പേവിഷബാധയെ തുടര്‍ന്ന് ഗര്‍ഭിണി പശു ചത്തു. ഉടമസ്ഥന്‍ ഇത് മറച്ചുവെച്ച് അഗ്നിശമന സേനാംഗങ്ങളെയും നാട്ടുകാരെയും കബളിപ്പിച്ചു. ഇന്നലെ രാവിലെ പേവിഷബാധ മൂര്‍ച്ഛിച്ച ഗര്‍ഭിണി പശു കയര്‍പൊട്ടിച്ച് ഓടാന്‍ ശ്രമിക്കുന്നതിനിടയില്‍ സമീപത്തെ ചെളിയില്‍ പുതഞ്ഞു.

പശുവിനെ രക്ഷിക്കണമെന്നാവശ്യപ്പെട്ട് ഉടമയും ആനാട് നാഗച്ചേരിയിലെ കോഴിഫാം നടത്തിപ്പുകാരനുമായ സുനില്‍ നെടുമങ്ങാട് അഗ്നിശമന സേനയെ വിവരം അറിയിച്ചു. അഗ്നിശമന സേനാംഗങ്ങളും അമ്പതോളം നാട്ടുകാരും ചേര്‍ന്ന് വളരെ സാഹസപ്പെട്ട് ചെളിക്കെട്ടില്‍ നിന്നും രക്ഷിച്ചുവെങ്കിലും പശു ചത്തു. ഇതിനിടയില്‍ പശു ഉടമയുടെ ഭാര്യ സ്ഥലത്തെത്തി.

പശുവിനെ പിടിച്ചവരും രക്ഷിച്ചവരും ഇന്‍ജക്ഷന്‍ എടുക്കണമെന്നും പശുവിന് പേവിഷബാധ ഉണ്ടായിരുന്നതായും വെളിപ്പെടുത്തി. പശുവിന് ഇന്‍ജക്ഷന്‍ എടുത്തശേഷം ഡോക്ടറുടെ നിര്‍ദ്ദേശപ്രകാരം മാറ്റി കെട്ടിയിരിക്കുകയായിരുന്നുവെന്നും പേവിഷബാധ മൂര്‍ച്ഛിച്ചാണ് കയര്‍പൊട്ടിച്ച് ചാടി ചെളിക്കെട്ടില്‍ പുതഞ്ഞതെന്നും നാട്ടുകാരെ അറിയിച്ചു. ഇതറിഞ്ഞതോടെ നാട്ടുകാര്‍ പരിഭ്രാന്തരായി.

കൂടുതല്‍ അന്വേഷിച്ചപ്പോള്‍ രണ്ടുദിവസം മുമ്പ് ഈ പശുവിന്റെ കുട്ടി പേവിഷബാധയെ തുടര്‍ന്ന് ചത്തതായും പശുവിന് പേവിഷബാധയുണ്ടെന്ന് അറിഞ്ഞ് കുത്തിവെപ്പ് എടുത്തിരുന്നെന്നും നാട്ടുകാര്‍ സ്ഥിരീകരിച്ചു.

ഗര്‍ഭിണി പശുവിന്റെ പാല്‍ പലര്‍ക്കും പതിവായി വില്‍പ്പന നടത്തിയിരുന്നതായും നാട്ടുകാര്‍ പറഞ്ഞു. അഗ്നിശമന സേനാംഗങ്ങളെയും നാട്ടുകാര്‍ വിവരമറിയിച്ചു. ഇതേ തുടര്‍ന്ന് നാട്ടുകാരും സേനാംഗങ്ങളുമടക്കം നാല്പത്തിയഞ്ചിലധികം പേര്‍ നെടുമങ്ങാട് ജില്ലാ ആസ്പത്രിയിലും ജനറല്‍ ആസ്പത്രിയിലുമെത്തി കുത്തിവപ്പെടുത്തു.

നാട്ടുകാരെയും അഗ്നിശമന സേനയെയും കബളിപ്പിച്ച പശു ഉടമക്കെതിരെ കേസെടുക്കണമെന്ന് നാട്ടുകാര്‍ ആവശ്യപ്പെട്ടു. എന്നാല്‍ സുനിലിന്റെ സുഹൃത്ത് അഗ്നിശമന സേനാംഗമായതിനാല്‍ പരാതി നല്‍കാന്‍ തയ്യാറായിട്ടില്ല.