അണ്ടർ-19 ഏഷ്യാകപ്പിന്റെ സെമിയിൽ ഇന്ത്യയ്‌ക്കെതിരേ 228 റൺസ് വിജയലക്ഷ്യമുയർത്തി അഫ്ഗാനിസ്ഥാൻ. ടോസ് നേടി ആദ്യം ബാറ്റ് ചെയ്ത അഫ്ഗാൻ നിശ്ചിത 50 ഓവറിൽ എട്ടു വിക്കറ്റ് നഷ്ടത്തിൽ 227 റൺസെടുക്കുകയായിരുന്നു. നൊമാൻ സലർസായ്, ഷാ ഫൈസൽ റാഹിമി എന്നിവരുടെ അർധ സെഞ്ചുറികളാണ് അഫ്ഗാനെ ഭേദപ്പെട്ട സ്‌കോറിലെത്തിച്ചത്.

കൃത്യമായ ഇടവേളകളിൽ വിക്കറ്റുകൾ വീഴ്ത്തിയ ഇന്ത്യൻ ബൗളർമാർ അഫ്ഗാൻ ബാറ്റർമാരെ നിരന്തരം സമ്മർദത്തിലാക്കുകയും ചെയ്തു.
ഇന്ത്യൻ ബൗളർമാർ കണിശതയോടെ പന്തെറിഞ്ഞതോടെ അഫ്ഗാന് സ്‌കോറിങ് ബുദ്ധിമുട്ടായി. നാലാം വിക്കറ്റിൽ ഷാ ഫൈസൽ റാഹിമി - നൊമാൻ സലർസായ് കൂട്ടുകെട്ടിൽ പിറന്ന 57 റൺസും ഏഴാം വിക്കറ്റിൽ ഫൈസൽ റാഹിമി - സൊഹൈൽ ഖാൻ കൂട്ടുകെട്ടിൽ പിറന്ന 60 റൺസുമാണ് അഫ്ഗാനെ രക്ഷിച്ചത്.

നൊമാൻ സലർസായ് 78 പന്തിൽ നിന്ന് രണ്ടു വീതം സിക്‌സും ഫോറുമടക്കം 51 റൺസെടുത്തു. 72 പന്തുകൾ നേരിട്ട ഷാ ഫൈസൽ റാഹിമി 51 റൺസ് നേടി. സുബാൻ സഖായിൽ (31), സൊഹൈൽ ഖാൻ (36*) എന്നിവരാണ് അഫ്ഗാന്റെ മറ്റ് പ്രധാന സ്‌കോറർമാർ.

ആബിദുള്ള നടരാജൻ (14), ഫരീദുള്ള ഇഹ്‌സാസ് (13), ആമിർ ഹംസ (0) എന്നിവരെല്ലാം നിരാശപ്പെടുത്തി. ഇന്ത്യയ്ക്കായി ഇഷാൻ സൂദ് മൂന്നും ആര്യൻ സവ്‌സാനി രണ്ടും വിക്കറ്റുകൾ വീഴ്ത്തുകയും ചെയ്തു.