മഹാഭാരതത്തിലെ കർണനെക്കുറിച്ച് കേട്ടിട്ടുണ്ട്. എന്നാൽ ഇന്ത്യൻ നീതിന്യായ ചരിത്രത്തിൽ മറ്റൊരു കർണനുണ്ട്. ജഡ്ജിമാരുടെ നടപടികളെ ചോദ്യം ചെയ്തും സുപ്രീംകോടതിയുമായി നേരിട്ട് ഏറ്റുമുട്ടിയും ഒടുവിൽ അതേ സുപ്രീംകോടതിയിൽനിന്ന് ആറുമാസത്തെ തടവുശിക്ഷ ഏറ്റുവാങ്ങിയും ചരിത്രത്തിൽ ഇടംപിടിച്ച ജസ്റ്റിസ് സി.എസ്. കർണൻ. കോടതിയലക്ഷ്യക്കേസിൽ തടവുശിക്ഷയ്ക്ക് വിധിക്കപ്പെട്ട ആദ്യ സിറ്റിങ് ഹൈക്കോടതി ജഡ്ജി. വിവാദങ്ങളും നിയമപോരാട്ടങ്ങളും നിറഞ്ഞ ആ ജീവിതത്തിന് ഇപ്പോൾ അന്ത്യമായിരിക്കുന്നു. ജസ്റ്റിസ് സി.എസ്. കർണൻ അന്തരിച്ചു. 71 വയസ്സായിരുന്നു. രോഗബാധിതനായി ചെന്നൈയിലെ ആശുപത്രിയിൽ ചികിത്സയിലിരിക്കെ നവംബർ 13 വെള്ളിയാഴ്ച രാവിലെയാണ് അന്ത്യം.

1955-ൽ തമിഴ്നാട്ടിലെ കടലൂർ ജില്ലയിലെ കർണാത്തം ഗ്രാമത്തിൽ സ്വാമിനാഥൻ–കമലം ദമ്പതികളുടെ എട്ടുമക്കളിൽ രണ്ടാമനായാണ് കർണൻ ജനിച്ചത്. കരുണാനിധി എന്നായിരുന്നു ആദ്യത്തെ പേര്. ഭാര്യ സരസ്വതിയുടെ ആഗ്രഹപ്രകാരം 1991-ൽ പേര് സി.എസ്. കർണൻ എന്നാക്കി മാറ്റി. 1983-ൽ ചെന്നൈ ലോ കോളജിൽനിന്ന് നിയമപഠനം പൂർത്തിയാക്കിയ അദ്ദേഹം അഭിഭാഷകനായി ഔദ്യോഗിക ജീവിതം ആരംഭിച്ചു. നീതിന്യായ വ്യവസ്ഥയുടെ ഭാഗമായുള്ള അദ്ദേഹത്തിന്റെ യാത്ര 2009 മാർച്ചിൽ മദ്രാസ് ഹൈക്കോടതി ജഡ്ജിയായി നിയമിതനായതോടെയാണ് പുതിയ ഘട്ടത്തിലെത്തിയത്. 2011 മാർച്ചിൽ സ്ഥിരം ജഡ്ജിയായി. 2016 മാർച്ചിൽ കൊൽക്കത്ത ഹൈക്കോടതിയിലേക്ക് സ്ഥലംമാറ്റം ലഭിച്ചു.

എന്നാൽ ജസ്റ്റിസ് കർണന്റെ പേര് ദേശീയതലത്തിൽ ചർച്ചയായത് അദ്ദേഹത്തിന്റെ നിയമനങ്ങളിലൂടെയല്ല, കോടതികളുമായുള്ള അസാധാരണമായ ഏറ്റുമുട്ടലുകളിലൂടെയായിരുന്നു. സഹജഡ്ജിമാർക്കെതിരെ ജാതിവിവേചനവും അഴിമതിയും ആരോപിച്ച് അദ്ദേഹം രംഗത്തെത്തി. സുപ്രീംകോടതിയിലെ മുതിർന്ന ജഡ്ജിമാർക്കെതിരെയും ആരോപണങ്ങൾ ഉന്നയിച്ചു. 2017 ജനുവരിയിൽ പ്രധാനമന്ത്രിക്ക് കത്തയച്ച് ഇരുപതോളം ജഡ്ജിമാർക്കെതിരെ അഴിമതി ആരോപണം ഉന്നയിച്ചത് വലിയ വിവാദമായി. ഇതിനുപിന്നാലെ സുപ്രീംകോടതി സ്വമേധയാ കോടതിയലക്ഷ്യ നടപടികൾ ആരംഭിച്ചു.

