സോഷ്യല്‍ മീഡിയയില്‍ കുറിക്കുകൊള്ളുന്ന മറുപടിയുമായി അവതാരകയും ഇന്‍ഫ്‌ലുവന്‍സറുമായ അപര്‍ണ തോമസ്. ഇന്‍സ്റ്റാഗ്രാമില്‍ പങ്കുവെച്ച പുതിയ വീഡിയോയ്ക്ക് താഴെ വന്ന അധിക്ഷേപ കമന്റിനാണ് അപര്‍ണ തക്കതായ മറുപടി നല്‍കിയത്. 'ഇതിലും ഭേദം ഒന്നും ഇടാതെ നടക്കുന്നതായിരുന്നു' എന്നായിരുന്നു കമന്റ്. ഇതിന് മറുപടിയായി 'അടുത്ത തവണ ആവട്ടെ' എന്നായിരുന്നു അപര്‍ണയുടെ കമന്റ്. വസ്ത്രധാരണവും ബോഡി ഷെയ്മിങ്ങുമായി ബന്ധപ്പെട്ട വിഷയങ്ങളില്‍ നേരത്തെയും അപര്‍ണ ഇത്തരത്തില്‍ മറുപടി നല്‍കിയിട്ടുണ്ട്. ജീവയുമായി വേര്‍പിരിഞ്ഞ ശേഷം അപര്‍ണ തന്റെ ജോലി മാറ്റങ്ങളെക്കുറിച്ചും അനുഭവങ്ങളെ കുറിച്ചും അടുത്തിടെ തുറന്നെഴുതിയിരുന്നു. മാധ്യമരംഗം മുതല്‍ എയര്‍ ഹോസ്റ്റസ് വരെയുള്ള ജോലിയെക്കുറിച്ചും, നിലവില്‍ ഫുള്‍ടൈം കണ്‍ടെന്റ് ക്രിയേറ്ററായ ജീവിതത്തെക്കുറിച്ചും വളരെ സത്യസന്ധമായാണ് അപര്‍ണ ഇന്‍സ്റ്റാഗ്രാമിലൂടെ വ്യക്തമാക്കിയത്.

നാല് വര്‍ഷത്തോളം ഫ്‌ലൈറ്റ് അറ്റന്‍ഡന്റായി ജോലി ചെയ്ത്, ഭയമില്ലാതെ ആകാശത്ത് പറന്ന ആളായിരുന്നു താനെന്നും എന്നാല്‍ ഇന്ന് ചെറിയൊരു വിമാന കുലുക്കം ഉണ്ടായാല്‍ പോലും ജീവിതത്തിലെ തീരുമാനങ്ങളെക്കുറിച്ച് പുനര്‍വിചിന്തനം നടത്താറുണ്ടെന്നും അപര്‍ണ പറഞ്ഞിരുന്നു. ഇക്കണോമിക്‌സില്‍ രണ്ട് ബിരുദങ്ങള്‍ കൈവശമുണ്ടെങ്കിലും അവയൊന്നും കരിയറില്‍ ഉപയോഗിക്കേണ്ടി വന്നിട്ടില്ല. പത്ത് വര്‍ഷമായിട്ടും അതിലൊരു സര്‍ട്ടിഫിക്കറ്റ് യൂണിവേഴ്‌സിറ്റിയില്‍ നിന്ന് വാങ്ങിയിട്ടുപോലുമില്ലെന്ന് അപര്‍ണ വെളിപ്പെടുത്തി.

സ്വന്തം കഴിവുകള്‍ പൂര്‍ണമായി പുറത്തെടുക്കാന്‍ സാധിക്കാതെ പോകുമോ എന്ന ഭയം പ്രായം കൂടുന്തോറും കൂടുന്നുണ്ടെങ്കിലും, തന്റെ ജീവിതവഴികളെ ഏറെ സ്‌നേഹിക്കുന്നുണ്ടെന്നാണ് അപര്‍ണ പറഞ്ഞത്.