുവരുത്തി. പിന്നീട് മറ്റുള്ളവരിൽനിന്ന് അകന്നുകിടക്കുന്ന ചെറിയ മുറിയിലേക്ക് കൊണ്ടുപോയി. അവിടെവെച്ച് തന്റെ സമ്മതമില്ലാതെ ലൈംഗികമായി അതിക്രമിച്ചെന്നാണ് യുവതിയുടെ സത്യവാങ്മൂലത്തിലെ വെളിപ്പെടുത്തൽ.
എതിർക്കുകയും നിർത്താൻ ആവശ്യപ്പെടുകയും ചെയ്തിട്ടും ഉദ്യോഗസ്ഥൻ പിന്മാറിയില്ലെന്നാണ് യുവതി പറയുന്നത്. താൻ ഒരു തടവുകാരിയായിരുന്നു. തന്റെ ഇമിഗ്രേഷൻ കേസ്, മോചനം, ചികിത്സ എന്നിവയെല്ലാം സ്വാധീനിക്കാൻ കഴിയുന്ന അധികാരിയായിരുന്നു അയാൾ. അതുകൊണ്ടുതന്നെ മുറിയിൽനിന്ന് ഇറങ്ങിപ്പോകാനോ അയാളുടെ ആവശ്യങ്ങളെ എതിർത്ത് സുരക്ഷിതമായി മാറിനിൽക്കാനോ തനിക്ക് കഴിയുമായിരുന്നില്ലെന്നും യുവതി പറയുന്നു.
ഇതിനിടെ ഉദ്യോഗസ്ഥൻ പറഞ്ഞതായും യുവതി വെളിപ്പെടുത്തിയ വാക്കുകളാണ് കേസിൽ കൂടുതൽ ഞെട്ടലുണ്ടാക്കുന്നത്. ''ഞാൻ നിനക്ക് ഗ്രീൻ കാർഡ് നൽകാം. നിന്റെ ഭർത്താവ് പ്രായമുള്ളയാളാണ്. നിനക്ക് സഹായം ചെയ്യാൻ അയാൾക്ക് കഴിയില്ല. നിന്നെ സഹായിക്കാൻ കഴിയുന്നത് എനിക്ക് മാത്രമാണ്'' എന്നായിരുന്നു ഉദ്യോഗസ്ഥന്റെ വാക്കുകളെന്നാണ് ആരോപണം. തന്റെ ആവശ്യങ്ങൾക്ക് വഴങ്ങിയില്ലെങ്കിൽ ഭർത്താവിനെ ജയിലിലടയ്ക്കുകയും നാടുകടത്തുകയും ചെയ്യുമെന്ന് ഭീഷണിപ്പെടുത്തിയതായും യുവതി പറയുന്നു.
അതിക്രമത്തിന് ശേഷം ഉദ്യോഗസ്ഥൻ സ്വന്തം ഫോൺ നമ്പർ നൽകിയെന്നും മനസ്സ് മാറുകയാണെങ്കിൽ മെക്സിക്കോയിലേക്ക് വരാമെന്ന് വാഗ്ദാനം ചെയ്തെന്നും യുവതി സത്യവാങ്മൂലത്തിൽ ആരോപിച്ചിട്ടുണ്ട്. തടങ്കൽ കേന്ദ്രത്തിൽനിന്ന് പുറത്തുവന്ന ശേഷവും മാസങ്ങളോളം ഇക്കാര്യം ഭർത്താവിനോട് വെളിപ്പെടുത്താൻ തനിക്ക് കഴിഞ്ഞില്ലെന്നാണ് യുവതിയുടെ വെളിപ്പെടുത്തൽ. കുറ്റപ്പെടുത്തപ്പെടുമെന്നോ ഭർത്താവ് തന്നെ ഉപേക്ഷിക്കുമെന്നോ ഭയന്നാണ് മൗനം പാലിച്ചതെന്ന് ഭർത്താവ് സാം വൈസ് പറയുന്നു.
ഭാര്യ നേരിട്ട ദുരനുഭവം ഓഗസ്റ്റ് അവസാനത്തോടെയാണ് അറിഞ്ഞതെന്നും അവരെ സംരക്ഷിക്കാൻ കഴിയാതിരുന്നതിൽ വലിയ വേദനയുണ്ടെന്നും അദ്ദേഹം പ്രതികരിച്ചു. ഭാര്യയെ താൻ ഒരിക്കലും ഉപേക്ഷിക്കില്ലെന്നും അദ്ദേഹം വ്യക്തമാക്കി.
