വ്യാജ രേഖ ചമച്ച് അവയവക്കച്ചവടം നടത്തിയ കൊല്ലത്ത് സ്ത്രീ ഉള്പ്പെടെയുള്ള ഏജന്റുമാര് അറസ്റ്റില്
കൊല്ലം നഗരം കേന്ദ്രീകരിച്ച് വ്യാജ രേഖകള് ചമച്ച് നിയമവിരുദ്ധമായി അവയവക്കച്ചവടം നടത്തിവന്ന സംഘത്തെ കിളികൊല്ലൂര് പോലീസ് പിടികൂടി. കല്ലുംതാഴം സ്വദേശിനി ശ്രീജ (40), വടക്കേവിളയില് വാടകയ്ക്ക് താമസിക്കുന്ന സുധീര് (31) എന്നിവരാണ് അറസ്റ്റിലായ ഏജന്റുമാര്. ഇവരുടെ മൊഴിയുടെ അടിസ്ഥാനത്തില് അവയവം കൈമാറിയ വിനോദ് എന്ന യുവാവിനെയും പോലീസ് അറസ്റ്റ് ചെയ്തിട്ടുണ്ട്.
പ്രതികളില് നിന്ന് മൊബൈല് ഫോണുകളും വ്യാജ തിരിച്ചറിയല് രേഖകളും ഉള്പ്പെടെയുള്ള നിര്ണ്ണായക തെളിവുകള് പോലീസ് കണ്ടെടുത്തിട്ടുണ്ട്.
കൊല്ലം സിറ്റി പോലീസ് കമ്മീഷണര് ഹേമലതയ്ക്ക് ലഭിച്ച രഹസ്യ വിവരത്തെത്തുടര്ന്നാണ് ശ്രീജയുടെ വീട്ടില് പോലീസ് റെയ്ഡ് നടത്തിയത്. ശ്രീജയുടെ ഫോണ് പരിശോധിച്ചപ്പോള് എറണാകുളം കേന്ദ്രീകരിച്ച് നടന്ന അവയവക്കച്ചവടത്തിന്റെ സുപ്രധാന വിവരങ്ങളും ഡിജിറ്റല് തെളിവുകളും പോലീസിന് ലഭിച്ചു.
ഈ തെളിവുകളുടെ അടിസ്ഥാനത്തില് നടത്തിയ വിശദമായ ചോദ്യം ചെയ്യലിലാണ് കൂട്ടുപ്രതിയായ സുധീറിനെക്കുറിച്ചും അവയവ കൈമാറ്റം നടത്തിയ യുവാവിനെക്കുറിച്ചുമുള്ള വിവരങ്ങള് പുറത്തുവന്നത്. കേസിലെ മുഖ്യസൂത്രധാരനെന്ന് കരുതുന്ന കാസര്കോട് സ്വദേശി മുഹമ്മദ് നജീബ് കല്ല് ഉള്പ്പെടെയുള്ള മറ്റ് പ്രതികള് നിലവില് ഒളിവിലാണ്. ഇവര്ക്കായുള്ള അന്വേഷണം പോലീസ് ഊര്ജ്ജിതമാക്കിയിട്ടുണ്ട്.
https://www.facebook.com/Malayalivartha
