അപകടത്തില്പ്പെട്ട് ട്രക്കില് നിന്ന് റോഡില് ചിതറിയ മാമ്പഴം കൈക്കലാക്കാന് വഴിയാത്രക്കാരുടെ തിക്കും തിരക്കും
അപകടത്തില്പ്പെട്ട് മറിഞ്ഞ ട്രക്കില്നിന്നും റോഡിലേക്ക് ചിതറിയ മാങ്ങകള് വാരിക്കൂട്ടാന് ആളുകള് തിക്കും തിരക്കും കൂട്ടുന്നതിന്റെ ദൃശ്യങ്ങളാണ് സോഷ്യല്മീഡിയയില് പ്രചരിക്കപ്പെടുന്നത്. സഹാനുഭൂതി, മനുഷ്യത്വം തുടങ്ങിയവയുടെ പ്രാധാന്യത്തെക്കുറിച്ചുള്ള ഓണ്ലൈന് ചര്ച്ചകള്ക്ക് തുടക്കമിട്ടിരിക്കുകയാണ് സംഭവം.
ബാഗുകളിലും ചാക്കുകളും മാത്രമല്ല സാരിത്തുമ്പിലും ചുരിദാറിന്റെ ദുപ്പട്ടയിലും ഉള്പ്പടെ മാമ്പഴങ്ങള് വാരിക്കൂട്ടുന്ന നാട്ടുകാരെയും വഴിയാത്രക്കാരെയും ദൃശ്യങ്ങളില് കാണാം. സംഭവത്തിന്റെ സ്ഥലമോ തീയതിയോ വ്യക്തമല്ലെങ്കിലും ട്രക്കിന്റെ നമ്പര് പ്ലേറ്റിന്റെ അടിസ്ഥാനത്തില് കര്ണാടകയില് എവിടെയോ നടന്ന സംഭവമാണിതെന്നാണ് കരുതുന്നത്. അപകടത്തില്പ്പെട്ട ട്രക്കിന്റെ ഡ്രൈവറുടെ അവസ്ഥയെക്കുറിച്ച് വീഡിയോയില് വ്യക്തമാക്കിയിട്ടില്ല.
സംസ്കാരശൂന്യര്, മനുഷ്യത്വം മരിച്ചവര് തുടങ്ങിയ പ്രയോഗങ്ങളിലൂടെയാണ് മാമ്പഴം വാരിക്കൂട്ടിയവരെ സോഷ്യല്മീഡിയ വിമര്ശിക്കുന്നത്. മരണാവസ്ഥയില് കിടക്കുന്നവരെ സഹായിക്കാന്പോലും മനസുകാണിക്കാത്തവരാണ്, അത്തരത്തിലുള്ളവര് അപകടസമയത്ത് സാധനങ്ങള് മോഷ്ടിക്കാതിരിക്കാനുള്ള പ്രാഥമിക മര്യാദ കാണിക്കുമെന്ന് പ്രതീക്ഷിക്കരുതെന്നാണ് സോഷ്യല്മീഡിയാ ഉപയോക്താക്കളില് ഒരാള് കുറിച്ചത്.
'എന്റെ അച്ഛന് ഒരു ട്രക്ക് ഉണ്ടായിരുന്നു. ഒരിക്കല്, ഉള്ളി നിറച്ചുവന്ന ആ ട്രക്ക് വഴിയില് മറിഞ്ഞു. അന്ന് ക്ഷാമം കാരണം ഉള്ളിക്ക് കിലോയ്ക്ക് 80 രൂപയില് അധികം വിലയുണ്ടായിരുന്നു. അപ്പോഴും ഇതുപോലെതന്നെ ഉള്ളി മുഴുവന് ആളുകള് കൊള്ളയടിച്ചു. ഞങ്ങള്ക്ക് ഏകദേശം 35 ലക്ഷം രൂപയുടെ നഷ്ടമാണ് ഉണ്ടായത്. അത്രയും വലിയ നഷ്ടം സഹിക്കേണ്ടിവരുന്ന ഉടമയ്ക്ക് മാത്രമേ ആ വേദന മനസിലാകൂ' മറ്റൊരാള് കുറിച്ചു.
https://www.facebook.com/Malayalivartha
