രാജസ്ഥാനിലെ ശ്രീഗംഗാനഗര്‍ ജില്ലയിലുണ്ടായ ഐഇഡി സ്‌ഫോടന പരമ്പരയില്‍ രണ്ടുപേര്‍ പിടിയില്‍. നവംബര്‍ മൂന്നിന് അനുപ്ഗഢ്‌സൂറത്ഗഢ് റെയില്‍വേ പാതയില്‍ നടന്ന സ്‌ഫോടനവുമായി ബന്ധപ്പെട്ട് പഞ്ചാബിലെ ഗുര്‍ദാസ്പൂര്‍ സ്വദേശികളായ മഹക്ദീപ് കൗര്‍ (21), ദവീന്ദര്‍ സിങ് (22) എന്നിവരെയാണ് രാജസ്ഥാന്‍ തീവ്രവാദ വിരുദ്ധ സേനയും (എടിഎസ്) ഗംഗാനഗര്‍ പോലീസും ചേര്‍ന്ന് അറസ്റ്റ് ചെയ്തത്. അറസ്റ്റിലായ മഹക്ദീപ് കൗറിന് പാക് ഏജന്റുമാരുമായി ബന്ധമുണ്ടായിരുന്നുവെന്ന് പോലീസ് വ്യക്തമാക്കുന്നു.

'ചാച്ച', 'ഷാ' എന്നീ പേരുകളില്‍ അറിയപ്പെടുന്ന പാകിസ്ഥാന്‍ കേന്ദ്രീകരിച്ച് പ്രവര്‍ത്തിക്കുന്ന ഹാന്‍ഡ്‌ലര്‍മാരുമായാണ് ഇവര്‍ ആശയവിനിമയം നടത്തിയിരുന്നത്. കടുത്ത സാമ്പത്തിക പ്രതിസന്ധിയിലായിരുന്ന യുവതിയെ പണം നല്‍കിയാണ് പാക് ഏജന്റുകള്‍ സ്വാധീനിച്ചത്. വിവാഹമോചിതയായ മഹക്ദീപ് മുന്‍പ് ലഹരിക്കടത്ത് കേസിലും പ്രതിയായിരുന്നതായി പോലീസ് പറഞ്ഞു. പ്രതികള്‍ സ്‌ഫോടന സംഘത്തിന് വേണ്ട ഒളിത്താവളങ്ങളും യാത്രാസൗകര്യങ്ങളും ഒരുക്കിക്കൊടുത്തു. കൃത്യം നടത്തേണ്ട റെയില്‍വേ ട്രാക്ക് കൃത്യമായി ചൂണ്ടിക്കാണിച്ചു നല്‍കിയതും ഇവരാണെന്നാണ് അന്വേഷണ സംഘത്തിന്റെ വിലയിരുത്തല്‍. സംഭവത്തിന് പിന്നില്‍ വലിയൊരു ഗൂഢാലോചനയുണ്ടെന്നും രാജ്യസുരക്ഷയെ ലക്ഷ്യമിട്ടുള്ള അട്ടിമറിയാണോ ഇതെന്നും പോലീസ് വിശദമായി അന്വേഷിച്ചു വരുന്നുണ്ട്.

നവംബര്‍ മൂന്നിന് നടന്ന സ്‌ഫോടനത്തില്‍ റെയില്‍വേ ട്രാക്കിന് ഗുരുതരമായ കേടുപാടുകള്‍ സംഭവിച്ചിരുന്നു. കോണ്‍ക്രീറ്റ് സ്ലീപ്പറുകള്‍ തകര്‍ന്ന് ട്രാക്കിന് താഴെ രണ്ടര അടിയോളം ആഴമുള്ള വലിയ കുഴിയാണ് രൂപപ്പെട്ടത്. എന്നാല്‍ സ്‌ഫോടനം നടക്കുന്നതിന് കേവലം അരമണിക്കൂര്‍ മുന്‍പ് ഈ പാതയിലൂടെ അനുപ്ഗഢ്‌സൂറത്ഗഢ് പാസഞ്ചര്‍ ട്രെയിന്‍ കടന്നുപോയിരുന്നു എന്നത് വലിയൊരു ദുരന്തത്തിന്റെ വ്യാപ്തിയാണ് ഒഴിവാക്കിയത്. ട്രെയിന്‍ കടന്നുപോയ ഉടന്‍ തന്നെ സ്‌ഫോടനം നടന്നത് വലിയൊരു അട്ടിമറി ലക്ഷ്യമിട്ടാണെന്നതിന്റെ വ്യക്തമായ സൂചനയാണ് നല്‍കുന്നത്.