ഓഹരി വിപണിയിൽ വ്യാപാരം ആരംഭിച്ച് ആദ്യ മണിക്കൂറില്‍ തന്നെ ബിഎസ്ഇ സെന്‍സെക്‌സ് 1300ലധികം പോയിന്റ് മുന്നേറുകയായിരുന്നു. നിലവില്‍ 82,000 എന്ന സൈക്കോളജിക്കല്‍ ലെവല്‍ കടന്നിരിക്കുകയാണ് സെന്‍സെക്‌സ്. നിഫ്റ്റിയിലും സമാനമായ മുന്നേറ്റം കാണാനായി. ഒരു മണിക്കൂറിനിടെ നിക്ഷേപകര്‍ക്ക് ഒന്നടങ്കം ആറുലക്ഷം കോടിയുടെ നേട്ടമാണുണ്ടായത്. ആഗോള വിപണിയില്‍ എണ്ണവില കുറഞ്ഞത് അടക്കമുള്ള വിഷയങ്ങളാണ് വിപണിയില്‍ പ്രതിഫലിച്ചത്.

ഇറാനെതിരെ തത്കാലം സൈനിക നടപടിയില്ലെന്ന അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ വാക്കുകളാണ് ആഗോള വിപണിയില്‍ പ്രതീക്ഷ പകര്‍ന്നത്. ഇതിന്റെ ചുവടുപിടിച്ച് ഏറ്റവും വേഗത്തില്‍ വളരുന്ന സമ്പദ് വ്യവസ്ഥയായ ഇന്ത്യയിലെ ഓഹരി വിപണിയിലേക്ക് വിദേശ നിക്ഷേപകര്‍ വീണ്ടും ഒഴുകിയെത്തിയതാണ് വിപണിയുടെ കുതിപ്പിന് കാരണം. നവംബര്‍ രണ്ടിനും ഒന്‍പതിനും ഇടയില്‍ വിദേശ നിക്ഷേപകര്‍ 53,739 കോടി മൂല്യമുള്ള ഓഹരികളാണ് വാങ്ങിക്കൂട്ടിയത്. എല്ലാ സെക്ടറുകളും നേട്ടത്തിലാണ്.