എന്നാൽ കോടതിയുടെ നടപടികളോട് സഹകരിക്കുന്നതിന് പകരം കർണൻ സ്വീകരിച്ച നിലപാടുകൾ ഏറ്റുമുട്ടൽ കൂടുതൽ രൂക്ഷമാക്കി. സുപ്രീംകോടതി ചീഫ് ജസ്റ്റിസ് ജെ.എസ്. ഖേഹർ ഉൾപ്പെടെയുള്ള ജഡ്ജിമാർക്കെതിരെ അദ്ദേഹം തന്നെ ഉത്തരവുകൾ പുറപ്പെടുവിച്ചു. സുപ്രീംകോടതി ജഡ്ജിമാർക്കെതിരെ ശിക്ഷാനടപടികൾ പ്രഖ്യാപിക്കുന്നതുവരെയെത്തി കാര്യങ്ങൾ. ഒടുവിൽ ഏഴംഗ സുപ്രീംകോടതി ബെഞ്ച് 2017 മേയ് ഒൻപതിന് അദ്ദേഹത്തെ കോടതിയലക്ഷ്യക്കുറ്റത്തിൽ കുറ്റക്കാരനായി കണ്ടെത്തി ആറുമാസത്തെ തടവുശിക്ഷ വിധിച്ചു. ഒരു സിറ്റിങ് ഹൈക്കോടതി ജഡ്ജിക്ക് സുപ്രീംകോടതി തടവുശിക്ഷ വിധിക്കുന്ന ആദ്യ സംഭവമായിരുന്നു അത്.

ശിക്ഷാവിധിക്ക് പിന്നാലെ കർണനെ കണ്ടെത്താനായില്ല. ഇതിനിടെ ജൂണിൽ അദ്ദേഹം വിരമിച്ചു. ജൂൺ 21-ന് കൊയമ്പത്തൂരിൽനിന്ന് കൊൽക്കത്ത പൊലീസ് അറസ്റ്റ് ചെയ്തു. ആറുമാസത്തെ ശിക്ഷ പൂർത്തിയാക്കിയ അദ്ദേഹം 2017 ഡിസംബറിൽ ജയിൽമോചിതനായി. എന്നാൽ വിവാദങ്ങൾ അവിടെയും അവസാനിച്ചില്ല. 2018-ൽ രാഷ്ട്രീയ പാർട്ടി രൂപീകരിച്ച് ലോക്സഭാ തിരഞ്ഞെടുപ്പിൽ മത്സരിക്കാനുള്ള താൽപര്യം പ്രഖ്യാപിച്ചു. 2020-ൽ ജഡ്ജിമാർക്കും വനിതാ ജുഡീഷ്യൽ ഓഫീസർമാർക്കുമെതിരെ അപകീർത്തികരമായ പരാമർശങ്ങളുള്ള വീഡിയോകളുമായി ബന്ധപ്പെട്ട് ചെന്നൈ പൊലീസിന്റെ അറസ്റ്റും നേരിട്ടു.

ഒരു ജഡ്ജിയുടെ ജീവിതത്തിൽ സംഭവിക്കാവുന്ന അസാധാരണമായ അധ്യായങ്ങൾക്കാണ് ജസ്റ്റിസ് സി.എസ്. കർണൻ സാക്ഷിയായത്. നീതിന്യായ ചരിത്രത്തിൽ അദ്ദേഹത്തിന്റെ പേര് എന്നും ചർച്ച ചെയ്യപ്പെടുക കോടതിയലക്ഷ്യക്കേസിലെ ആ ചരിത്രപരമായ ശിക്ഷാവിധിയിലൂടെയായിരിക്കും. വിവാദങ്ങൾക്കിടയിലും ഇന്ത്യൻ നീതിന്യായ ചരിത്രത്തിൽ വേറിട്ടൊരു അധ്യായം എഴുതിച്ചേർത്ത ജസ്റ്റിസ് സി.എസ്. കർണന് വിട.