കേരളത്തില്‍ കോണ്‍ഗ്രസ് വിജയിച്ചിട്ട് ദിവസങ്ങള്‍ ആയെങ്കിലും മുഖ്യമന്ത്രി ആരാകുമെന്ന കാര്യത്തില്‍ ഇതുവരെ വ്യക്തത വന്നിട്ടില്ല. കെസി വേണുഗോപാലിന്റേയും വിഡി സതീശന്റേയും പേരുകളാണ് ഉയര്‍ന്ന് കേള്‍ക്കുന്നതെങ്കിലും ഒരു തീരുമാനം ഇതുവരെ വന്നിട്ടില്ല. തതവസരത്തില്‍ സിനിമാ മേഖലയില്‍ നിന്നുള്ളവരടക്കം മുഖ്യമന്ത്രി ആരാകണമെന്ന് പറഞ്ഞ് അഭിപ്രായങ്ങള്‍ പങ്കുവയ്ക്കുന്നുണ്ട്. എല്ലാവരും പറഞ്ഞത് വി ഡി സതീശന്റെ പേരാണ്. ഇപ്പോഴിതാ അദ്ദേഹത്തിന് തന്നെ പിന്തുണയുമായി എത്തിയിരിക്കുകയാണ് സംവിധായകന്‍ ജൂഡ് ആന്റണി ജോസഫ്.

വോട്ട് ചെയ്ത പൗരന്‍ എന്ന നിലക്ക് വി ഡി സതീശന്‍ മുഖ്യമന്ത്രിയായി വരണമെന്നാണ് അഭിപ്രായമെന്നും നൂറില്‍ കൂടുതല്‍ സീറ്റുകള്‍ നേടും എന്ന് ആത്മവിശ്വാസത്തോടെ പറഞ്ഞ നേതാവാണ് അദ്ദേഹമെന്നും ജൂഡ് ആന്റണി പറയുന്നു. സോഷ്യല്‍ മീഡിയയിലൂടെ ആയിരുന്നു സംവിധായകന്റെ പ്രതികരണം.

'നൂറില്‍ കൂടുതല്‍ സീറ്റുകള്‍ നേടും എന്ന് ആത്മവിശ്വാസത്തോടെ പറഞ്ഞ നേതാവ്, പുതിയ കുട്ടികള്‍ക്ക് മനസിലാകുന്ന ഭാഷയില്‍ സംസാരിക്കുന്ന പൊതുജന പ്രതിനിധി, മലയാളം ഇല്ലാത്ത നാട്ടില്‍ പോയാലും സാമാന്യം നല്ല കമ്മ്യൂണികേഷന്‍ സ്‌കില്‍ ഉള്ള വ്യക്തി. വോട്ട് ചെയ്ത പൗരന്‍ എന്ന നിലക്ക് മുഖ്യമന്ത്രി വി ഡി സതീശന്‍ സര്‍ തന്നെ വരണം എന്നാണ് എന്റെ അഭിപ്രായം. മേല്പറഞ്ഞ കാര്യങ്ങളില്‍ കഴിഞ്ഞ പത്തു വര്‍ഷം സംഭവിച്ചത് കംമ്പയര്‍ ചെയ്താല്‍ കാര്യം മനസിലാകും', എന്നാണ് ജൂഡ് പറഞ്ഞത്.

പിന്നാലെ നിരവധി പേരാണ് പ്രതികരണവുമായി രംഗത്ത് എത്തിയത്. 'മറിച്ചൊരു തീരുമാനം സര്‍വ്വനാശമായിരിക്കും. ജനങ്ങളാണ് ഹൈകമാന്‍ഡ്, ഞാന്‍ ഒരു ഇടതു പക്ഷ സഹചാരി ആണ്. ഒന്ന് കൂടി ഊന്നി പറഞ്ഞാല്‍ കട്ട ഇടതുപക്ഷക്കാരി.. എന്നാല്‍ ഇപ്പോളത്തെ തര്‍ക്കം കാണുമ്പോള്‍ വല്ലാത്ത വിഷമം ഉണ്ട്. മറ്റൊന്നും കൊണ്ടല്ല, യുദ്ധം നയിക്കുന്ന നേതാവിനെ മറി കടന്നു, കൊട്ടാരത്തില്‍ പട്ടു മേശയില്‍ ഇരുന്നുറങ്ങുന്ന നേതാവിന് കൂടുതല്‍ അനുയായികള്‍ എന്ന് കേള്‍ക്കുന്നതിലെ ഓചിത്യം മനസ്സിലാകുന്നില്ല. അര്‍ഹത പെട്ട ആള്‍ക്ക് തന്നേ മുഖ്യ മന്ത്രി പദം കിട്ടട്ടെ എന്ന് ആഗ്രഹിക്കുന്നു, അതാണ് ജനം ആഗ്രഹിക്കുന്നത്', എന്നിങ്ങനെ പോകുന്നു കമന്റുകള്‍. കെസി വേണുഗോപാലിനെ പിന്തുണച്ചും നിരവധി പേര്‍ കമന്റ് ചെയ്തിട്ടുണ്ട്.