ഇ.ഡി.യുടെ നീക്കം.. സര്‍ക്കാരിന് നിയമപരമായ പരിശോധനകള്‍ പൂര്‍ത്തിയാക്കി തീരുമാനമെടുക്കുമെന്ന് മുഖ്യമന്ത്രി വി.ഡി. സതീശന്‍.. സി.എം.ആര്‍.എല്‍ ഇടപാടിന് അപ്പുറമുള്ള നിരവധി കാര്യങ്ങള്‍ അടങ്ങിയിട്ടുണ്ടെന്നും വി ഡി..
കള്ളപ്പണ നിരോധന നിയമം അനുസരിച്ചാണ് ഇ.ഡി സംസ്ഥാന പോലീസ് മേധാവിക്ക് കത്ത് അയച്ചതെന്നും വിഷയത്തില്‍ സര്‍ക്കാരിന് നിയമപരമായ പരിശോധനകള്‍ പൂര്‍ത്തിയാക്കി തീരുമാനമെടുക്കേണ്ടതുണ്ടെന്നും മുഖ്യമന്ത്രി വി.ഡി. സതീശന്‍ വ്യക്തമാക്കി. മുന്‍ മുഖ്യമന്ത്രി പിണറായി വിജയന്‍, മുന്‍ മന്ത്രി പി.എ. മുഹമ്മദ് റിയാസ്, മകള്‍ ടി. വീണ എന്നിവര്‍ക്കെതിരെ സി.എം.ആര്‍.എല്‍-എക്‌സാലോജിക് ഇടപാടില്‍ അഴിമതി നിരോധന നിയമപ്രകാരം കേസെടുക്കണമെന്ന് ആവശ്യപ്പെട്ട് ഇ.ഡി സംസ്ഥാന പോലീസ് മേധാവിക്ക് കത്ത് നല്‍കിയതിനോട് പ്രതികരിക്കുകയായിരുന്നു അദ്ദേഹം.
ഈ കേസില്‍ രാഷ്ട്രീയ ലാക്കുകളില്ലെന്നും കേവലം നിയമം മാത്രമാണ് സര്‍ക്കാര്‍ പരിശോധിക്കുന്നതെന്നും മുഖ്യമന്ത്രി പറഞ്ഞു. രാഷ്ട്രീയ പാര്‍ട്ടികള്‍ വിവിധ കമ്പനികളില്‍ നിന്നും സ്ഥാപനങ്ങളില്‍ നിന്നും സാമ്പത്തിക സംഭാവനകള്‍ വാങ്ങുന്നത് തികച്ചും സാധാരണമായ ഒരു കാര്യമാണ്.എന്നാല്‍ ഇപ്പോള്‍ ഉയര്‍ന്നിരിക്കുന്ന കേസ് അതില്‍ നിന്നും തികച്ചും വ്യത്യസ്തവും ഗൗരവമേറിയതുമാണെന്ന് വി.ഡി. സതീശന്‍ കൂട്ടിച്ചേര്‍ത്തു.കേന്ദ്ര അന്വേഷണ ഏജന്‍സിയായ ഇ.ഡി നല്‍കിയ കത്തില്‍ സി.എം.ആര്‍.എല്‍ ഇടപാടിന് അപ്പുറമുള്ള നിരവധി കാര്യങ്ങള്‍ അടങ്ങിയിട്ടുണ്ടെന്നും അദ്ദേഹം വെളിപ്പെടുത്തി.
വളരെ ഗൗരവതരമായ തെളിവുകളാണ് കേന്ദ്ര ഏജന്‍സി സര്‍ക്കാരിന് മുന്നില്‍ കൈമാറിയിരിക്കുന്നത്. കേന്ദ്ര ഏജന്‍സി ഔദ്യോഗികമായി അയച്ചുതന്ന റിപ്പോര്‍ട്ട് ആയതിനാല്‍ ഇ.ഡിയാണ് നല്‍കിയത് എന്ന് പറഞ്ഞ് അത് തിരിച്ചയക്കാന്‍ സര്‍ക്കാരിന് സാധിക്കില്ലെന്ന് അദ്ദേഹം വ്യക്തമാക്കി.മുന്‍പ് സോണിയ ഗാന്ധിക്കെതിരെയും രാഹുല്‍ ഗാന്ധിക്കെതിരെയും കേന്ദ്ര ഏജന്‍സികള്‍ കേസ് എടുത്തപ്പോള്‍ കോണ്‍ഗ്രസ് അതിനെ നിയമപരമായാണ് നേരിട്ടതെന്ന് മുഖ്യമന്ത്രി ഓര്‍മ്മിപ്പിച്ചു. ചോദ്യം ചെയ്യലിന് മണിക്കൂറുകളോളം അവര്‍ ഹാജരാവുകയുണ്ടായി.
അന്വേഷണ ഏജന്‍സികളോട് പൂര്‍ണ്ണമായി സഹകരിച്ച കോണ്‍ഗ്രസ്, അതില്‍ രാഷ്ട്രീയം വന്നപ്പോള്‍ രാഷ്ട്രീയം ചൂണ്ടിക്കാണിക്കുകയാണ് ചെയ്തതെന്ന് സതീശന്‍ ചൂണ്ടിക്കാട്ടി.അതേസമയം, ഇ.ഡിയുടെ കത്തിന്റെ അടിസ്ഥാനത്തില്‍ വിഷയത്തില്‍ വിജിലന്‍സ് അന്വേഷണത്തിന് ധാരണയായിട്ടുണ്ട്. കേസ് നേരിട്ട് എടുക്കണമോ അതോ പ്രാഥമിക അന്വേഷണത്തിന് ശേഷം നടപടിയിലേക്ക് കടന്നാല്‍ മതിയോ എന്ന കാര്യത്തില്‍ പ്രോസിക്യൂഷന്‍ഡയറക്ടര്‍ ജനറലില്‍ നിന്ന് സര്‍ക്കാര്‍ നിയമോപദേശം തേടിയിട്ടുണ്ട്.
https://www.facebook.com/Malayalivartha
