ആഢംബര കാര്‍ അപകടകരമായ രീതിയില്‍ ഓടിച്ച് മൂന്നുപേരുടെ മരണത്തിനിടയാക്കിയ സംഭവത്തില്‍ പ്രതികരണവുമായി ബിജെപി നേതാവും നടനുമായ മേജര്‍ രവി. പ്രതിയെ ബോസ്റ്റല്‍ സ്‌കൂളില്‍ പാര്‍പ്പിച്ചതിനെതിരെയും മേജര്‍ രവി ശക്തമായി വിമര്‍ശിച്ചു. പ്രതി സുഹൈല്‍ സജീവിന് പ്രായപൂര്‍ത്തിയായവര്‍ക്ക് ലഭിക്കുന്ന ശിക്ഷ ഉറപ്പാക്കണമെന്നാണ് അദ്ദേഹം അഭിപ്രായപ്പെട്ടത്.

'അവന്റെ അഹങ്കാരം നോക്കൂ. അഹങ്കാരമുള്ളവരെ സമൂഹം ഒറ്റപ്പെടുത്തണം. പൈസക്കാരനെന്ന് പറഞ്ഞുവരുന്നവന്റെ മോന്തയ്ക്ക് അടിക്കാനുള്ള ചങ്കൂറ്റം ഉണ്ടായിരിക്കണം. അംബാനിക്ക് പൈസയുണ്ടെന്ന് പറഞ്ഞ് എന്റെ വീട്ടില്‍ അടുപ്പ് കത്തില്ല. പണക്കാരനെ കണ്ടിട്ട് ഓച്ഛാനിച്ച് നില്‍ക്കരുത്. പണക്കാരന് അഹങ്കാരമുണ്ടെങ്കില്‍ അടിച്ചൊതുക്കാനുള്ള ചങ്കൂറ്റം വേണം'. മേജര്‍ രവി പറഞ്ഞു.

മൂന്ന് നിസഹായരായ കുട്ടികളാണ് കൊല്ലപ്പെട്ടത്. മക്കളെ ഇങ്ങനെ വളര്‍ത്തി സമൂഹത്തിന് ശാപമാക്കി മാറ്റരുത്. എന്തുചോദിച്ചാലും കൊടുക്കും എന്ന രീതി മാറ്റണം. ആത്മഹത്യ ചെയ്യുകയാണെങ്കില്‍ ചെയ്യട്ടെ. സമൂഹത്തിലെ മൂന്നുപേരെയല്ല കൊല്ലേണ്ടതെന്നും മേജര്‍ രവി വിമര്‍ശിച്ചു.