ഹയര് എഡ്യൂക്കേഷന് പുതിയ വാതായനം തുറന്ന് കേരളത്തില് പുതിയ ഓപ്പണ് സര്വകലാശാല വരുന്നു
സംസ്ഥാനത്ത് ഓപ്പണ് സര്വകലാശാല സ്ഥാപിക്കുന്നതിനുള്ള നടപടികളെക്കുറിച്ച് പഠിക്കാന് ഉന്നതവിദ്യാഭ്യാസ കൗണ്സില് വിദഗ്ദ്ധസമിതിയെ നിയോഗിച്ചു. എക്സിക്യൂട്ടിവ് ബോഡി അംഗങ്ങളായ ഡോ. ഫാത്തിമത്ത് സുഹറ അദ്ധ്യക്ഷയും ഡോ. ആര്.കെ. സുരേഷ്കുമാര് അംഗവുമായ സമിതി ഓപ്പണ് സര്വകലാശാല വേണോ വേണ്ടയോ എന്നും ഏത് വിധത്തില് നടപ്പാക്കണം എന്നുമാണ് പഠിക്കുക. പുനഃസംഘടിപ്പിച്ച ഉന്നത വിദ്യാഭ്യാസ കൗണ്സിലിന്റെ ആദ്യ എക്സിക്യൂട്ടിവ് ബോഡി യോഗത്തിലാണ് തീരുമാനം.
ഓപ്പണ് സര്വകലാശാല സ്ഥാപിക്കുന്നതിനെക്കുറിച്ച് 2009ല് ഉന്നത വിദ്യാഭ്യാസ കൗണ്സിലിനായി, ഇന്ദിരാഗാന്ധി നാഷണല് ഓപ്പണ് സര്വകലാശാല (ഇഗ്നോ) മുന് വൈസ് ചാന്സലര് ഡോ. രാം തക്വാലെ അദ്ധ്യക്ഷനായ സമിതി പഠനം നടത്തി റിപ്പോര്ട്ട് നല്കിയെങ്കിലും തുടര്നടപടിയുണ്ടായില്ല.
ഈ റിപ്പോര്ട്ടിന്മേല് സ്വീകരിക്കേണ്ട തുടര്നടപടികളെക്കുറിച്ചാണ് പുതിയ സമിതി പഠനം നടത്തുന്നതെന്ന് കൗണ്സില് ഉപാദ്ധ്യക്ഷന് ഡോ. രാജന്ഗുരുക്കളും മെമ്പര് സെക്രട്ടറി ഡോ. രാജന്വര്ഗീസും വാര്ത്താസമ്മേളനത്തില് അറിയിച്ചു. എല്ലാ സര്വകലാശാലകളിലും ബിരുദകോഴ്സുകള്ക്ക് പ്രവേശനം കിട്ടാത്ത അരലക്ഷത്തിലധികം കുട്ടികളുണ്ട്. കലിക്കറ്റ് സര്വകലാശാലയില് 60,000 പേരാണ് ഓരോ വര്ഷവും പുറത്താവുന്നത്. അയല്സംസ്ഥാനങ്ങളിലെ സര്വകലാശാലകളുടെ വിദൂരപഠന സ്ഥാപനങ്ങള് വന്തുക ഈടാക്കി കുട്ടികളെ കബളിപ്പിക്കുമ്പോള് ഗുണനിലവാരമുറപ്പാക്കി സര്ക്കാര് മേഖലയില് ഓപ്പണ് സര്വകലാശാല സ്ഥാപിക്കാനാണ് കൗണ്സില് ആലോചിക്കുന്നത്. ഇതിനായി നിയമനിര്മ്മാണം വേണ്ടിവരും.
സര്വകലാശാലകളില് നിലവിലുള്ള വിദൂരവിദ്യാഭ്യാസ വിഭാഗവും െ്രെപവറ്റ് രജിസ്ട്രേഷനും ഘട്ടംഘട്ടമായി നിറുത്തലാക്കി പൂര്ണമായും ഓപ്പണ് സര്വകലാശാലയ്ക്ക് കീഴില് കൊണ്ടുവരാനായിരുന്നു രാം തക്വാലെ സമിതിയുടെ ശുപാര്ശ. വിദൂരവിദ്യാഭ്യാസ വിഭാഗവും െ്രെപവറ്റ് രജിസ്ട്രേഷനും വേര്പെടുത്തണമെന്നും റിപ്പോര്ട്ടില് ശുപാര്ശയുണ്ടായിരുന്നു.
സംസ്ഥാനത്തെ സ്വയംഭരണ കോളേജുകളുടെ പ്രവര്ത്തനം പഠിക്കാന് എക്സിക്യൂട്ടിവ് ബോഡി അംഗങ്ങളായ ഡോ. ജോയ് ജോബ് കുളവേലില് അദ്ധ്യക്ഷനും ഡോ. കെ.കെ. ദാമോദരന്, ഡോ. ജെ. രാജന് എന്നിവര് അംഗങ്ങളുമായ സമിതിയെയും നിയോഗിച്ചു. സ്വയംഭരണപദവി വ്യാപകമായി ദുരുപയോഗം ചെയ്യുന്നെന്ന പരാതിയെത്തുടര്ന്ന്, ഇതേക്കുറിച്ച് പഠനം നടത്താന് കൗണ്സിലിന് സര്ക്കാര് നിര്ദ്ദേശം നല്കിയിരുന്നു. സ്വയംഭരണപദവി ലഭിച്ചശേഷം കോളേജുകളിലുണ്ടായ അക്കാഡമിക് മാറ്റങ്ങള് സമിതി പരിശോധിക്കും. 19 കോളേജുകള്ക്കാണ് സ്വയംഭരണപദവി നല്കിയത്. ഇതില് എറണാകുളം മഹാരാജാസ് കോളേജ് ഒഴികെയുള്ളവ എയ്ഡഡാണ്.
മൈസൂരിലെ കര്ണാടക സ്റ്റേറ്റ് ഓപ്പണ് സര്വകലാശാലയുടെ അംഗീകാരം യു.ജി.സി പിന്വലിച്ചിട്ട് രണ്ടുവര്ഷമായി. വഴിവിട്ട് കോഴ്സ് നടത്തിയതിനാണ് നടപടി. സര്വകലാശാല പ്രവര്ത്തിക്കുന്നില്ലെങ്കിലും 900 ജീവനക്കാര്ക്ക് ശമ്പളം നല്കാന് പ്രതിവര്ഷം 50 കോടി കണ്ടെത്തണം. ഓപ്പണ് സര്വകലാശാല പൂട്ടി പുതിയ സര്വകലാശാല ആരംഭിക്കാനൊരുങ്ങുകയാണ് കര്ണാടക സര്ക്കാര്. സര്വകലാശാലാ കെട്ടിടം നൈപുണ്യവികസന കേന്ദ്രമാക്കാനാണ് പദ്ധതി.
https://www.facebook.com/Malayalivartha
