വ്യാജരേഖകളുണ്ടാക്കി വന്‍തുക യാത്രപ്പടി കൈപ്പറ്റിയെന്ന ആരോപണത്തില്‍ തിരുവിതാംകൂര്‍ ദേവസ്വം ബോര്‍ഡ് മുന്‍ പ്രസിഡന്റ് പ്രയാര്‍ ഗോപാലകൃഷ്ണനും ബോര്‍ഡംഗമായിരുന്ന അജയ് തറയിലിനുമെതിരെ അന്വേഷണം. ദേവസ്വംമന്ത്രി കടകംപള്ളി സുരേന്ദ്രനാണ് പ്രാഥമിക അന്വേഷണത്തിന് ഉത്തരവിട്ടത്. ദേവസ്വം വിജിലന്‍സിനാണ് അന്വേഷണ ചുമതല.

ദേവസ്വം ബോര്‍ഡ് യോഗം നടത്തിയെന്ന് രേഖയിലുള്ള ദിവസം ശബരിമലയില്‍ ഉണ്ടായിരുന്നതായി കാട്ടി യാത്രപ്പടി എഴുതിയെടുത്തു. ഒരേദിവസം സിറ്റിങ് ഫീസും യാത്രപ്പടിയും കൈപ്പറ്റി. ഇതിനായി ദേവസ്വംബോര്‍ഡിന്റെ മിനിറ്റ്‌സിലോ ശബരിമല സന്ദര്‍ശക രജിസ്റ്ററിലോ കൃത്രിമം നടത്തിയിട്ടുണ്ടെന്ന് ഉറപ്പായതോടെയാണ് അന്വേഷണത്തിന് ഉത്തരവിട്ടത്.

ദേവസ്വം ബോര്‍ഡ് രേഖകളനുസരിച്ച് 2016 ആഗസ്ത് 16ന് തിരുവനന്തപുരത്ത് ബോര്‍ഡ് യോഗം ചേര്‍ന്നിരുന്നു. 1.15 കോടി രൂപയുടെ മരാമത്ത് പണികള്‍ക്ക് ഉള്‍പ്പെടെ അനുമതി നല്‍കിയ യോഗത്തില്‍ പ്രയാര്‍ ഗോപാലകൃഷ്ണനും അജയ് തറയിലും പങ്കെടുത്തതായും രേഖകളിലുണ്ട്.
എന്നാല്‍, ഇതേ ദിവസംതന്നെ ഇരുവരും ശബരിമലയിലേക്കുള്ള യാത്രാബത്ത എഴുതിയെടുത്തത് സംശയങ്ങള്‍ക്കിടയാക്കുന്നു. യാത്രാബത്തയ്ക്കായി ഇവര്‍ ഹാജരാക്കിയ രേഖകളില്‍ ആ ദിവസം പ്രയാര്‍ ഗോപാലകൃഷ്ണന്‍ ചിതറയില്‍നിന്നും അജയ് തറയില്‍ ആലുവയില്‍നിന്നും ശബരിമലയിലേക്ക് യാത്ര ചെയ്തതായി കാണിക്കുന്നു. യോഗം ചേരാതെ യോഗത്തിന്റ മിനിറ്റ്‌സ് എഴുതിയുണ്ടാക്കി. അല്ലെങ്കില്‍ യാത്രാബത്തയ്്ക്കായി യാത്ര ചെയ്തുവെന്ന് വ്യാജരേഖയുണ്ടാക്കി. പ്രയാറിന്റെയും അജയ്തറയിലിന്റെയും ഭാഗത്തുനിന്ന് ഗുരുതര വീഴ്ചയുണ്ടായി.

ദേവസ്വം ബോര്‍ഡില്‍ വ്യാപക ക്രമക്കേട് നടന്നുവെന്ന സര്‍ക്കാര്‍ നിലപാട് ശരിവയ്ക്കുന്നതാണ് പുറത്തുവരുന്ന തെളിവുകള്‍. കൂടാതെ, അജയ്തറയിലിന്റെ സ്റ്റാഫിലുണ്ടായിരുന്ന ഉദ്യോഗസ്ഥന്‍ ചുമതലയുണ്ടായിരുന്ന ക്ഷേത്രത്തില്‍നിന്ന് ഏഴുലക്ഷം രൂപ വകമാറ്റിയതായി ആരോപണമുയര്‍ന്നിരുന്നു. ക്രമക്കേട് പിടികൂടിയപ്പോള്‍ പണം തിരിച്ചടച്ച് കേസ് ഇല്ലാതാക്കാന്‍ ശ്രമിച്ചു. ദേവസ്വം പ്രസിഡന്റായിരുന്ന പ്രയാര്‍ ഗോപാലകൃഷ്ണന്റെ സ്റ്റാഫിലുണ്ടായിരുന്ന അടിച്ചുതളിക്കാരനെ വാച്ചറായി ചട്ടം മറികടന്ന് നിയമനം നടത്തിയതും അജയ്തറയിലിന്റെ സ്റ്റാഫിലുണ്ടായിരുന്ന മറ്റൊരാളെ ശംഖുംമുഖം ക്ഷേത്രത്തിന്റെ ചുമതലക്കാരനായി നിയമിച്ചതായും ആരോപണം ഉയര്‍ന്നിരുന്നു.

അഡ്മിനിസ്‌ട്രേറ്റീവ് ഓഫീസര്‍മാരായി 24പേരെ നിയമിക്കുന്നതിനും ദേവസ്വം സ്ഥാപനങ്ങളില്‍ അധ്യാപകരെ നിയമിക്കുന്നതിനും കൈക്കൂലി വാങ്ങിയതായി ആരോപണം ഉയര്‍ന്നിട്ടുണ്ട്.