വാഹനാപകടങ്ങൾ ഒഴിവാക്കാൻ വേണ്ടി ഉദ്യോ​ഗസ്ഥർ നൽകുന്ന നിർദ്ദേശങ്ങളിൽ ഏറ്റവും പ്രധാനപ്പെട്ട ഒന്നാണ് വാഹനമോടിക്കുന്ന സമയത്ത് എന്തെങ്കിലും ശാരീരിക അസ്വസ്ഥതകൾ തോന്നിയാൽ അൽപ്പം വിശ്രമിക്കുക എന്നത്. അത് വാഹനമോടിക്കുന്ന ആൾക്കും ആ വഴിയെ കടന്ന് പോകുന്ന മറ്റുള്ളവരുടെ സുരക്ഷയ്ക്കും വേണ്ടി പറയുന്നതാണ്. എന്നാൽ ഇത്തരം കാര്യങ്ങൾ മറന്ന് വാഹനമോടിക്കുന്നത് വലിയ അപകടമുണ്ടാക്കുമെന്നതിന്റെ ഏറ്റവും വലിയ വേദനിപ്പിക്കുന്ന ഉദാഹരണമാണ് ഇന്ന് കവടിയാറിൽ ഉണ്ടായിരിക്കുന്ന വാഹനാപകടം.

ബിപി കുറഞ്ഞതായി തോന്നിയപ്പോൾ ബ്രേക്കിന് പകരം ക്ലച്ച് ചവിട്ടി പോയതാണ് എന്നാണ് കാർ ഡ്രൈവർ പറയുന്നത്. പക്ഷേ ആ തിരിച്ചറിവ് വരുന്നതിന് മിനിട്ടുകൾക്ക് മുമ്പേ 7 പേർ അപകടത്തിൽ പെട്ടുകഴിഞ്ഞിരുന്നു. പാലക്കാട് സ്വദേശിയായ നൗഷിക മരണപ്പെടുകയും ചെയ്തു. നിയന്ത്രണം വിട്ട കാർ കാൽനടയാത്രക്കാരെ ഇടിച്ച് തെറിപ്പിച്ച് മുന്നോട്ട് ചീറി പായുകയായിരുന്നു. ഇതിനിടെ എതിർ ദിശയിൽ നിന്നെത്തിയ കാറിലിടിച്ചതോടെയാണ് വലിയൊരു അപകടം ഒഴിവായത്.

കവടിയാറിൽ വാഹനങ്ങൾ കൂട്ടിയിടിച്ചുണ്ടായ അപകടം വളരെ വലുതെന്നാണ് കണ്ട് നിന്നവർ പറയുന്നത്. അപകടത്തിൽ ​ഗുരുതരമായി പരിക്കേറ്റ പാലക്കാട് സ്വദേശി നൗഷിക(24) ആണ് മരിച്ചത്. ഇവരുടെ ഭർത്താവ് ആഷിക്കിനും അപകടത്തിൽ പരിക്കേറ്റു. നൗഷികയെ പട്ടം എസ് യു ടി ആശുപത്രിയിലെത്തിച്ചെങ്കിലും മരണം സ്ഥിരീകരിച്ചു. ആഷിക് മറ്റൊരു ആശുപത്രിയിൽ ചികിത്സയിലാണ്. ഇരുവരും ഫുട്പാത്തിലൂടെ നടന്നു പോവുകയായിരുന്നുവെന്ന് ദൃക്സാക്ഷികൾ പറഞ്ഞു. ഇന്ന് 10.30 ഓടെയാണ് സംഭവം. അപകടത്തിനിടയാക്കിയ കാർ അമിതവേ​ഗത്തിൽ നിയന്ത്രണം തെറ്റി ഫുട്പാത്തിലേക്ക് പാഞ്ഞുകയറി മറ്റ് വാഹനങ്ങളിൽ ഇടിക്കുകയുമായിരുന്നു. അപടത്തിൽ ഏഴ് പേർക്ക് പരിക്കേറ്റെന്നാണ് പ്രാഥമിക വിവരം.