മിനി കൂപ്പര്‍ ഇടിച്ചുണ്ടായ അപകടത്തില്‍ മരിച്ച ഗോപികയുടെ രക്തസാമ്പിളുകള്‍ പോസ്റ്റ്‌മോര്‍ട്ടത്തിന് ശേഷം ശേഖരിച്ചതായി കുടുംബം ആരോപിക്കുന്നു. ഇന്ന് നടത്തിയ വാര്‍ത്താസമ്മേളനത്തിലാണ് ഗോപികയുടെ പിതാവ് എം ആര്‍ പ്രദീപ്കുമാര്‍ ഇക്കാര്യം വെളിപ്പെടുത്തിയത്. പോസ്റ്റ്‌മോര്‍ട്ടം കഴിഞ്ഞ് തുന്നിക്കെട്ടിയ ശേഷം തുന്നല്‍ അഴിച്ച് രക്തസാമ്പിളെടുത്തെന്നും അത് എന്തിനാണെന്ന് അറിയില്ലെന്നും പിതാവ് വ്യക്തമാക്കി. മുകളില്‍ നിന്ന് വിളിച്ച് പറഞ്ഞിട്ടാണ് ഇത് ചെയ്തതെന്നാണ് സിഐ പറഞ്ഞതെന്നും അദ്ദേഹം പറഞ്ഞു.

'ഗോപികയുടെ മൃതദേഹം പോസ്റ്റ്‌മോര്‍ട്ടം നടത്തിയത് അങ്കമാലി താലൂക്ക് ആശുപത്രിയിലാണ്. മറ്റ് കുട്ടികളുടേത് കളമശേരിയിലും. പറഞ്ഞ സമയം കഴിഞ്ഞ് ഒരു മണിക്കൂര്‍ വൈകിയാണ് മൃതദേഹം വിട്ടുകിട്ടിയത്. ഞങ്ങള്‍ അവിടെ ഉണ്ടായിരുന്നു. എന്തിനാണ് രക്തസാമ്പിള്‍ എടുക്കുന്നതെന്ന് ചോദിച്ചപ്പോള്‍ നിങ്ങള്‍ക്ക് ഗുണകരമാകുന്ന കാര്യത്തിനാണെന്ന് സിഐ പറഞ്ഞു. കാറില്‍നിന്നും ലഭിച്ച രക്ത സാമ്പിള്‍ ഗോപികയുടെ രക്ത സാമ്പിളുമായി താരതമ്യം ചെയ്യാനാണെന്ന് സിഐ പറഞ്ഞു. തെളിഞ്ഞാല്‍ ഇടിച്ച വാഹനം ഇതാണെന്ന് തെളിയിക്കാന്‍ എളുപ്പമാകുമെന്നാണ് പറഞ്ഞത്. പക്ഷേ ഇപ്പോള്‍ ആ കാര്യത്തില്‍ ഞങ്ങള്‍ക്ക് സംശയമുണ്ട്. ആരാണ് മുകളില്‍ നിന്ന് വിളിച്ചു പറഞ്ഞത്' പിതാവ് വ്യക്തമാക്കി.