പ്രതിപക്ഷ നേതാവ് പിണറായി വിജയന്റെ വീട്ടിലെ റെയ്ഡിന് ശേഷം പുറത്തിറങ്ങിയ ഇഡി ഉദ്യോഗസ്ഥരെ ആക്രമിച്ച കേസിലെ ദൃശ്യങ്ങള്‍ കോടതി ഇന്ന് പരിശോധിക്കും. പ്രോസിക്യൂഷന്റെ ഹര്‍ജി അംഗീകരിച്ചാണ് തീരുമാനം. തിരുവനന്തപുരം സെഷന്‍സ് കോടതിയാണ് ദൃശ്യങ്ങള്‍ പരിശോധിക്കുന്നത്. കേസില്‍ പത്ത് പ്രതികളുടെ ജാമ്യാപേക്ഷയില്‍ വിധി പറയാനിരിക്കെയാണ് കോടതിയുടെ നീക്കം. കേസില്‍ 26 പേരെയാണ് അറസ്റ്റ് ചെയ്തത്.

ദൃശ്യങ്ങള്‍ പരിശോധിച്ചതിനുശേഷം കോടതി ജാമ്യാപേക്ഷയില്‍ തീരുമാനമെടുക്കണമെന്നായിരുന്നു സ്‌പെഷ്യല്‍ പബ്‌ളിക് പ്രോസിക്യൂട്ടര്‍ കോടതിയോട് അഭ്യര്‍ത്ഥിച്ചത്. എന്നാല്‍ ജാമ്യാപേക്ഷയില്‍ ഡിജിറ്റല്‍ തെളിവുകള്‍ പരിശോധിക്കേണ്ടതില്ലെന്നായിരുന്നു പ്രതിഭാഗം അഭിഭാഷകന്റെ വാദം. ഇതിനുപിന്നാലെയാണ് പ്രോസിക്യൂഷന്‍ സമര്‍പ്പിച്ച ദൃശ്യങ്ങള്‍ പരിശോധിക്കാന്‍ കോടതി തീരുമാനിച്ചത്.

പ്രതിപക്ഷ നേതാവ് പിണറായി വിജയന്റെ വീട്ടിലെ റെയ്ഡിന് ശേഷം പുറത്തിറങ്ങിയ ഇഡി ഉദ്യോഗസ്ഥരെ സിപിഎം പ്രവര്‍ത്തകര്‍ ആക്രമിച്ച സംഭവത്തിലാണ് കോടതി ദൃശ്യങ്ങള്‍ പരിശോധിക്കുന്നത്. തങ്ങള്‍ക്ക് നേരെയുണ്ടായ ആക്രമണം ആസൂത്രിതമാണെന്ന് ഇഡി ഉദ്യോഗസ്ഥര്‍ മൊഴി നല്‍കിയിരുന്നു. നേതാക്കളെന്നോ പ്രവര്‍ത്തകരെന്നോ വ്യത്യാസമില്ലാതെ ആക്രമണത്തിന് പിന്നില്‍ പ്രവര്‍ത്തിച്ചവരെ പിടികൂടുമെന്നാണ് ഇഡി വ്യക്തമാക്കിയിട്ടുള്ളത്.

കൊച്ചിയിലെത്തിയ എസ്‌ഐടി സംഘമാണ് ആക്രമണത്തിനിരയായ ഇഡി ഉദ്യോഗസ്ഥരുടെ മൊഴിയെടുത്തത്. അസിസ്റ്റന്റ് ഡയറക്ടര്‍ സനിത് റെഡ്ഡിയടക്കം ഏഴ് പേരുടെ മൊഴിയാണ് എടുത്തത്. ആക്രമണവുമായി ബന്ധപ്പെട്ട് 46 പേരെ തിരിച്ചറിഞ്ഞതില്‍ നിന്നാണ് 26 പേരെ ഇതുവരെ അറസ്റ്റ് ചെയ്തത്. ഇവരില്‍ അധികം പേരും താഴെതട്ടിലുള്ള സിപിഎം പ്രവര്‍ത്തകരാണ്. പാര്‍ട്ടിയിലെ ഉന്നത നേതാക്കള്‍ ഉള്‍പ്പടെ പ്രതിഷേധങ്ങളില്‍ പങ്കെടുത്തിട്ടുണ്ടെന്നും അക്രമത്തിലേക്ക് നയിച്ച സാഹചര്യങ്ങളില്‍ ഇവര്‍ക്ക് പങ്കുണ്ടെന്നുമാണ് ഇഡി ആരോപിക്കുന്നത്.