സൗമ്യ വധക്കേസിലെ സുപ്രീം കോടതിയുടെ വിധി നെഞ്ച് പൊട്ടുന്ന വിധിയെന്ന് സൗമ്യയുടെ അമ്മ സുമതി. എന്തു കൊണ്ട് സുപ്രീം കോടതി ഇത്തരത്തിലൊരു വിധി പറഞ്ഞെന്ന് മനസിലാവുന്നില്ല. നെഞ്ച് പൊട്ടുന്ന വിധിയാണ് സുപ്രീം കോടതിയുടെ ഭാഗത്ത് നിന്നുണ്ടായതെന്നും തന്റെ കുഞ്ഞിന് നീതി കിട്ടിയില്ലെന്നും സുമതി പറഞ്ഞു.

സര്‍ക്കാര്‍ ഭരണം മാറിയപ്പോള്‍ വക്കീലിനെ മാറ്റിയതും ഒന്നും അറിഞ്ഞില്ല. സുപ്രീം കോടതിയില്‍ കേസെത്തിയപ്പോള്‍ ഒന്നും അറിയാത്ത വക്കീലിനെ കൊണ്ടു നിര്‍ത്തി കേസ് കൂട്ടികൊഴച്ചതെന്തെന്ന് എനിക്കിറിയില്ല. ഇതിന്റെ പിന്നില്‍ ആരോ ഉണ്ട് അല്ലാതെ ഇങ്ങനെ സംഭവിക്കില്ല. ഒന്നും അറിയാത്ത ഒരു വക്കീലിനെ സുപ്രീം കോടതിയില്‍ കൊണ്ടു നിര്‍ത്തി എന്റെ കുട്ടീടെ കേസ് കുഴച്ചു മറിച്ചില്ലേ. നീതിക്കായ് ഏതറ്റം വരേയും പോകും. ഇത്തരത്തില്‍ കേസ് മാറിമറഞ്ഞല്ലോ. എന്ത് തെളിവാണ് ഇനിയും വേണ്ടത്.

അവളുടെ നഖത്തിനിടയില്‍ നിന്ന് അയാളുടെ തൊലിയുടെ അംശം കിട്ടിയതല്ലേ, മുടി കിട്ടിയില്ലേ. ഇനീം എന്ത് തെളിവാണ് വേണ്ടത്. ഇനിയൊരു സൗമ്യയും ഉണ്ടാവരുതെന്നാണ് ആഗ്രഹിച്ചത്, പക്ഷേ നീതി കിട്ടിയില്ല. നീതി കിട്ടുമെന്ന് പ്രതീക്ഷിച്ചു. പക്ഷേ നീതി കിട്ടിയില്ല. നീതിക്ക് വേണ്ടി പോരാടാന്‍ കഴിയുന്നത്രയും പോരാടുമെന്നു സുമതി പറഞ്ഞു.