നെടുമ്പാശ്ശേരിയിൽ മിനി കൂപ്പർ കാറിടിച്ച് മൂന്ന് പേർ മരിച്ച സംഭവം അതീവ വേദനാജനകമാണെന്നും കേസിൽ പ്രതിക്ക് നിയമം അനുശാസിക്കുന്ന പരമാവധി ശിക്ഷ ഉറപ്പാക്കുമെന്നും ആഭ്യന്തരമന്ത്രി രമേശ് ചെന്നിത്തല . പ്രതിയെ സംരക്ഷിക്കാൻ ആരെങ്കിലും ശ്രമിച്ചാൽ അനുവദിക്കില്ല. നിയമത്തിന്റെ പഴുതുകളിലൂടെ രക്ഷപ്പെടാനുള്ള സാഹചര്യം ഉണ്ടാകില്ലെന്നും അദ്ദേഹം പറഞ്ഞു

സ്കൂട്ടറിൽ യാത്ര ചെയ്തിരുന്ന ഒന്നുമറിയാത്ത മൂന്ന് കുട്ടികളുടെ ജീവനാണ് അപകടത്തിൽ നഷ്ടമായത്. കേരളത്തെ നടുക്കിയ ഈ സംഭവം ഓപ്പറേഷൻ തൂഫാന്റെ പ്രസക്തി വീണ്ടും വ്യക്തമാക്കുന്നതാണ്‌. മരിച്ചവരുടെ കുടുംബങ്ങളുടെ വേദനയും ആശങ്കയും സർക്കാരും കേരള പൊലീസും പൂർണമായി ഉൾക്കൊള്ളുന്നുണ്ട്. കുടുംബങ്ങൾക്ക് നീതി ഉറപ്പാക്കാൻ ആവശ്യമായ എല്ലാ നിയമനടപടികളും സ്വീകരിക്കുമെന്നും അദ്ദേഹം പറഞ്ഞു .

പ്രതിയെ ദുർഗുണ പരിപാലന ശാലയിലേക്ക് അയച്ചത് പൊലീസിന്റെ തീരുമാനമല്ല, കോടതിയുടെ ഉത്തരവാണ്. നിലവിലുള്ള നിയമവ്യവസ്ഥ അനുസരിച്ചാണ് കോടതി തീരുമാനമെടുത്തത്. കേസിൽ തുടർനടപടികൾ സ്വീകരിക്കുമ്പോൾ നിയമം അനുശാസിക്കുന്ന എല്ലാ ശിക്ഷയും ഉറപ്പാക്കുന്നതിനുള്ള നടപടികളാണ് കേരള പൊലീസ് സ്വീകരിക്കുന്നതെന്നും മന്ത്രി വ്യക്തമാക്കി.