കേരളത്തിന് ഓണത്തോടനുബന്ധിച്ച് സ്‌പെഷ്യല്‍ ട്രെയിനുകള്‍ അനുവദിച്ചതായി കേന്ദ്ര റെയില്‍വേ മന്ത്രി അശ്വിനി വൈഷ്ണവ്. നൂറിലധികം ട്രെയിന്‍ സര്‍വീസുകള്‍ അനുവദിച്ചതായാണ് മന്ത്രി അറിയിച്ചത്. റൂട്ടുകള്‍ ഉടന്‍ നിശ്ചയിക്കുമെന്നാണ് വിവരം. ഓണത്തിനുപുറമെ ജഗന്നാഥ രഥയാത്രയ്ക്ക് 300ലധികം പ്രത്യേക ട്രെയിനുകള്‍ ഒഡീഷയ്ക്ക് അനുവദിക്കുമെന്നും റെയില്‍വേ മന്ത്രി അറിയിച്ചിട്ടുണ്ട്.

ഇന്നുരാവിലെ ഭുവനേശ്വറിലെ റെയില്‍ സദാനില്‍ നിന്ന് വീഡിയോ കോണ്‍ഫറന്‍സിംഗിലൂടെ നന്ദേഡ്മുംബയ്, തനക്പൂര്‍നന്ദേഡ് എക്‌സ്പ്രസ് ട്രെയിനുകള്‍ കേന്ദ്രമന്ത്രി ഫ്‌ലാഗ് ഓഫ് ചെയ്യുകയും തനക്പൂര്‍പിലിഭിത്ത് ട്രെയിന്‍ സര്‍വീസ് ഷാജഹാന്‍പൂര്‍ വരെ നീട്ടുന്നതിന്റെ ഉദ്ഘാടനം നിര്‍വഹിക്കുകയും ചെയ്തിരുന്നു. ഇതിനുപിന്നാലെയാണ് ഒഡീഷയ്ക്കും കേരളത്തിനും സ്‌പെഷ്യല്‍ ട്രെയിന്‍ സര്‍വീസുകള്‍ അനുവദിച്ചതായി അദ്ദേഹം പ്രഖ്യാപിച്ചത്.

'വേനല്‍ക്കാലത്ത് ഈ വര്‍ഷം റെക്കോര്‍ഡുയര്‍ത്തി 15,000 സ്‌പെഷ്യല്‍ ട്രെയിനുകളാണ് സര്‍വീസ് നടത്തിയത്. ജഗന്നാഥ രഥയാത്രയ്ക്കായി 300ലധികം സ്‌പെഷ്യല്‍ ട്രെയിനുകള്‍ സര്‍വീസ് നടത്തും. ഓണത്തിന് കേരളത്തില്‍ 100 ലധികം സ്‌പെഷ്യല്‍ ട്രെയിനുകള്‍ ഓടും. നമ്മുടെ പൗരന്മാര്‍ക്ക് താങ്ങാനാവുന്ന നിരക്കില്‍ സുരക്ഷിതമായ സേവനങ്ങള്‍ ലഭ്യമാക്കുന്നതിന് റെയില്‍വേയും കേന്ദ്ര സര്‍ക്കാരും പ്രധാനമന്ത്രി മോദിയും നടത്തുന്ന വലിയ ശ്രമത്തിന്റെ ഭാഗമാണിത്' എന്നാണ് മന്ത്രി വ്യക്തമാക്കിയത്.

'കഴിഞ്ഞ 12 വര്‍ഷമായി റെയില്‍വേയുടെ പരിവര്‍ത്തനത്തിനായുള്ള ശ്രമം നടക്കുകയാണ്. പ്രധാനമന്ത്രി നരേന്ദ്ര മോദി റെയില്‍വേയ്ക്ക് പ്രത്യേക ശ്രദ്ധ നല്‍കുന്നുണ്ട്. ഏകദേശം 37,000 കിലോമീറ്റര്‍ പുതിയ റെയില്‍വേ ട്രാക്കുകള്‍ നിര്‍മ്മിക്കപ്പെട്ടു. ഇന്ത്യയുടെ ചരിത്രത്തില്‍ മുമ്പൊരിക്കലും ഇത്രയും വലിയ റെയില്‍വേ വികസനം നടന്നിട്ടില്ല. ഇത് രാജ്യത്തിന് വളരെ വലിയ നേട്ടമാണ്. റെയില്‍വേയുടെ വൈദ്യുതീകരണം 99.6 ശതമാനം എത്തിയിരിക്കുന്നു' റെയില്‍വേ മന്ത്രി കൂട്ടിച്ചേര്‍ത്തു.