കൊല്ലത്ത് പാരിപ്പള്ളി ഐഒസി ബോട്ട്‌ലിംഗ് പ്ലാന്റിലെ അതീവ സുരക്ഷാ മേഖലയിലേക്ക് കാറോടിച്ചുകയറ്റിയ മൂന്നുപേരെ പൊലീസ് പിടികൂടി. പാചകവാതകം നിറച്ച ബുള്ളറ്റ് ടാങ്കറുകള്‍ പാര്‍ക്ക് ചെയ്തിരുന്ന ഇടത്തേക്കാണ് ഇവര്‍ കാറോടിച്ചുകയറ്റിയത്. ടാങ്കറുകളില്‍ കാര്‍ ഇടിച്ചെങ്കിലും വാതക ചോര്‍ച്ച സംഭവിക്കാത്തതിനാല്‍ വന്‍ ദുരന്തം തലനാരിഴയ്ക്ക് ഒഴിവാകുകയായിരുന്നു. പരവൂര്‍ കലയ്‌ക്കോട് സ്വദേശികളാണ് കാറില്‍ ഉണ്ടായിരുന്നതെന്നാണ് പൊലീസ് പറയുന്നത്. ഇവരെ ചോദ്യംചെയ്യുന്നത് തുടരുകയാണ്. കാര്‍ ഏറക്കുറെ പൂര്‍ണമായും തകര്‍ന്നിട്ടുണ്ട്. സംഭവത്തെക്കുറിച്ച് പൊലീസ് അന്വേഷണം ആരംഭിച്ചു. അട്ടിമറി സാദ്ധ്യതയും പരിശോധിക്കുന്നുണ്ട്.

ഇന്നലെ രാത്രി എട്ടരയോടെയായിരുന്നു സംഭവം. ബോട്ട്‌ലിംഗ് പ്ലാന്റിലേക്ക് പാചകവാതകവുമായി എത്തിയ 20 ബുള്ളറ്റ് ടാങ്കറുകള്‍ യാഡില്‍ നിര്‍ത്തിട്ടിരിക്കുമ്പോഴായിരുന്നു അതിവേഗത്തില്‍ എത്തിയ കാര്‍ ടാങ്കറുകള്‍ക്ക് ഇടയിലേക്ക് പാഞ്ഞുകയറിയത്.ഗേറ്റിലും മറ്റും ഇടിച്ച് പാഞ്ഞ കാര്‍ ടാങ്കറുകളിലും ഇടിച്ചു. എന്നാല്‍ വാല്‍വുകളില്‍ തട്ടാത്തതിനാല്‍ വാതകച്ചോര്‍ച്ച ഉണ്ടായില്ല. കാറിന്റെ മരണപ്പാച്ചില്‍ കണ്ട് സുരക്ഷാ ജീവനക്കാര്‍ ഓടിയെത്തിയെങ്കിലും അവര്‍ക്ക് തടയാനായില്ല. ഒടുവില്‍ കാര്‍ നിന്നതോടെയാണ് മൂവരെയും പിടികൂടിയത്.

15 മുതല്‍ 18 ടണ്‍ വരെ പാചകവാതകം നിറച്ചിരുന്ന ടാങ്കറുകളാണ് യാഡില്‍ കിടന്നിരുന്നത്. അതിനാല്‍ത്തന്നെ വാതകച്ചോര്‍ച്ചയോ, പാചകവാതകം നിറച്ച ടാങ്കറിന് സമീപം ഉണ്ടാകുന്ന ചെറിയൊരു തീപ്പൊരിയോ പോലും വലിയ ദുരന്തത്തിന് വഴിവയ്ക്കാവുന്ന സാഹചര്യമായിരുന്നു. എന്നാല്‍ കാര്‍ ഇടിച്ചുകയറി ടാങ്കറുകള്‍ക്ക് ചെറിയ കേടുപാടുകള്‍ സംഭവിച്ചതല്ലാതെ മറ്റുപ്രശ്‌നങ്ങള്‍ ഒന്നും ഉണ്ടായില്ല.