സൈന്യത്തിന് ഏറെ അഭിനന്ദനം നേടിക്കൊടുത്തതാണ് സര്‍ജിക്കല്‍ അറ്റാക്ക്. എന്നാല്‍ അതിന് പ്രേരിപ്പിച്ച ഘടകം തുറന്ന് പറയുകയാണ് മുന്‍ പ്രതിരോധമന്ത്രിയും ഗോവ മുഖ്യമന്ത്രിയുമായ മനോഹര്‍ പരീക്കര്‍. കേന്ദ്ര വാര്‍ത്താവിതരണ സഹമന്ത്രി രാജ്യവര്‍ധന്‍ സിങ് റാത്തോഡിനോടുള്ള ടെലിവിഷന്‍ അവതാരകന്റെ ചോദ്യമാണ് പാക്ക് അധീനകശ്മീരില്‍ മിന്നലാക്രമണം നടത്താന്‍ പ്രേരിപ്പിച്ചതെന്ന് മനോഹര്‍ പരീക്കര്‍ പറഞ്ഞു. പനജിയില്‍ നടന്ന വ്യവസായികളുടെ യോഗത്തിലായിരുന്നു പരീക്കറിന്റെ പ്രസ്താവന.

2016 സെപ്റ്റംബര്‍ 29 ലെ മിന്നലാക്രമണത്തിനായി 15 മാസങ്ങള്‍ക്കു മുമ്പുുതന്നെ പദ്ധതിയിട്ടിരുന്നുവെന്നും അദ്ദേഹം പറഞ്ഞു. 2015 ല്‍ മണിപ്പൂരില്‍ എന്‍എസ്‌സിഎന്‍ കെ നടത്തിയ ഒളിയാക്രമണത്തിനു മറുപടിയായി ഇന്ത്യ നല്‍കിയ തിരച്ചടിയെക്കുറിച്ച് വിശദീകരിക്കുമ്പോഴാണ് രാജ്യവര്‍ധന്‍ സിങ് റാത്തോഡിനെ അവതാരകന്‍ പരിഹസിച്ചത്.

2015 ജൂണ്‍ നാലിനാണ് ഭീകരഗ്രൂപ്പായ എന്‍എസ്‌സിഎന്‍ കെ മണിപ്പൂരിലെ ചന്ദല്‍ ജില്ലയില്‍വച്ച് ഇന്ത്യന്‍ സൈനിക വ്യൂഹത്തിനെതിരെ ആക്രമണം നടത്തിയത്. ഈ ആക്രമണത്തില്‍ 18 സൈനികരാണ് കൊല്ലപ്പെട്ടത്. 200 പേരുമാത്രമുള്ള ചെറിയൊരു ഭീകരസംഘടനയാണ് 18 ദോഗ്ര സൈനികരെ കൊലപ്പെടുത്തിയത്. ഇതറിഞ്ഞപ്പോള്‍ അപമാനിതനായപോലെ തോന്നി. തുടര്‍ന്നാണ് മ്യാന്‍മര്‍ അതിര്‍ത്തിയില്‍ നടത്തിയ ആദ്യ മിന്നലാക്രമണത്തിനുള്ള തയാറെടുപ്പുകള്‍ നടത്തിയത്. ജൂണ്‍ എട്ടിന് ഇന്ത്യ, മ്യാന്‍മര്‍ അതിര്‍ത്തിയില്‍ മിന്നലാക്രമണം നടത്തി. 70-80 ഭീകരരാണ് ആക്രമണത്തില്‍ കൊല്ലപ്പെട്ടത്. ഇതിനായി ഹെലിക്കോപ്റ്ററുകള്‍ ഉപയോഗിച്ചിരുന്നുവെന്ന റിപ്പോര്‍ട്ടുകള്‍ അദ്ദേഹം തള്ളി. ഹെലിക്കോപ്റ്ററുകള്‍ ഉപയോഗിച്ചില്ല. എന്നാല്‍ അടിയന്തര സാഹചര്യമുണ്ടായാല്‍ ഉപയോഗിക്കുന്നതിനായി ഹെലിക്കോപ്റ്ററുകള്‍ തയാറാക്കി നിര്‍ത്തിയിരുന്നുവെന്നും പരീക്കര്‍ പറ!ഞ്ഞു. 

അതേസമയം, മ്യാന്‍മര്‍ അതിര്‍ത്തിയിലെ സൈനികനീക്കങ്ങളെക്കുറിച്ച് സൈനികന്‍ കൂടിയായ രാജ്യവര്‍ധന്‍ സിങ് റാത്തോഡ് വിശദീകരിക്കുന്നതിനിടെ, വെസ്‌റ്റേണ്‍ ഫ്രണ്ടിനെതിരെ ആക്രണം നടത്താന്‍ ധൈര്യമുണ്ടോയെന്നൊരു ടെലിവിഷന്‍ അവതാരകന്‍ ചോദിച്ചിരുന്നു. അദ്ദേഹത്തിന്റെ ആ പരിഹാസം എന്നെ വളരെയധികം വിഷമിപ്പിച്ചു. അതാണ് പാക്ക് അധിനിവേശ കശ്മീരില്‍ മിന്നലാക്രമണം നടത്തുന്നതിലേക്ക് നയിച്ചത്. എന്നാല്‍ ഉടനടി തിരിച്ചടി നല്‍കേണ്ടെന്നും കുറച്ചു കാത്തിരിക്കാനുമാണ് തീരുമാനിച്ചത്. തുടര്‍ന്നാണ് 2016 സെപ്റ്റംബര്‍ 29ന് വെസ്‌റ്റേണ്‍ ഫ്രണ്ടിനെതിരെ മിന്നലാക്രമണം നടത്തിയത്. 15 മാസങ്ങള്‍ക്കു മുന്‍പുതന്നെ ഇതിനുവേണ്ട തയാറെടുപ്പുകള്‍ നടത്തിയിരുന്നു. കൂടുതല്‍ സൈനികര്‍ക്ക് പരിശീലനം നടത്തി. മുന്‍ഗണനാ ക്രമത്തില്‍ ആയുധങ്ങള്‍ വാങ്ങി. ഡിആര്‍ഡിഒ വികസിപ്പിച്ച സ്വാതി ആയുധനിര്‍ണയ റഡാര്‍ ഉപയോഗിച്ചാണ് പാക്ക് മേഖലകള്‍ കണ്ടെത്തിയതെന്നും പരീക്കര്‍ വ്യക്തമാക്കി.