അതേസമയം, പരാതി വെറും വാക്കാലുള്ള ആരോപണത്തിൽ ഒതുങ്ങുന്നതല്ലെന്നാണ് പുറത്തുവരുന്ന മറ്റൊരു വിവരം. ഒക്ടോബർ ഒൻപതിന് യുവതിയുടെ ഭർത്താവ് അമേരിക്കൻ ആഭ്യന്തര സുരക്ഷാ വകുപ്പിന്റെയും ഐസിഇയുടെയും നാല് മേൽനോട്ട വിഭാഗങ്ങൾക്ക് ലൈംഗികാതിക്രമം സംബന്ധിച്ച പരാതികൾ നൽകിയെന്നാണ് റിപ്പോർട്ട്. ഒക്ടോബർ പത്തിന് യുവതി സത്യവാങ്മൂലവും സമർപ്പിച്ചു. തടങ്കലിൽ കഴിയുമ്പോൾ എഴുതിയ 59 പേജുള്ള കൈയെഴുത്ത് ഡയറിയും ഒക്ടോബർ 23ന് അന്വേഷണ ഉദ്യോഗസ്ഥർക്ക് കൈമാറിയതായി റിപ്പോർട്ടുകളുണ്ട്.
മെയ് ഒന്നിനാണ് യുവതിക്ക് അമേരിക്കയിൽനിന്ന് സ്വമേധയാ മടങ്ങാനുള്ള അനുമതി ലഭിച്ചത്. തുടർന്ന് രാജ്യം വിട്ട യുവതി ഇപ്പോൾ മെക്സിക്കോയിലാണ് താമസിക്കുന്നത്. ഭർത്താവ് ടെക്സസിൽ തുടരുകയാണ്. നേരത്തെ ടെക്സസ് എ ആൻഡ് എം സർവകലാശാലയിൽ നഴ്സിങ് പഠനം നടത്തിയിരുന്ന യുവതി ഭർത്താവിന്റെ ഡെന്റൽ ക്ലിനിക്കിൽ ജനറൽ മാനേജറായും ജോലി ചെയ്തിരുന്നു.
എന്നാൽ ആരോപണങ്ങൾ അമേരിക്കൻ അധികൃതർ പൂർണമായും നിഷേധിക്കുകയാണ്. ഐസിഇയുടെ മാതൃസ്ഥാപനമായ ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റിയുടെ വക്താവ് എൽ വാലെ തടങ്കൽ കേന്ദ്രത്തിൽ ഉദ്യോഗസ്ഥരുടെ ഭാഗത്തുനിന്ന് മോശം പെരുമാറ്റമുണ്ടായെന്ന ആരോപണങ്ങൾ തെറ്റാണെന്ന് വ്യക്തമാക്കി. ഇത്തരം പരാതികൾ അതീവ ഗൗരവത്തോടെയാണ് കാണുന്നതെന്നും അന്വേഷിച്ച് തെളിയിക്കപ്പെടുന്ന സംഭവങ്ങളിൽ ഉചിതമായ നടപടി സ്വീകരിക്കുമെന്നും അധികൃതർ അറിയിച്ചു.
ഉദ്യോഗസ്ഥന്റെ ഭാഗത്തുനിന്ന് കുറ്റം നടന്നതായി ഇതുവരെ ഔദ്യോഗികമായി സ്ഥിരീകരിച്ചിട്ടില്ല. ആരോപണങ്ങൾ സ്വതന്ത്രമായി സ്ഥിരീകരിക്കാൻ കഴിഞ്ഞിട്ടില്ലെന്ന് വാർത്ത പുറത്തുകൊണ്ടുവന്ന ന്യൂസ്വീക്കും വ്യക്തമാക്കിയിട്ടുണ്ട്. അതിനാൽ യുവതിയുടെ വെളിപ്പെടുത്തലുകളും അധികൃതരുടെ നിഷേധവും ഒരുപോലെ പ്രധാനമാണ്.
അമേരിക്കയിൽ നിയമപരമായ താമസാനുമതിക്കായി കാത്തിരിക്കുന്ന ഒരു യുവതിക്ക്, തന്നെ സംരക്ഷിക്കേണ്ട സംവിധാനത്തിനുള്ളിൽനിന്നുതന്നെ ഇത്തരമൊരു ദുരനുഭവം ഉണ്ടായെന്ന ആരോപണമാണ് ഇപ്പോൾ വലിയ ചർച്ചയാകുന്നത്. അധികാരവും കുടിയേറ്റക്കാരുടെ നിസ്സഹായാവസ്ഥയും ചൂഷണത്തിനുള്ള ഉപാധിയാകുന്നുണ്ടോ എന്ന ഗൗരവമായ ചോദ്യവും ഈ സംഭവം ഉയർത്തുന്നു.
https://www.facebook.com/Malayalivartha

























