കേരള രാഷ്ട്രീയത്തിലെ സൗമ്യ സാന്നിധ്യമാണ് ഇന്നലെ വിടപറഞ്ഞത്. ഒന്നാം കേരള നിയമസഭാംഗവും മുതിര്‍ന്ന സിപിഐ നേതാവുമായിരുന്നു ഇ. ചന്ദ്രശേഖരന്‍ നായര്‍. വാര്‍ധക്യസഹജമായ അസുഖങ്ങളെത്തുടര്‍ന്ന് അദ്ദേഹം കുറച്ചു നാളായി ചികിത്സയിലായിരുന്നു. ബുധനാഴ്ച രാവിലെ രോഗം മൂര്‍ച്ഛിച്ചതോടെ ശ്രീചിത്ര മെഡിക്കല്‍ സെന്ററില്‍ പ്രവേശിപ്പിച്ചു. പകല്‍ 12.20നാണ് അന്ത്യം. അഞ്ചുതവണ എംഎല്‍എയും മൂന്ന് തവണ മന്ത്രിയുമായിരുന്നു. പൊതുപ്രവര്‍ത്തനരംഗത്തെ സൗമ്യസാന്നിധ്യമായിരുന്ന ഇ ചന്ദ്രശേഖരന്‍നായര്‍ തിരുവനന്തപുരം കവടിയാര്‍ പണ്ഡിറ്റ് കോളനിയിലായിരുന്നു താമസം.

മാവേലിസ്‌റ്റോറിന്റെ ഉപജ്ഞാതാവായി വിശേഷിപ്പിക്കപ്പെടുന്ന അദ്ദേഹം മൂന്നുതവണ ഇ കെ നായനാര്‍ മന്ത്രിസഭയില്‍ അംഗമായി. 1957ല്‍ കൊട്ടാരക്കരയില്‍നിന്നാണ് 28ാം വയസ്സില്‍ എംഎല്‍എയാകുന്നത്. ആദ്യ നിയമസഭയിലെ ബേബി. '67ലും കൊട്ടാരക്കരയില്‍നിന്ന് ജയിച്ചു. സി അച്യുതമേനോന് മത്സരിക്കാന്‍ 1970ല്‍ എംഎല്‍എസ്ഥാനം രാജിവച്ചു. 1980ലും 1987ലും നായനാര്‍ മന്ത്രിസഭയില്‍ ഭക്ഷ്യസിവില്‍ സപ്‌ളൈസ് മന്ത്രിയായി. '96ല്‍ നായനാര്‍ മന്ത്രിസഭയില്‍ മൃഗസംരക്ഷണം, ടൂറിസം വകുപ്പുകളുടെ ചുമതല വഹിച്ചു. പ്രമുഖ സഹകാരികളിലൊരാളായിരുന്നു. കൊല്ലം ജില്ലാ സഹകരണ ബാങ്ക് പ്രസിഡന്റ്, സംസ്ഥാന സഹകരണ ബാങ്ക് പ്രസിഡന്റ്, ഡെപ്പോസിറ്റ് ഇന്‍ഷുറന്‍സ് ആന്‍ഡ് ക്രെഡിറ്റ് ഗ്യാരന്റി കോര്‍പറേഷന്‍ ഡയറക്ടര്‍, ഓള്‍ ഇന്ത്യാ സ്‌റ്റേറ്റ് കോ ഓപ്പറേറ്റീവ് ബാങ്ക് ഫെഡറേഷന്‍ ചെയര്‍മാന്‍, നാഷണല്‍ കോ ഓപ്പറേറ്റീവ് യൂണിയന്‍ ഓഫ് ഇന്ത്യാ വൈസ് പ്രസിഡന്റ്, റിസര്‍വ് ബാങ്കിന്റെ അഗ്രികള്‍ച്ചറല്‍ ക്രെഡിറ്റ് ബോര്‍ഡ് അംഗം, അര്‍ബന്‍ കോ ഓപ്പറേറ്റീവ് ബാങ്കുകള്‍ക്കായുള്ള റിസര്‍വ് ബാങ്കിന്റെ സ്റ്റാന്‍ഡിങ് അഡ്വൈസറി കമ്മിറ്റി അംഗം തുടങ്ങിയ നിലകളില്‍ പ്രവര്‍ത്തിച്ചു. സിപിഐ ദേശീയ കണ്‍ട്രോള്‍ കമ്മിറ്റിയിലും ദേശീയ കൌണ്‍സിലിലും അംഗമായിരുന്നു. സോഷ്യലിസ്റ്റ് പാര്‍ടിയിലൂടെ 1948ല്‍ പൊതുപ്രവര്‍ത്തനരംഗത്തെത്തി. 1952ല്‍ കമ്യൂണിസ്റ്റ് പാര്‍ടി അംഗമായി.

കേരള വികസന മാതൃക: പ്രതിസന്ധിയും പരിഹാരമാര്‍ഗങ്ങളും, ഹിന്ദുമതം ഹിന്ദുത്വം, ചിതറിയ ഓര്‍മകള്‍; മറക്കാത്ത ഓര്‍മകള്‍ എന്നീ പുസ്തകങ്ങള്‍ രചിച്ചു. ഹിന്ദുമതം ഹിന്ദുത്വം എന്ന പുസ്തകത്തിന് കേരള സാഹിത്യ അക്കാദമി പുരസ്‌കാരം ലഭിച്ചു. മികച്ച പാര്‍ലമെന്റേറിയനുള്ള ആര്‍ ശങ്കരനാരായണന്‍ തമ്പി പുരസ്‌കാരമടക്കം നിരവധി അംഗീകാരങ്ങളും ലഭിച്ചു.

തിരുകൊച്ചി എംഎല്‍സിയായിരുന്ന എ ഈശ്വരപിള്ളയുടെയും മീനാക്ഷിയമ്മയുടെയും മകനായി കൊട്ടാരക്കര കിഴക്കേക്കര ഈശ്വരവിലാസം ബംഗ്‌ളാവില്‍ 1928 ഡിസംബര്‍ രണ്ടിനാണ് ജനനം. പാലാക്കുഴി, കൊട്ടാരക്കര ടൌണ്‍ യുപി സ്‌കൂള്‍ എന്നിവിടങ്ങളില്‍ പ്രാഥമിക വിദ്യാഭ്യാസം. ചങ്ങനാശേരി എസ്ബി കോളേജില്‍നിന്ന് ബിരുദവും എറണാകുളം ലോ കോളേജില്‍നിന്ന് ബിഎല്‍ ബിരുദവും നേടി. തുടര്‍ന്ന് കൊട്ടാരക്കരയില്‍ അഭിഭാഷകനായി. കുറച്ചുകാലം ഇരുമ്പനങ്ങാട് സ്‌കൂളില്‍ അധ്യാപകനുമായിരുന്നു.

ഇ ചന്ദ്രശേഖരന്‍നായരുടെ സംസ്‌കാരം വെള്ളിയാഴ്ച ഉച്ചകഴിഞ്ഞ് മൂന്നിന് തിരുവനന്തപുരം തൈക്കാട് ശാന്തികവാടത്തില്‍ ഔദ്യോഗിക ബഹുമതികളോടെ നടക്കും.