സര്‍ക്കാരിന്റെ പിടിപ്പുകേടാണ് കേരളം കണ്ടുകൊണ്ടിരിക്കുന്നതെന്നും, മുഖ്യമന്ത്രി ഓരോ വാര്‍ത്താസമ്മേളനത്തിലും കള്ളം പറയുകയാണെന്നുമുള്ള രൂക്ഷവിമര്‍ശനവുമായി സി.പി.എം സംസ്ഥാന സെക്രട്ടറി എം.വി. ഗോവിന്ദന്‍ രംഗത്തെത്തി. വളര്‍മതിയുടെ ആരോഗ്യനില ഗുരുതരമാണെന്നും, മുന്‍പ് പ്രതിപക്ഷത്തായിരുന്നപ്പോള്‍ ഒരാഴ്ചകൊണ്ട് പ്രശ്‌നം പരിഹരിക്കുമെന്ന് വാഗ്ദാനം ചെയ്തവര്‍ ഇപ്പോള്‍ തിരിഞ്ഞുനോക്കാത്ത അവസ്ഥയാണെന്നും അദ്ദേഹം കുറ്റപ്പെടുത്തി.

ഈ വിഷയത്തില്‍ അടിയന്തരമായി ഇടപെട്ട് പരിഹാരം കാണണമെന്നും കേരളത്തിലെ ജനങ്ങള്‍ ഒറ്റക്കെട്ടായി ഇക്കാര്യം ആവശ്യപ്പെടുന്നുണ്ടെന്നും അദ്ദേഹം വ്യക്തമാക്കി. കൂടാതെ വൈദ്യുതി വാങ്ങലിലെ അഴിമതി ആരോപണങ്ങളും സര്‍ക്കാരിന്റെ മറ്റ് നടപടികളും എം.വി. ഗോവിന്ദന്‍ വാര്‍ത്താസമ്മേളനത്തില്‍ ചോദ്യം ചെയ്തു. ആരുടെയും അനുമതിയില്ലാതെയും ടെന്‍ഡര്‍ വിളിക്കാതെയും ഒക്ടോബര്‍ മാസത്തില്‍ 200 മെഗാവാട്ട് വൈദ്യുതി അധിക വില നല്‍കി വാങ്ങിയെന്ന വാര്‍ത്ത അപകടകരമാണെന്ന് അദ്ദേഹം പറഞ്ഞു. ഇതുമായി ബന്ധപ്പെട്ട് ജുഡീഷ്യല്‍ അന്വേഷണം വേണമെന്ന ആവശ്യത്തില്‍ ഉറച്ചുനില്‍ക്കുന്നുവെന്നും, വൈദ്യുതി മന്ത്രിയും മുഖ്യമന്ത്രിയും തമ്മിലുള്ള തര്‍ക്കം പരസ്യമാണെന്നും അദ്ദേഹം കൂട്ടിച്ചേര്‍ത്തു.

കേരളത്തില്‍ ബി.ജെ.പി. ഭരണം നടത്തുന്ന ഒരു യു.ഡി.എഫ്. ഗവണ്‍മെന്റാണ് ഉള്ളതെന്നും അദ്ദേഹം ആരോപിച്ചു. ബാലഗോകുലത്തിന്റെ പത്രമായ 'മയില്‍പീലി' വഴി സംഘപരിവാറിന് വിദ്യാഭ്യാസ മേഖലയില്‍ ഇടപെടാന്‍ സൗകര്യം ഒരുക്കിക്കൊടുക്കുകയാണെന്നും, കോണ്‍ഗ്രസിനുള്ളില്‍ ഇപ്പോള്‍ കൂട്ടത്തല്ലാണ് നടക്കുന്നതെന്നും അദ്ദേഹം പരിഹസിച്ചു.