സംസ്ഥാനത്ത് സ്ത്രീപീഡനക്കേസുകളിലെ കോടതി നടപടികള്‍ ഇഴയുന്നതിനാല്‍ നീതി കിട്ടാത്ത ഇരകളുടെ എണ്ണം കൂടി വരികയാണ്. പ്രായപൂര്‍ത്തിയാകും മുന്‍പേ കൂട്ട ബലാത്സംഗത്തിനിരയായ മലപ്പുറം അരീക്കോട് സ്വദേശിനിയായ 24കാരി ഇതിന് ഒരുദാഹരണം മാത്രം. മയക്കുമരുന്നിനിരയാക്കി പെണ്‍വാണിഭസംഘം പിച്ചിച്ചീന്തിയ പെണ്‍കുട്ടിയുടെ കേസ് 6 വര്‍ഷമായിട്ടും വിചാരണ പോലും തുടങ്ങാതെ കോടതിയില്‍ കെട്ടിക്കിടക്കുകയാണ്. 40 പേര്‍ ബലാത്സംഗം ചെയ്‌തെങ്കിലും പ്രതിപ്പട്ടികയില്‍ ഉള്‍പ്പെട്ടത് 9 പേര്‍ മാത്രമാണെന്ന് പെണ്‍കുട്ടി വെളിപ്പെടുത്തി.

പതിനാലാം വയസ്സില്‍ അയല്‍വാസിയാണ് അവളെ ആദ്യം ബലാത്സംഗം ചെയ്തത്. പിന്നെ അയാളുടെ സുഹൃത്തുക്കള്‍. ജോലി വാഗ്ദാനം ചെയ്ത് കോഴിക്കോട്ടെത്തിച്ച അവളെ മയക്കുമരുന്നിന് അടിമയാക്കി വരുതിയില്‍ത്തന്നെ നിര്‍ത്തി അവര്‍ പലര്‍ക്കും കാഴ്ച വച്ചു. ലഹരിയുടെ ആഴങ്ങളില്‍ ശരീരവും മനസ്സും ഛിന്നഭിന്നമായ ആ കാലത്ത് അവള്‍ ഗര്‍ഭിണിയായി.

അതും പതിനേഴാം വയസ്സില്‍. ഗര്‍ഭകാലത്തിന്റെ 9 മാസം വരെ സംഘം അവളെ പെണ്‍വാണിഭത്തിന് ഉപയോഗിച്ചു. പ്രസവമടുത്തപ്പോള്‍ മാത്രം പെണ്‍വാണിഭ സംഘത്തില്‍ നിന്നും രക്ഷപ്പെടാന്‍ കഴിഞ്ഞ അവള്‍ 2011ല്‍ കുട്ടിയുണ്ടായതിന് ശേഷമാണ് കേസ് നല്‍കിയത്. കൂട്ടബലാത്സംഗക്കേസില്‍ ആകെ 9 പ്രതികള്‍. നാലാം പ്രതിയായ സുഹൈല്‍ തങ്ങള്‍ കോഴിക്കോട്ട് ബംഗ്ലാദേശി പെണ്‍കുട്ടികളെ ഉപയോഗിച്ചുളള വാണിഭക്കേസിലും പ്രതിയാണ്. തന്നെ പിച്ചിച്ചീന്തിയ പലരും മാന്യതയുടെ മുഖംമൂടിയണിഞ്ഞ് ചുറ്റുപാടുമുണ്ടെന്നും അവരിലേക്കൊന്നും അന്വേഷണം നീണ്ടില്ലെന്നും പെണ്‍കുട്ടി ആരോപിക്കുന്നു.

6 വര്‍ഷം കഴിഞ്ഞും കേസ് പ്രരംഭ ദശയില്‍ തന്നെ തുടരുമ്പോള്‍ കോടതിമുറിയിലെ ചുവപ്പുനാടയില്‍ കുരുങ്ങിയ നീതിയില്‍ അവള്‍ക്ക് പ്രതീക്ഷയില്ലാതായിക്കഴിഞ്ഞു. പീഡനകാലത്തിന്റെ ബാക്കിപത്രമായി അവള്‍ക്കിപ്പോള്‍ 6 വയസ്സായ ഒരു പെണ്‍കുട്ടിയുണ്ട്. കുട്ടിയുടെ പിതൃത്വം കണ്ടെത്തി അയാളില്‍ നിന്നും ജീവനാംശം നേടിയെടുക്കണമന്നാണ് അവളുടെ ആഗ്രഹം.

കഴിഞ്ഞ 10 വര്‍ഷത്തിനിടെ കേരളത്തില്‍ സത്രീകള്‍ക്കെതിരായ ബലാത്സംഗക്കേസുകള്‍ മൂന്നിരട്ടിയും കുട്ടികള്‍ക്കെതിരായ ബലാത്സംഗക്കേസുകള്‍ അഞ്ചിരട്ടിയുമായാണ് കൂടിയത്. എന്നാല്‍ കോടതികളില്‍ നിന്നും തീര്‍പ്പുണ്ടാകുന്ന കേസുകളുടെ എണ്ണം നാമമാത്രമാവും. നീതിദേവതയുടെ കടാക്ഷം കിട്ടാന്‍ വൈകുന്നിടത്താണ് കുറ്റവാളികളുടെ കൂസലില്ലായ്മ കൂടുന്നത്, കുറ്റങ്ങളുടെ എണ്ണവും.