റെയില്‍വേയുടെ പേരില്‍ പ്രചരിപ്പിച്ച വര്‍ഗീയ ചേരിതിരിവുണ്ടാക്കുന്ന കത്തിന് പിന്നില്‍ സംഘപരിവാറെന്ന് സൂചന. ഞായറാഴ്ച രാത്രിയോടെയാണ് കത്ത് തിരുവനന്തപുരത്തെ മാധ്യമപ്രവര്‍ത്തകര്‍ക്ക് ആദ്യം ലഭിച്ചത്. ഐഎസ് തീവ്രവാദികള്‍ ഹിന്ദുക്കള്‍ക്ക് നല്‍കുന്ന വെള്ളത്തില്‍ വിഷം കലക്കാന്‍ സാധ്യതയുണ്ടെന്ന നിലയില്‍ ആര്‍പിഎഫ് എസ്‌ഐ തൃശൂര്‍ റെയില്‍വേ സ്‌റ്റേഷന്‍ മാസ്റ്റര്‍ക്ക് നല്‍കുന്നെന്ന പേരിലാണ് കത്ത് പ്രചരിപ്പിച്ചത്. റെയില്‍വേ സ്‌റ്റേഷനുകളിലും മറ്റും കൂട്ടമായെത്തുന്ന മുസ്ലീം മതവിഭാഗത്തില്‍പ്പെടാത്ത യാത്രക്കാര്‍ക്ക് കുടിക്കാന്‍ നല്‍കുന്ന വെള്ളത്തില്‍ വിഷം കലര്‍ത്തുന്നതിന് ഐഎസ് പദ്ധതിയിട്ടിട്ടുണ്ടെന്നും രഹസ്യന്വേഷണ വിഭാഗത്തില്‍ നിന്നും ജാഗ്രതാ നിര്‍ദ്ദേശം ലഭിച്ചിട്ടുണ്ടെന്നും കത്തില്‍ പറയുന്നു.

ശബരിമല തീര്‍ഥാടകര്‍ക്ക് നല്‍കുന്ന കുടിവെളളവും ഭക്ഷണവും സുരക്ഷ ഉറപ്പാക്കി മാത്രമേ നല്‍കാവൂവെന്നും കത്തില്‍ ആവശ്യപ്പെടുന്നു. 27-11-17 എന്ന തീയതിയില്‍ എഴുതിയ കത്ത് പക്ഷെ പ്രചരിച്ചത് 26 ന് രാത്രിയിലായിരുന്നു. വാര്‍ത്താഗ്രൂപ്പുകളില്‍ ഇതെത്തിച്ചത് ബിജെപി സംസ്ഥാന നേതാവിന്റെ പി ആര്‍ ഒ ആണെന്നറിയുന്നു. ഇയാള്‍ വാട്ട്‌സ് ആപ്പ് നമ്പറില്‍ നിന്നാണ് അയച്ചതെന്നറിയുന്നു. വാട്ട്‌സ് ആപ്പ് ഗ്രൂപ്പുകളില്‍ പോസ്റ്റിയതോടെ തീയതി ചോദിച്ച് ചിലര്‍ ചോദ്യങ്ങളുന്നയിച്ചതോടെ ഇയാള്‍ വാട്ട്‌സ് ആപ്പില്‍ നിന്നും മുങ്ങി. കത്തിന്റെ ആധികാരികത ഇനിയും റെയില്‍വേയോ പോലിസോ ഔദ്യോഗികമായി സ്ഥിരീകരിച്ചിട്ടില്ല.

.

എങ്കിലും ബിജെപി സംസ്ഥാന നേതൃത്വവുമായി കത്തിന് ബന്ധമുണ്ടെന്ന് സ്ഥിരീകരിക്കുന്ന വസ്തുകളാണ് പുറത്തുവരുന്നത്. വ്യാജകത്തുണ്ടാക്കി നാട്ടില്‍ കലാപമുണ്ടാക്കാന്‍ ലക്ഷ്യമിട്ടിരുന്നെങ്കിലും തീയതി തെറ്റിപ്പോയതോടെ ശ്രമം പാളിയെന്നാണ് നിഗമനം.