മകളുടെ വിവാഹം നടത്തി മൂന്നാം നാള് ട്രെയിനടിയില് പെട്ട് പിതാവിന് ദാരുണാന്ത്യം
മകളുടെ വിവാഹത്തിനുശേഷം സന്തോഷത്തോടെ മടങ്ങിയ പിതാവ് ട്രെയിനടിയില്പ്പെട്ടു മരിച്ചു. നവി മുംബൈ ബില്ഡിങ് നമ്പര്13, സെക്ടര് നമ്പര് 10, മഹാലക്ഷ്മി അപ്പാര്ട്ട്മെന്റില് അശോക് വൈ. അതാക്(50) ആണ് മരിച്ചത്. ബാഗുമായി ട്രെയിനില് കയറാന് ശ്രമിക്കുന്നതിനിടയില് കാല് വഴുതി ട്രെയിനും പ്ലാറ്റ്ഫോമിനും ഇടയിലേക്ക് വീഴുകയായിരുന്നു.
ഉടന് തന്നെ ട്രെയിന് നിര്ത്തിച്ചെങ്കിലും രണ്ടു കൈകളും അറ്റുപോയിരുന്നു. ഇന്നലെ ഉച്ചക്ക് 12 മണിയോടെ കായംകുളം റെയില്വേ സ്റ്റേഷനിലായിരുന്നു അപകടം. ഇദ്ദേഹത്തിന്റെ മകള് നിഖിതകയും ഓച്ചിറ പ്രയാര് വടക്ക് ചെറുകാട്ട് പടീറ്റതില് സുബിനുമായുള്ള വിവാഹം വെള്ളിയാഴ്ച ദേവികുളങ്ങര ക്ഷേത്രത്തിലായിരുന്നു നടന്നത്. വിവാഹം നടത്തുന്നതിനായി ബന്ധുക്കളോടൊപ്പം എത്തിയതായിരുന്നു അശോക്.
മുംബൈക്ക് മടങ്ങാന് ബന്ധുക്കളോടൊപ്പം റെയില്വേ സ്റ്റേഷനിലെത്തി. ലോകമാന്യതിലക് നേത്രാവതി എക്സ്പ്രസ് ട്രെയിനില് ബന്ധുക്കള് കയറിയപ്പോഴേക്കും ട്രെയിന് നീങ്ങിത്തുടങ്ങി. തുടര്ന്ന് ഓടിവന്നു കയറാന് ശ്രമിക്കുന്നതിനിടയിലായിരുന്നു കാല് വഴുതിപ്പോയത്.
ആര്.പി.എഫ്. ഉദ്യോഗസ്ഥന് മധുസൂദനനും പോര്ട്ടര്മാരും ചേര്ന്ന് അശോകിനെ പുറത്തെടുത്ത് ശേഷം താലൂക്ക് ആശുപത്രിയില് എത്തിച്ചു. പ്രാഥമിക ശുശ്രൂഷകള്ക്കു ശേഷം അറ്റുപോയ കൈകള് ഐസ് നിറച്ച പെട്ടികളിലാക്കി അശോകിനെ എറണാകുളത്തെ സ്വകാര്യ ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരിച്ചു. അശോകിന്റെയും മരുമകന്റെയും കുടുംബങ്ങള് മുംബൈയില് സ്ഥിരതാമസക്കാരാണ്.
https://www.facebook.com/Malayalivartha
