മുംബൈയില്‍ തുടരുന്ന ശക്തമായ മഴയില്‍ കനത്ത നാശനഷ്ടം. മുംബൈയില്‍ കനത്ത മഴ തുടരുന്ന സാഹചര്യത്തില്‍ കാലാവസ്ഥാ വകുപ്പ് ഓറഞ്ച് അലര്‍ട്ട് പ്രഖ്യാപിച്ചു. കഴിഞ്ഞ അഞ്ച് ദിവസമായി മുംബയില്‍ അസാധാരണമായ കനത്ത മഴയാണ് രേഖപ്പെടുത്തുന്നത്. ഇതുവരെ മരണപ്പെട്ടത് 13 പേര്‍. റോഡ്, റെയില്‍, വ്യോമഗതാഗതം താറുമാറായി. കനത്ത മഴയില്‍ വെള്ളപ്പൊക്കവും മണ്ണിടിച്ചിലുമുണ്ടായതിനെത്തുടര്‍ന്ന് പൂനെ-മുംബൈയ് എക്‌സ്പ്രസ് വേയിലും പൂനെ-മുംബൈയ് ഹൈവേയിലും ഗതാഗതം നിര്‍ത്തിവച്ചു. കൂടുതല്‍ അറിയിപ്പ് ഉണ്ടാകുന്നതുവരെ രണ്ട് നഗരങ്ങള്‍ക്കിടയിലുള്ള യാത്ര ഒഴിവാക്കണമെന്നാണ് പൊലീസിന്റെ നിര്‍ദേശം.

സാന്താക്രൂസ് നിരീക്ഷണാലയത്തില്‍ 805.6 മില്ലിമീറ്റര്‍ മഴ ലഭിച്ചു. കൊളാബയില്‍ 744.2 മില്ലിമീറ്റര്‍ മഴയാണ് രേഖപ്പെടുത്തിയത്. 50 വര്‍ഷത്തിനിടയിലെ ഏറ്റവും തീവ്രമായ മഴയാണ് ഇക്കൊല്ലം രേഖപ്പെടുത്തിയത്. കനത്ത മഴയില്‍ മാന്‍ഖുര്‍ഡില്‍ നാലുനില കെട്ടിടം തൊട്ടടുത്തുള്ള കുടിലിലേയ്ക്ക് തകര്‍ന്നുവീണ് അഞ്ച് കുട്ടികള്‍ ഉള്‍പ്പെടെ ആറ് പേര്‍ മരിച്ചു. നഗരത്തിലുടനീളം 200ലധികം മരങ്ങള്‍ കടപുഴകി വീണുണ്ടായ അപകടത്തില്‍ രണ്ടുപേര്‍ മരിച്ചു. മുംബയിലുടനീളമുള്ള വിവിധ സ്‌കൂളുകള്‍ക്ക് അവധി നല്‍കിയിരിക്കുകയാണ്.

മുംബയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തില്‍ കനത്ത മഴയെത്തുടര്‍ന്ന് വിമാന സര്‍വീസുകള്‍ തടസപ്പെട്ടു. രാവിലെ 11.30 വരെ 17 വിമാന സര്‍വീസുകള്‍ റദ്ദാക്കുകയും 217 വിമാനങ്ങള്‍ വൈകുകയും ചെയ്തതായി വിമാനത്താവളത്തിലെ അധികൃതര്‍ അറിയിച്ചു. മേഖലയില്‍ ന്യൂനമര്‍ദ്ദം ശക്തി പ്രാപിക്കുന്നതിനാല്‍ കാലാവസ്ഥ കൂടുതല്‍ വഷളാകുമെന്ന് അധികൃതര്‍ മുന്നറിയിപ്പ് നല്‍കിയിട്ടുണ്ട്.

നാസിക്കില്‍ നാളെ വലിയ മേഘവിസ്‌ഫോടനമുണ്ടായേക്കാമെന്ന് മുന്നറിയിപ്പ് നല്‍കിയിട്ടുണ്ട്. അതിശക്തമായ മഴയ്ക്കുള്ള സാദ്ധ്യതയാണ് പ്രവചിച്ചിരിക്കുന്നത്. പ്രദേശവാസികള്‍ ജാഗ്രത പാലിക്കണമെന്നും ഔദ്യോഗിക കാലാവസ്ഥാ മുന്നറിയിപ്പുകള്‍ പിന്തുടരണമെന്നും നിര്‍ദ്ദേശിച്ചിട്ടുണ്ട്.