മാനസിക വെല്ലുവിളി നേരിടുന്ന സ്ത്രീയെ പോലും വെറുതെ വിട്ടില്ല.കൊല്ലത്ത് ട്രെയിനിനുള്ളിൽ ആറു വയസ്സുകാരി പീഡനത്തിനിരയായ വാർത്തയുടെ ഞെട്ടൽ മാറും മുൻപേ തലസ്ഥാനത്തും ബസ് സ്റ്റാൻഡിനുള്ളിൽ സ്ത്രീക്കു നേരെ ലൈംഗികാതിക്രമം. കാട്ടാക്കട കെഎസ്ആർടിസി ഡിപ്പോയിൽ ഇന്ന് പുലർച്ചെയാണ് സംഭവം. മാനസിക വെല്ലുവിളി നേരിടുന്ന സ്ത്രീയെയാണ് പന്നിയോട് സ്വദേശി ബ്രൂസ്‌ലി ഷിബു ഉപദ്രവിച്ചത്. സ്ഥിരമായി സ്റ്റാൻഡ് പരിസരത്ത് അലഞ്ഞുതിരിഞ്ഞു നടക്കുന്ന സ്ത്രീയാണ് അതിക്രമത്തിനിരയായത്.

ഇന്നലെ രാത്രി സ്റ്റാൻഡ് ഓഫീസിന് മുന്നിലെ ബെഞ്ചിൽ കിടന്നുറങ്ങുകയായിരുന്നു ഇവർ. പുലർച്ചെ എത്തിയ പ്രതി ഇവരുടെ അടുത്തു വന്നിരിക്കുകയും തുടർന്ന് ലൈംഗികമായി ഉപദ്രവിക്കുകയുമായിരുന്നു. സ്റ്റാൻഡിലുണ്ടായിരുന്ന ഉദ്യോഗസ്ഥർ ശ്രദ്ധയിൽപ്പെട്ടതോടെ പ്രതിയെ അവിടെനിന്നും ഓടിച്ചു വിട്ടു. പിന്നീട് സംശയം തോന്നി സിസിടിവി ദൃശ്യങ്ങൾ പരിശോധിച്ചപ്പോഴാണ് ക്രൂരമായ അതിക്രമത്തിന്റെ ദൃശ്യങ്ങൾ വ്യക്തമായത്.സംഭവത്തിൽ കാട്ടാക്കട പോലീസ് കേസെടുത്ത് അന്വേഷണം ആരംഭിച്ചു.

പന്നിയോട് സ്വദേശിയായ പ്രതി ഷിബുവിനെ കണ്ടെത്താനുള്ള ശ്രമങ്ങൾ പോലീസ് ഊർജ്ജിതമാക്കിയിട്ടുണ്ട്. എന്നാൽ, അതിക്രമത്തിനിരയായ സ്ത്രീ മാനസികാസ്വാസ്ഥ്യമുള്ളയാളായതുകൊണ്ട് തന്നെ സംഭവത്തിന് ശേഷം അവർ എങ്ങോട്ടോ പോയിരിക്കുകയാണ്. ഇവർക്കായി പോലീസ് തെരച്ചിൽ നടത്തുന്നുണ്ട്.ഇവരെ കണ്ടെത്തിയാൽ മാത്രമേ വിശദമായ മൊഴിയെടുക്കുന്നതടക്കമുള്ള നടപടികളിലേക്ക് കടക്കാൻ സാധിക്കൂ എന്ന് പോലീസ് അറിയിച്ചു.

യുവതിയുടെ വൈദ്യ പരിശോധന ഇന്ന് നടത്തും. മൊഴി രേഖപ്പെടുത്തിയ ശേഷം ആകും തുടർനടപടികൾ സ്വീകരിക്കുക.കഴിഞ്ഞ കുറച്ചു ദിവസമായി ഇരയായ സ്ത്രീ ബസ് സ്റ്റാൻഡ് പരിസരത്ത് അലഞ്ഞു തിരിയുന്നുണ്ട്. വെള്ളിയാഴ്ച രാത്രി കാട്ടക്കട ബസ് സ്റ്റാൻഡിലാണ് ഇവർ കിടന്നത്. താൻ ഇവിടെ ബെഞ്ചിൽ കിടക്കുകയാണെന്നും ആരും അടുത്തു വരരുതെന്നും ജീവനക്കാരോട് ഇവർ പറഞ്ഞിരുന്നു. പിന്നീട് യുവതിയെ കാണാതായതോെടെ ജീവനക്കാർ സി.സി.ടി.വി പരിശോധിച്ചപ്പോഴാണ് ലൈംഗികാതിക്രമം ശ്രദ്ധയിൽപ്പെട്ടത്.