അറിവിന്റെ ആകാശത്തേക്ക് സർഗാത്മകതയുടെ വർണച്ചിറകുകൾ വിടർത്തി, സംസ്ഥാന സ്കൂൾ ശാസ്ത്രോത്സവത്തിന്റെ മഹാവിരുന്നിന് മണ്ണാർക്കാട്ട് തുടക്കം....

അറിവിന്റെ ആകാശത്തേക്ക് സർഗാത്മകതയുടെ വർണച്ചിറകുകൾ വിടർത്തി, സംസ്ഥാന സ്കൂൾ ശാസ്ത്രോത്സവത്തിന്റെ മഹാവിരുന്നിന് മണ്ണാർക്കാട്ട് ആരംഭം. ഇന്ന് മുതൽ നാലുദിനം ഇവിടെ കുരുന്നുപ്രതിഭകൾ അറിവുകളുടെ പുതു വിസ്മയങ്ങൾ തീർക്കും.
ശാസ്ത്രത്തിന്റെ കൗതുകങ്ങളും ഗണിതത്തിന്റെ യുക്തിഭംഗിയും സാങ്കേതികവിദ്യയുടെ വിസ്മയങ്ങളും ഒത്തുചേരുന്ന മഹാമേളയുടെ വരവറിയിച്ച് നഗരവീഥികളിൽ ആവേശത്തിന്റെ അലകളുയർത്തി വർണാഭമായ വിളംബര ജാഥ അരങ്ങേറുകയും ചെയ്തു. 1500ഓളം വിദ്യാർഥികളും സാംസ്കാരിക പ്രവർത്തകരും അണിനിരന്ന ജാഥ മേളയുടെ ആവേശവും പ്രതീക്ഷയും വിളിച്ചോതുന്ന ജനകീയ ആഘോഷമായി മാറി. വിദ്യാഭ്യാസമന്ത്രി എൻ. ഷംസുദ്ദീന്റെ നാട്ടിൽ നടക്കുന്ന മേളക്ക് വിപുലമായ സംവിധാനങ്ങളാണ് ഒരുക്കിയിട്ടുള്ളത്.
മേളയുടെ ഓരോ തുടിപ്പും വിശേഷങ്ങളും ലോകത്തിന്റെ മുന്നിലെത്തിക്കാനുള്ള മീഡിയ പവലിയനും പ്രവർത്തനസജ്ജമായി. പവലിയന്റെ ഉദ്ഘാടനം സുമേഷ് അച്യുതൻ എം.എൽ.എ നിർവഹിക്കുകയായിരുന്നു.
മത്സരത്തിനെത്തുന്ന വിദ്യാർഥികൾക്കും മറ്റുള്ളവർക്കുമായി തെങ്കര അരയങ്കോട് യൂനിറ്റി എ.യു.പി സ്കൂളിൽ സജ്ജീകരിച്ച ഊട്ടുപുരയുടെ പാലുകാച്ചൽ മന്ത്രി എൻ. ഷംസുദ്ദീൻ നിർവഹിച്ചു. പ്രശസ്ത പാചക വിദഗ്ധൻ പഴയിടം മോഹനൻ നമ്പൂതിരിയുടെ മേൽനോട്ടത്തിൽ 22,000ത്തിലധികം പേർക്കുള്ള വിഭവസമൃദ്ധമായ ഭക്ഷണമാണ് ഇവിടെ ഒരുങ്ങുന്നത്. രുചിയുടെ വൈവിധ്യത്തിനൊപ്പം പ്രകൃതിയോടുള്ള കരുതലും വിളമ്പുന്ന ഊട്ടുപുരയിൽ ഹരിതചട്ടം കർശനമായി പാലിക്കുന്നതാണ്.
"
https://www.facebook.com/Malayalivartha























