വാഗമൺ റൂട്ടിൽ തീക്കോയി വെള്ളികുളത്തിന് സമീപത്ത് കെ.എസ്.ആർ.ടി.സി ബസും ട്രാവലറും കൂട്ടിയിടിച്ച് ആറുപേർക്ക് പരിക്കേറ്റു. മൂന്നുപേരെ ഈരാറ്റുപേട്ടയിലെ സ്വകാര്യ ആശുപത്രികളിൽ പ്രവേശിപ്പിച്ചു. സാരമായി പരിക്കേറ്റ കടയനിക്കാട് സ്വദേശികളായ രാജു (60), ആനന്ദ് (52), ട്രാവലർ ഡ്രൈവർ സുഭാഷ് (42) എന്നിവരെ ചേർപ്പുങ്കൽ മാർ സ്ലീവാ മെഡിസിറ്റിയിൽ പ്രവേശിപ്പിച്ചു. ഞായറാഴ്ച ഉച്ചകഴിഞ്ഞ് മൂന്നിനാണ് അപകടെ സംഭവിച്ചത്.

എറണാകുളം ഡിപ്പോയിൽ നിന്ന് വാഗമണ്ണിലേക്ക് ഉല്ലാസയാത്രക്ക് എത്തിയ കെ.എസ്.ആർ.ടി.സി ബസും വാഗമൺ യാത്ര കഴിഞ്ഞ് ഇറങ്ങിവന്ന മണിമല സ്വദേശികളുടെ ട്രാവലറുമാണ് നേർക്കുനേർ കൂട്ടിയിടിച്ചത്.

ട്രാവലറിന്റെ ബ്രേക്ക് നഷ്ടപ്പെട്ടതാണ് അപകടത്തിന് കാരണമായത്. ട്രാവലറിൻറെ മുൻവശം പൂർണമായി തകർന്ന നിലയിലാണ്. മുൻവശത്തെ വാതിൽ വെട്ടിപ്പൊളിച്ചാണ് ഡ്രൈവറെ പുറത്തെടുക്കാൻ കഴിഞ്ഞത്. ഈരാറ്റുപേട്ട അഗ്നിരക്ഷസേനയും സന്നദ്ധ പ്രവർത്തകരായ ടീം നൻമക്കൂട്ടം ടീം റെസ്ക്യൂ ഫോഴ്സും രക്ഷാപ്രവർത്തനത്തിൽ പങ്കെടുക്കുകയും ചെയ്തു.