പാളയം പ്രദീപിനെ പേഴ്സണല് സ്റ്റാഫാക്കാനുള്ള രമ്യ ഹരിദാസിന്റെ നീക്കം നടന്നില്ല
കെ.പി.സി.സി സസ്പെന്ഡ് ചെയ്ത പാളയം പ്രദീപിനെ മുന്കാല പ്രാബല്യത്തോടെ പേഴ്സണല് സ്റ്റാഫില് ഉള്പ്പെടുത്താനുള്ള രമ്യ ഹരിദാസ് എം.എല്.എയുടെ നീക്കം പൊളിഞ്ഞു. ചിറയിന്കീഴിലെ കൈയാങ്കളി വിവാദത്തിന് മുമ്പുള്ള തീയതി വച്ച് നല്കിയ കത്ത് ചട്ടവിരുദ്ധമായതിനാല് സ്വീകരിക്കാന് കഴിയില്ലെന്ന് നിയമസഭാ സെക്രട്ടറി അറിയിച്ചു. കത്ത് മടക്കി നല്കുകയും ചെയ്തു. മേയ് 21 മുതല് മുന്കാല പ്രാബല്യത്തോടെ പാളയം പ്രദീപിനെ സ്റ്റാഫായി നിയമിക്കണമെന്ന ആവശ്യമാണ് ഇതോടെ പൊളിഞ്ഞത്.
പാളയം പ്രദീപ് നിലവിലും തന്റെ ഔദ്യോഗിക സ്റ്റാഫാണെന്നാണ് എം.എല്.എ വാദിച്ചിരുന്നത്. ഈ വാദം സാങ്കേതികമായി ശരിവയ്ക്കാന് വേണ്ടിയാണ് മുന്കാല പ്രാബല്യത്തോടെ നിയമനം നല്കാന് നിയമസഭാ സെക്രട്ടറിക്ക് കത്ത് നല്കിയത്. സെപ്തംബര് നാല് എന്ന തീയതി വച്ചാണ് കത്ത് ഇന്ന് കൈമാറിയത്. പാളയം പ്രദീപിനൊപ്പം കോഴിക്കോട് സ്വദേശി കുഞ്ഞഹമ്മദ് എന്നിവരെയും മുന്കാല പ്രാബല്യത്തോടെ സ്റ്റാഫില് ഉള്പ്പെടുത്തണം എന്നായിരുന്നു ആവശ്യം. എന്നാല് പഴയ തീയതി വച്ചുകൊണ്ടുള്ള നടപടികളിലേക്ക് കടക്കാന് കഴിയില്ലെന്നാണ് നിയമസഭാ സെക്രട്ടേറിയറ്റ് അറിയിച്ചത്. പുതിയ തീയതിയില് തത്സമയ പ്രാബല്യമുള്ള അപേക്ഷ നല്കാനും നിര്ദ്ദേശിച്ചിട്ടുണ്ട്.
ഔദ്യോഗിക പദവികള് ഒന്നുമില്ലാതെ ഉദ്യോഗസ്ഥര് അടക്കം പങ്കെടുത്ത അവലോകന യോഗത്തില് പാളയം പ്രദീപ് ഇടപെട്ട് സംസാരിച്ചതാണ് പുതിയ വിവാദങ്ങള്ക്ക് വഴിവച്ചത്. ഇത് പ്രാദേശിക കോണ്ഗ്രസ് നേതാക്കള് ചോദ്യം ചെയ്തിരുന്നു. ഇതിന് പിന്നാലെയാണ് പ്രദീപിനെ ഔദ്യോഗികമായി സ്റ്റാഫാക്കാന് എം.എല്.എ നീക്കം നടത്തിയത്.
https://www.facebook.com/Malayalivartha
