പൊലീസിന്റെ പ്രദേശിക നിരീക്ഷണസംവിധാനം ശക്തിപ്പെടുത്തണമെന്ന് മുഖ്യമന്ത്രി പിണറായി വിജയന്‍ പറഞ്ഞു. നിയമ ക്രമപാലനത്തിന്റെ ഭാഗമായുള്ള ഇടപെടല്‍ മാത്രമല്ല, ഓരോ പ്രദേശവുമായും നിരന്തരബന്ധം വേണം. അവിടുത്തെ പ്രശ്‌നങ്ങളെക്കുറിച്ച് നാട്ടുകാരെപ്പോലെ കൃത്യമായ ധാരണയുണ്ടാക്കാനും മേല്‍പ്പോട്ട് റിപ്പോര്‍ട്ട് ചെയ്യാനും കഴിയണമെന്നും അദ്ദേഹം പറഞ്ഞു.  മാങ്ങാട്ടുപറമ്പില്‍ കെഎപി നാലാം ബറ്റാലിയന്റെയും മലബാര്‍ സ്‌പെഷ്യല്‍ പൊലീസിന്റെയും പാസിങ് ഔട്ട് പരേഡില്‍ സല്യൂട്ട് സ്വീകരിച്ച് സംസാരിക്കുകയായിരുന്നു മുഖ്യമന്ത്രി. ചില വിഭാഗങ്ങള്‍ ചില പ്രദേശങ്ങളില്‍നിന്ന് റിക്രൂട്ട് ചെയ്ത് മറ്റു ചിലയിടങ്ങളില്‍ തീവ്രവാദപ്രവര്‍ത്തനത്തിന് നേതൃത്വം നല്‍കുന്ന സംഭവങ്ങളുണ്ടായി.

ക്രിമിനല്‍ പ്രവര്‍ത്തനം സംഘടിപ്പിക്കാന്‍ മറ്റു സ്ഥലങ്ങളില്‍നിന്ന് ആളെയെത്തിക്കുന്ന ഗുരുതരമായ പ്രവണതകളും നാട്ടില്‍ നടക്കുന്നുണ്ട്. ജനങ്ങള്‍ക്കിടയില്‍ ചേരിതിരിവ് സൃഷ്ടിച്ച് കലാപമുണ്ടാക്കി തങ്ങള്‍ക്ക് ചില്ലറ കരുത്ത് വര്‍ധിപ്പിക്കാനാകുമെന്ന ദുഷ്ടചിന്തയുള്ളവരും സമൂഹത്തിലുണ്ട്. ഇത്തരം നീക്കങ്ങളെ നേരത്തെ കണ്ടെത്തണം. ജനമൈത്രി പൊലീസ് കടലാസില്‍ ഒതുങ്ങേണ്ടതല്ല. പുതിയ സമീപനം വേണമെന്ന് സേനയില്‍നിന്നു തന്നെ ആവശ്യമുയര്‍ന്നിട്ടുണ്ട്. പഴയ അതേ ചിന്തയില്‍ പ്രവര്‍ത്തിക്കേണ്ട വിഭാഗമല്ല പൊലീസ്. നമ്മുടെ രാജ്യത്ത് നേരത്തെ വിദേശാധിപത്യമായിരുന്നു. ബ്രിട്ടീഷുകാര്‍ ജനങ്ങളെ ശത്രുക്കളായാണ് കണ്ടിരുന്നത്. ജനങ്ങളെ ഒതുക്കാനുള്ള സംവിധാനമായാണ് പൊലീസിനെ ഉപയോഗിച്ചത്. അതിന് ഉതകുന്ന സമ്പ്രദായങ്ങളാണ് പൊലീസ് സ്വായത്തമാക്കിയിരുന്നത്. എംഎസ്പിയും ഇത്തരത്തില്‍ രൂപം കൊണ്ടതാണ്. ആ ഘട്ടം കടന്നുപോയി. സ്വാതന്ത്യ്രം നേടി പതിറ്റാണ്ടുകള്‍ പിന്നിട്ടിട്ടും പഴയ ശീലങ്ങളില്‍നിന്ന് പൂര്‍ണമുക്തമാവാന്‍ കഴിഞ്ഞിട്ടില്ല.

1957ല്‍ നിലവില്‍ വന്ന ആദ്യ സര്‍ക്കാര്‍ പൊലീസിന് ജനകീയമുഖം നല്‍കാന്‍ ശ്രമിച്ചു. അരനൂറ്റാണ്ട് പിന്നിട്ടിട്ടും പഴയ ശീലങ്ങള്‍ പലപ്പോഴും തികട്ടി വരുന്നു. ജനാധിപത്യ സമൂഹത്തിന് ഇണങ്ങുന്നതാവണം പൊലീസിന്റെ പ്രവര്‍ത്തനങ്ങളെന്നും മുഖ്യമന്ത്രി പറഞ്ഞു.