ന്യൂനപക്ഷങ്ങളെ പിണക്കാതിരിക്കാന് സി.പി.എം രാഷ്ട്രീയമായി ഹാദിയയുടെ ഒപ്പം; എന്.ഐ.എയുടെ അന്വേഷണവും തെളിവുകളും ശക്തം; ഇത് സുപ്രിംകോടതിക്ക് മനസിലായത് കൊണ്ടാണ് വിവാഹം റദ്ദാക്കാഞ്ഞത്
ഹാദിയ കേസില് ന്യൂനപക്ഷങ്ങളെ പിണക്കാതിരിക്കാന് സി.പി.എം രാഷ്ട്രീയമായി ഹാദിയയുടെ അഭിപ്രായത്തിനും സ്വാതന്ത്ര്യത്തിനും ഒപ്പം നില്ക്കുമ്പോഴും മുഖ്യമന്ത്രി പിണറായി വിജയന് സര്ക്കാര് എന്.ഐ.എയുടെ നിലപാടുകള്ക്കൊപ്പമാണ്. ഇക്കാര്യത്തില് സര്ക്കാരും വനിതാ കമ്മിഷനും പക്ഷെ, രണ്ട് നിലപാടുകളാണ് സ്വീകരിക്കുന്നത്. ഹാദിയയുടെ മനുഷ്യാവകാശം സംരക്ഷിക്കണമെന്ന് ആവശ്യപ്പെട്ട് കിട്ടിയ പരാതിയെ തുടര്ന്ന് കോട്ടയം എസ്.പിയോട് ഹാദിയെ നേരില് കണ്ട് സംസാരിച്ച് റിപ്പോര്ട്ട് നല്കാന് മനുഷ്യാവകാശ കമ്മിഷന് നിര്ദ്ദേശിച്ചു. ഹാദിയയെ കാണേണ്ട കാര്യമില്ലെന്ന നിയമോപദേശം എ.ജി നല്കിയതിനാല് കാണാനാവില്ലെന്ന് എസ്.പി മനുഷ്യാവകാശ കമ്മിഷനെ അറിയിച്ചു. അതില് സര്ക്കാര് നിലപാട് വ്യക്തമാണ്.
ഹാദിയയെ വിവാഹം കഴിച്ച ഷെഫിന് ജഹാന് ഐ.എസ് റിക്രൂട്ടര് കണ്ണൂര് ചൊകഌ സ്വദേശി മന്സൂറുമായി ബന്ധമുണ്ടെന്ന് എന്.ഐ.എ കണ്ടെത്തിയിട്ടുണ്ട്. മന്സൂറിന്റെ വാട്സാപ്പ് ഗ്രൂപ്പില് അംഗവുമാണ് ഷെഫിന്. ഒരാളെ ഐ.എസിലേക്ക് റിക്രൂട്ട് ചെയ്താല് എത്ര രൂപ കിട്ടുമെന്ന് ഷെഫിന് ജഹാന് മന്സൂറിനോട് ചോദിക്കുന്നതിന്റെ ഓഡിയോയും തങ്ങളുടെ പക്കലുണ്ടെന്ന് എന്.ഐ.എ കഴിഞ്ഞ ദിവസം സുപ്രീംകോടതിയെ അറിയിച്ചിരുന്നു. ഹൈക്കോടതി വിവാഹം റദ്ദാക്കിയതിന് പിന്നില് വ്യക്തമായ കാര്യങ്ങളുണ്ടെന്ന് എ.ജി സര്ക്കാരിനെ അറിയിച്ചിട്ടുണ്ടെന്നാണ് വിവരം. ഷെഫിന് ജഹാനെതിരെ എന്.ഐ.എയ്ക്ക് തെളിവ് ലഭിച്ചതിനാല് സംസ്ഥാന സര്ക്കാരിന് ഇക്കാര്യത്തില് ഇടപെടാന് താല്പര്യമില്ല.
കോടതി നിര്ദ്ദേശപ്രകാരം എന്.ഐ.എ അന്വേഷണം നടത്തിവരുകയാണ്. ഹാദിയ കേസില് സുപ്രിംകോടതി ഇടപെടുന്നതിനിടെ ഷെഫിന് ജഹാനെ അറസ്റ്റ് ചെയ്യേണ്ടെന്നാണ് തീരുമാനം എന്നറിയുന്നു. മുഴുവന് തെളിവുകളും ശേഖരിച്ച്, അന്വേഷണം പൂര്ത്തിയാക്കിയ ശേഷമായിരിക്കും അറസ്റ്റെന്ന് അറിയുന്നു. എസ്.ഡി.പി.ഐയുടെ പ്രവര്ത്തകനായ ഷെഫിന് ജഹാനെതിരെ ക്രിമിനല് കേസ് നിലവിലുണ്ട്. ഹാദിയയെ മതംമാറ്റിയെന്ന് പറയുന്ന സത്യസരണി എന്ന സംഘടനയ്ക്കെതിരെ 11 കേസുകള് നിലവിലുണ്ട്. അതില് ഏഴെണ്ണത്തിന്റെ അന്വേഷണം എന്.ഐ.എ നടത്തിവരുകയാണ്. ഇത്തരം സംഭവവികാസങ്ങള്ക്കിടയില് എല്.ഡി.എഫ് സര്ക്കാര് പ്രതികൂലനിലപാട് എടുത്താല് സംസ്ഥാനത്തെ ബി.ജെ.പി നേതൃത്വത്തിന് അത് ആയുധമാക്കാനാകും.
എന്.ഐ.എയെ നിയന്ത്രിക്കുന്നത് ബി.ജെ.പി ഭരിക്കുന്ന കേന്ദ്രസര്ക്കാരിണെങ്കിലും ഇതുപോലെയുള്ള വിവാദമായ കാര്യങ്ങളില് സുപ്രിംകോടതിയില് വ്യക്തമായ തെളിവുകളില്ലാതെ ഒന്നും പറയാനാവില്ല. കാര്യങ്ങളുടെ കിടപ്പ് സങ്കീര്ണമായത് കൊണ്ടാണ് മാതാപിതാക്കളുടെ ഒപ്പം ഹാദിയയെ വിടാഞ്ഞതും വിവാഹം റദ്ദാക്കാഞ്ഞതും. ഇതുവരെ കേട്ടതില് നിന്ന് വിചിത്രമായ കേസാണിതെന്ന് സുപ്രിംകോടതി ചീഫ് ജസ്റ്റിസ് ദിപക് മിശ്ര തന്നെ വ്യക്തമാക്കിയിരുന്നു.
https://www.facebook.com/Malayalivartha
