ആകാശത്ത് നിന്നും ഭൂമിയിലേക്ക് ഒരു തൂണ്; തിരുവനന്തപുരത്ത് കടലിന് മുകളിലെ അത്ഭുത പ്രതിഭാസം കണ്ട് ഞെട്ടി നാട്ടുകാര്
വേളി ടൂറിസ്റ്റ് കേന്ദ്രത്തിന് സമീപം കടലില് ഞായറാഴ്ച വൈകിട്ട് വാട്ടര് സ്പൌട്ട് പ്രതിഭാസം (കടല് ടൊര്ണാഡോ) ദൃശ്യമായി. ശക്തമായ ഇടിമിന്നലിനെ തുടര്ന്ന് വിഎസ്എസ്സിയുടെ ഭാഗമായ ടേള്സിന് സമീപം ഉള്ക്കടലിലാണ് പ്രതിഭാസം ദൃശ്യമായത്. ഫൌണ്ടന് പോലെ മേഘം താഴേക്ക് വരികയും കടലില് വലിയ തിരയിളക്കമുണ്ടാകുകയും ചെയ്തു. കടല് വെള്ളം ഫണല് പോലെ മുകളിലേക്ക് ഉയര്ന്നതായി ദൃക്സാക്ഷികള് പറഞ്ഞു. ടെക്നോപാര്ക്ക് അടക്കം നഗരത്തിന്റെ വിവിധ ഭാഗങ്ങളില്നിന്ന് പലരും ദൃശ്യം മൊബൈലില് പകര്ത്തി വാട്സാപ്പില് പ്രചരിപ്പിച്ചു. ഇതോടെ ആശങ്ക പരന്നു.
മേഘം കടലിലേക്ക് ഇറങ്ങി വരുന്നുവെന്ന് തോന്നിപ്പിക്കുന്ന വാട്ടര് സ്പൌട്ട് പ്രതിഭാസമാണ് ഇന്നലെ തിരുവനന്തപുരത്തുണ്ടായത്. കൊച്ചുവേളി, വര്ക്കല തീരപ്രദേശങ്ങളിലാണ് കൂടുതലായി സംഭവം കണ്ടത്. എന്നാല് വാട്ടര് സ്പൌട്ട് കരയില് അപകടകാരിയല്ലെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. കടലിന്റെ വിവിധ ഭാഗങ്ങളിലേക്ക് നീങ്ങിയ പ്രതിഭാസമാണ് തീര പ്രദേശങ്ങളില് അങ്ങിങ്ങായി കണ്ടത്. മേഘം കടലിലേക്ക് താഴ്ന്ന് വരുന്നുവെന്നാണ് കണ്ടാല് തോന്നും. അസാധാരണ കാഴ്ച കണ്ടതോടെ തീരപ്രദേശത്തുള്ളവര് പരിഭ്രാന്തരായി. 20 മിനിട്ട് കഴിഞ്ഞപ്പോളാണ് ആകാശം പഴയത് സാധാരണപോലെയായത്.
'അനക്കാല്'(കരിംചുഴലി) എന്ന് വിളിക്കുന്ന പ്രതിഭാസം തുലാവര്ഷക്കാലത്ത് പതിവാണെന്ന് മത്സ്യത്തൊഴിലാളികള് പറഞ്ഞു. ശക്തമായ ഇടിമിന്നലില് മേഘങ്ങള്ക്കിടയിലുണ്ടാകുന്ന മര്ദവ്യത്യാസമാണ് പ്രതിഭാസത്തിന് കാരണമെന്നാണ് ശാസ്ത്രീയ വിശകലനം. കഴിഞ്ഞ വര്ഷം വര്ക്കല പാപനാശത്തും മുമ്പ് ശംഖുംമുഖത്തും പ്രതിഭാസം ദൃശ്യമായിരുന്നു.
https://www.facebook.com/Malayalivartha
