കെഎസ്ആര്‍ടിസി ബസ് ഇടിച്ച് വിദ്യാര്‍ഥിനിക്ക് ഗുരുതര പരുക്ക്
കോഴിക്കോട് തിരുവമ്പാടിയില്‍ കെഎസ്ആര്‍ടിസി ബസ് ഇടിച്ച് പ്ലസ് വണ്‍ വിദ്യാര്‍ഥിനിക്ക് ഗുരുതര പരുക്ക്. വ്യാഴാഴ്ച രാവിലെ എട്ടരയോടെ സ്റ്റാന്‍ഡിലേക്ക് നടന്നു വരികയായിരുന്ന കൂടരഞ്ഞി സെന്റ് സെബാസ്റ്റ്യന്‍സ് ഹയര്‍ സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ഥിനി മുഫീദയെ (16) ആണ് കെഎസ്ആര്‍ടിസി ബസ് ഇടിച്ചിട്ടത്. ഇടതുവശം ശ്രദ്ധിക്കാതെ സ്റ്റാന്‍ഡിലെ ട്രാക്കിലേക്ക് ഡ്രൈവര്‍ ബസ് കയറ്റാന്‍ ശ്രമിച്ചതാണ് അപകടത്തിന് കാരണമായത്. ബസിന്റെ മുന്‍ചക്രം കുട്ടിയുടെ കാല്‍പാദത്തിലൂടെ കയറിയിറങ്ങുകയായിരുന്നു.
ഡ്രൈവറുടെ അശ്രദ്ധയാണ് അപകടത്തിന് ഇടയാക്കിയതെന്നാണ് സിസിടിവി ദൃശ്യങ്ങളില്‍ നിന്നു ലഭിക്കുന്ന സൂചന. അപകടത്തില്‍പ്പെട്ട ബസിന് ഫിറ്റ്‌നസും ഇന്‍ഷുറന്‍സും ഇല്ലെന്നും കണ്ടെത്തി. 2026 ഏപ്രില്‍ 15 ന് ബസിന്റെ ഫിറ്റ്‌നസ് കാലാവധി അവസാനിച്ചു. ആറുവര്‍ഷത്തോളമായി ബസിന് ഇന്‍ഷുറന്‍സും ഇല്ല. പരുക്കേറ്റ വിദ്യാര്‍ഥിനിയെ സമീപത്തെ സ്വകാര്യ ആശുപത്രിയില്‍ പ്രവേശിപ്പിച്ച് പ്രാഥമിക ചികിത്സ നല്‍കിയ ശേഷം കോഴിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു.
https://www.facebook.com/Malayalivartha
